Iugoslavia

Para unha maior información véxase: República Federal Socialista de Iugoslavia.

Iugoslavia

Bandeira
Himno	Hej, Sloveni
Localización
44°49′14″N 20°27′44″L
Capital	Belgrado (–1992)
Poboación
Poboación	23.271.000 (1991) (90,97 hab./km²)
Lingua oficial	Lingua serbocroata
Xeografía
Superficie	255.804 km²
Bañado por	mar Adriático
Punto máis alto	Monte Triglav (2.864 m)
Comparte fronteira con	Alemaña nazi Bulgaria Austria Unión Europea Albania Hungría Romanía Grecia Italia (1929–)
Datos históricos
Creación	1 de decembro de 1918
Disolución	27 de abril de 1992
Sucedido por	estados post-Iugoslavia
Organización política
Forma de goberno	monarquía (1918–1945) república (1945–)
Membro de	Interpol ONU (1945–1992)
Moeda	dinar iugoslavo (pt)
Identificador descritivo
Fuso horario	UTC+01:00
Dominio de primeiro nivel	.yu
Prefixo telefónico	+38
Código de país	YU

Iugoslavia (en serbocroata: Југославија ou Jugoslavija; lit. 'Terra dos Eslavos do Sur') foi un estado situado no sueste de Europa, que existiu dende 1918 ata 1992.

Fundouse en 1918, após a Primeira Guerra Mundial, baixo o nome de Reino dos Serbios, Croatas e Eslovenos, a partir do Reino de Serbia e do Estado dos Eslovenos, Croatas e Serbios. Constituíu a primeira unión de pobos eslavos do sur nun estado soberano, despois de séculos de dominio estranxeiro na rexión baixo o Imperio Otomán e o Imperio Austrohúngaro. O reino obtivo recoñecemento internacional o 13 de xullo de 1922 na Conferencia dos Embaixadores, en París. O 3 de outubro de 1929, trocou o nome a Reino de Iugoslavia.

Foi invadido polas Potencias do Eixe o 6 de abril de 1941. En 1943, proclamouse a República Democrática Federal de Iugoslavia pola resistencia partisana. O rei, Pedro II, que por ese entón moraba no exilio, recoñeceuna coma goberno lexítimo. Após o triunfo dos partisanos, na liberación de Iugoslavia en 1945, o novo goberno abole a monarquía e o país é renomeado coma República Federal Popular de Iugoslavia. Engadíronse ao seu territorio as rexións de Istria, Rijeka e Zadar, previamente ocupadas por Italia no período de entreguerras. O líder partisano Josip Broz Tito gobernou o país dende 1944 coma Primeiro Ministro e, máis tarde, coma presidente, ata o seu finamento en 1980. En 1963, o estado foi renomeado por derradeira vez coma República Federal Socialista de Iugoslavia.

As seis repúblicas constituíntes que formaron a República Federal Socialista de Iugoslavia foron as repúblicas socialistas de Bosnia e Hercegovina, Croacia, Eslovenia, Macedonia, Montenegro e Serbia. Esta última posuía dúas provincias autónomas socialistas, Kosovo e Voivodina, que despois de 1974 estiveron case ao par cos outros membros da federación. Tras unha gran crise económica e política na década dos '80 e do xurdimento do nacionalismo e conflitos étnicos, Iugoslavia desintegrouse ao longo das fronteiras das súas repúblicas, primeiro en cinco países, o que conduciu ás Guerras Iugoslavas. Dende 1993 ata 2017, o Tribunal Penal Internacional para a antiga Iugoslavia xulgou a líderes políticos e militares de Iugoslavia por crimes de guerra, xenocidio e outros crimes perpetrados durante ditas guerras.

Trala disolución, as repúblicas de Montenegro e Serbia formaron un estado federativo reducido, a chamada República Federal de Iugoslavia, coñecida posteriormente coma Serbia e Montenegro. Este estado aspiraba ao estatuto de único sucesor legal da RFSI, mais esas afirmacións foron opostas polas antigas repúblicas. Finalmente, aceptou a posición do Comité de Arbitraxe Badinter sobre a sucesión compartida e no 2003 o seu nome foi cambiado a Serbia e Montenegro. Este estado disolveuse cando Montenegro e Serbia se converteron en estados independentes no 2006, con Kosovo tendo aínda unha disputa en curso sobre a súa Declaración de Independencia en 2008.