Thomas Hallenbeck
| Biografía | |
|---|---|
| Nacemento | 13 de novembro de 1961 Fort Wayne, Indiana. |
| Datos persoais | |
| País de nacionalidade |  Estadounidense |
| Educación | Universidade de Colorado - Bolder. |
| Actividade | |
| Ocupación | Numismático. |
Familia | |
| Pai | Kenneth L. Hallenbeck  |
Thomas George Hallenbeck (coñecido tamén como Tom Hallenbeck), nado en Fort Wayne, Indiana, o 13 de novembro de 1961, é un numismático estadounidense, expresidente da American Numismatic Association e propietario do establecemento Hallenbeck Coin Gallery, dedicado ao comercio de moedas.
Traxectoria[editar | editar a fonte]
Thomas Hallenbeck naceu en 1961 en Fort Wayne, no condado de Allen, Indiana en 1961, fillo de June Eugenia Miekka e do tamén numismático Kenneth L. Hallenbeck, polo que se criou rodeado de moedas desde a súa primeira infancia. O seu pai levaba adoito a Thomas e os seus irmáns ás convencións numismáticas e ás reunións dos clubs locais,[1] algúns dos cales presidía. En 1983, Kenneth fundou o establecemento Ken Hallenbeck Coin Gallery, un comercio numismático en Colorado Springs, no que Thomas comezou a colaborar.[2][3]
Logo de cursar estudos superiores de Finanzas na Universidade de Colorado en Boulder,[1] a traxectoria de Thomas Hallenbeck transcorreu sempre vinculado á numismática. No ámbito asociativo, foi membro da xunta directiva da American Numismatic Association (ANA) de 1997 a 2001, logo vicepresidente (2009-2011) e finalmente presidente,[3] entre 2011 e 2013— un cargo que xa ocupara o seu pai de 1989 a 1991—.[4] Igualmente, foi membro doutras entidades asociativas, algunhas das cales presidiu, como a Asociación Numismática de Colorado-Wyoming e a Asociación de Numismáticos Profesionais de Colorado. Tamén foi vicepresidente da Token and Medal Society (1998-2004) e do Colorado Springs Coin Club e forma parte da asociación Industry Council for Tangible Assets.[2]
No ámbito editorial, Thomas Hallenbeck foi entre 1970 e 1974 editor de CoinChatter, a publicación do Old Fort Coin Club, de Indiana.[2]
En 2001, Hallenbeck adquiriu a tenda de moedas que o seu pai fundara en Colorado Springs —Ken Hallenbeck Coin Gallery Inc—, actualizoulle o nome a Hallenbeck Coin Gallery e pasou a ser o seu presidente.[1][2]
En 2023 entrou na lista publicada pola revista temática Coin World dos 100 numismáticos máis influentes desde 1960.[1]
Recoñecementos[editar | editar a fonte]
- 1996: Premio Goodfellow, da American Numismatic Association (ANA).[2]
- 2001: Premio Glenn Smedley Memorial, da ANA.[2][3][5]
- 2003: Medalla ao Mérito da ANA.[2][3][5]
- 2019: Premio Farran Zerbe Memorial, da ANA.[2][3][5][6]
Notas[editar | editar a fonte]
- ↑ 1,0 1,1 1,2 1,3 "Hallenbeck, Tom". En The Most Influential People in Numismatics 2023. Coin World. 2023. Páxina 64.
- ↑ 2,0 2,1 2,2 2,3 2,4 2,5 2,6 2,7 "ANA Awards Given to Numismatists Making a Difference". En Coin Week. 31 de xullo de 2019.
- ↑ 3,0 3,1 3,2 3,3 3,4 Smith, P. (2012).
- ↑ "ANA Presidents: 1891-Present". American Numismatic Association (Money.org).
- ↑ 5,0 5,1 5,2 "American Numismatic Association Past Award Recipients". American Numismatic Association (Money.org).
- ↑ "ANA Awards Hallenbeck, Hontoon, and Sammut". En The E-Sylum. 11 de agosto de 2019.
Véxase tamén[editar | editar a fonte]
Bibliografía[editar | editar a fonte]
- Smith, P. (2012). "Hallenbeck, Thomas G(eorge)". En American Numismatic Biographies. Páxina 187.
