Mebyon Kernow
| Mebyon Kernow (MK) | |
|---|---|
| Partido político de Cornualla | |
| Dirixentes e organización | |
| Líder | Dick Cole |
| Mocidades | Kernow X |
| Filiación internacional | Alianza Libre Europea |
| Historia | |
| Fundación | 6 de xaneiro de 1951 |
| Posicións políticas | |
| Ideoloxía | Rexionalismo[1] Nacionalismo córnico Nacionalismo cívico Socialdemocracia Ecoloxismo Europeísmo |
| Representación | |
| Cámara dos Comúns (escanos córnicos) | 0 / 6 |
| Consello de Cornualla[2][3] | 4 / 123 |
| Outros datos | |
| Sede | Lanhainsworth Fraddon Hill Fraddon St Columb Cornualla TR9 6PQ |
| Na rede | |
| www.mebyonkernow.org | |
Mebyon Kernow (que en córnico quere dicir "Fillos de Cornualla",[4] MK) é un partido nacionalista de Cornualla, un condado do suroeste de Inglaterra. Conta con catro escanos no Consello de Cornualla,[5] e conta con concelleiros en varias vilas e parroquias do condado.[6]
Foi fundado en 1952, e o seu máximo dirixente é Dick Cole. O seu ideario é de carácter europeísta e celtista, partidario de buscar un remedio económico local para dar traballo á xente do país. Tamén queren levar a lingua e a cultura córnicas ás escolas. Pertence á Liga Céltica, xunto co Mec Vannin, Partido Nacional Escocés, Unión Democrática Bretoa e o Plaid Cymru.
Historia e características[editar | editar a fonte]
O 6 de xaneiro de 1951 a revista New Cornwall (O novo Cornualla) patrocinara a aparición do Mebyon Kernow, nun acto no hotel Oates de Rysrudh, ó cal asistiron 13 persoas e 7 máis enviaron o seu apoio, entre elas os futuros bardos de Cornualla e un profesor universitario. Nomearon a Helena Charles presidenta, a Lambert Truran secretario, e a George Pawley White tesoureiro. Editan o xornal Kenethel Kernewek (Nación Córnica), influído polo ideario do Plaid Cymru, de carácter celtista e cun programa entre autonomista e federalista, así como cun vago reformismo social, que propón “restaurar a identidade céltica de Cornualla”. Defende a lingua córnica e vai loitar por revitalizala, así como quere manter o carácter e os intereses de Cornualla como nación céltica, todo propiciando os adiantos constitucionais que lle permitan acadar a autodeterminación, á vez que promociona a reanudación non só da lingua, senón tamén da historia, a literatura e do deporte locais, como a loita córnica. Neste mitin adoptarán os sete obxectivos do partido:
- Estudar as condicións locais e tentar poñer remedo ó que prexudica ós intereses de Cornualla a través da opinión pública.
- Fomentar a lingua e literatura córnicas.
- Acometer o estudo da historia córnica dende un punto de vista “córnico”.
- Aceptar a idea de que Cornualla é unha das seis nacións célticas.
- Publicar panfletos, artigos e cartas á prensa defendendo este ideario.
- Organizar actos e concertos de ambiente córnico-céltico en favor de defender o seu ideario.
- Cooperar con outras sociedades favorabeis a preservar o carácter de Cornualla.
En setembro de 1951 rexistraríase como un partido político partidario do autogoberno córnico.
Desenvolvemento[editar | editar a fonte]
Durante as dúas primeires décadas, non pasou de ser un pequeno grupo de entusiastas. Aínda así, Helena Charles, que deixa de ser a secretaria en 1954 en favor de Cecil Beer, obtén en 1953 un escano no concello de Camborne-Redruth. Ademais, dende 1956 os militantes Helena Charles e P. Pool organitarán campamentos córnicos para dar a coñecer á xuventude a lingua perdida, coa gramática Cornualla para principiantes (Cornish for beginners) . Malia isto, en 1960 o Mebyon Kernow tan só acadara un centenar de militantes.
Nas eleccións locais de 1970 o Mebyon Kernow tan só obtén o 2 % dos votos e unha certa representación a nivel local, grazas ó feito de que en 1971 chegaría ó milleiro de militantes baixo o liderado de Len Truran e Richard Jenkin, que se presentaran ás xerais de 1970. Pero o 25 de maio de 1975 un membro do MK, James Whetler, que se presentara ás xerais de 1974 por Truro, abandona o partido para fundar un novo grupo, o Partido Nacional Córnico (Party Kenethlegk Kernow ou Cornish National Party), máis radical, máis influenciado polo Partido Nacional Escocés e membro da Liga Céltica con outros grupos escoceses, galeses, bretóns e irlandeses.
Notas[editar | editar a fonte]
- ↑ Frans Schrijver (2006). Regionalism After Regionalisation: Spain, France and the United Kingdom. Amsterdam University Press. pp. 261–290. ISBN 978-90-5629-428-1.
- ↑ Keith Edkins (30 de novembro de 2009). "Local Council Political Compositions". Arquivado dende o orixinal o 07 de xaneiro de 2019. Consultado o 8 de decembro de 2009.
- ↑ Nicholas Whyte (10 de maio de 2005). "The 2005 Local Government Elections in Northern Ireland". Northern Ireland Social and Political Archive. Consultado o 8 de decembro de 2009.
- ↑ Dunkerley, Chris (3 de decembro de 2010). Cornwall24.net, ed. "Mebyon Kernow – 60 Years on – and still looking good!" (en inglés). Consultado o 4 de xullo de 2018.
- ↑ Cornwall. "Cornwall Councillors". www.mebyonkernow.org. Arquivado dende o orixinal o 26 de xuño de 2018. Consultado o 26 de xuño de 2018.
- ↑ "City, Town and Parish Councillors – Our Team". Mebyon Kernow. Arquivado dende o orixinal o 26 de xuño de 2018. Consultado o 30 de novembro de 2017.
