Enrique Vidal Abascal

Enrique Vidal Abascal

Biografía
Nacemento	12 de outubro de 1908 Oviedo, España
Morte	31 de outubro de 1994 (86 anos) Santiago de Compostela, España
Catedrático de universidade
Datos persoais
País de nacionalidade	España
Educación	Universidade de Santiago de Compostela Universidade Complutense de Madrid
Director de tese	Ramón María Aller Ulloa (en)
Actividade
Ocupación	pintor , matemático , catedrático , astrónomo
Membro de	Real Academia Galega
Lingua	Lingua castelá
Obra
Doutorando	Antonio Martínez Naveira, Xosé María Masa Vázquez (en) , Luis Hervella Torrón (en) , Luís Ángel Cordero Rego (en) , Francisco Javier Echarte Reula (en) , Pedro Martínez Gadea (en) , María Concepción Fuertes Fraile (en) , María Ángeles de Prada Vicente (en) , Enrique Vidal-Costa (en) , Agustin Bonome (en) , Regina Castro Bolaño (pt) , Marisa Fernández (pt) , José Luciano Lopez Rosendo (en) e José Antonio Oubiña Galiñanes (en)
Familia
Fillos	Félix Vidal Costa
Pai	Enrique Vidal Bobo
Premios (1986)  Medalla Castelao

Enrique Vidal Abascal, nado en Oviedo o 12 de outubro de 1908 e finado en Santiago de Compostela o 31 de outubro de 1994, foi un matemático, astrónomo e pintor galego.

Traxectoria

Fillo de Enrique Vidal Bobo. Residiu desde a súa nenez en Galicia. Estudou Ciencias Exactas en Santiago e Madrid. Foi profesor de Matemáticas dos institutos de Santa Cruz da Palma, Monforte, A Estrada, Vigo, Pontevedra e Arcebispo Xelmírez de Santiago. Foi director do Instituto de Monforte (1934) e despois do Instituto da Estrada (1935). En 1940 substituíu a Secundino Vilanova Rivas como presidente da comisión depuradora do maxisterio de Pontevedra.

Doutor en Ciencias Matemáticas pola Universidade de Madrid (1944), presentando unha tese, dirixida por Ramón María Aller Ulloa, que trataba sobre as órbitas de estrelas duplas .

Desde 1955 foi catedrático de Xeometría Diferencial da Universidade de Santiago de Compostela sendo, desde a súa creación en 1968, decano da Facultade de Ciencias Matemáticas de dita universidade, até a súa xubilación. Está considerado pioneiro no aperturismo matemático internacional da posguerra española, organizando o primeiro Coloquio Internacional de Matemáticas celebrado en España (1963)

Foi promotor da Real Academia Galega de Ciencias, da que foi o seu primeiro presidente, sendo designado posteriormente presidente de honra, e director do Seminario de Estudos Matemáticos de Santiago de Compostela entre 1967 e 1978.

O labor investigador de Vidal Abascal versou sobre Xeometría Diferencial e Integral (curvas e superficies) e, en astronomía, no cáculo de órbitas de estrelas duplas.

Introduciu en España o estudo de Foliacións, así como a noción de métrica case fibrada; Vidal e o profesor Hervella encontraron dúas novas xeometrías pseudokahlerianas, que denominaron G₁ G₂ (Galegas 1ª e 2ª).

Inventou un aparello, o orbígrafo (construído en Zürich) para o cálculo das órbitas de estrelas duplas, que aínda segue a usarse no Observatorio Astronómico de Santiago. Ao respecto do seu labor investigador sobre estas estrelas, o Observatorio Astronómico de París, escribía en 1979:

"...o conxunto das súas investigacións (...) constitúe sen dúbida ningunha (...) a maior e máis importante contribución dos nosos tempos ao estudo das estrelas duplas. Por outro lado, Vidal non só se limita á teoría, senón tamén á aplicación práctica dos seus métodos, inventando e facendo construír (...) o seu enxeñoso aparello orbígrafo, que (...) é usado por numerosos investigadores."

Entre 1972 e 1977 ditou relatorios e cursos na École Polytechnique de Lausana e na Universidade VI de París.

Pertenceu á Sociedade Americana de Matemática (American Mathematical Society), ao Círculo Matemático de Palermo (Circolo Matematico di Palermo) é a Sociedad Matemática Española. Foi membro da Real Academia Galega ingresando o 27 de marzo de 1971 coa lectura do discurso A crisis da universidade europea, respondido por Ramón Otero Pedrayo.

Obras

• Geometría integral sobre las superficies curvas
• Fundamentos de la Geometría Integral
• Introducción a la Geometría Diferencial (1956)
• Curso de matemáticas (1957)
• Libro de problemas de Matemáticas (1961)
• La nueva matemática (1961)
• Cálculo de órbitas de estrellas dobles vusuales (1963)

A súa produción complétase cuns cen artigos, algúns deles aparecidos en revistas como:

• Astronomical Journal (Yale)
• Journal of Differential Geometry (Leigh University)
• Proceedings of the American Mathematical Society (EEUU)
• Bulletin of the American Mathematical Society (EEUU)
• Annales de l’Institut Fourier (Grenoble, Francia)
• Comptes Rendus de l’Académie des Sciences (París)
• Rendiconti dei Círcolo Matemático di Palermo (Palermo) ou
• Tensor N.S. (Xapón).

Premios e recoñecementos

• Premio Alfonso X El Sabio, outorgado polo CSIC en 1949, polo seu traballo Geometría Integral sobre las Superficies Curvas.
• Premio da Real Academia de Ciencias, en 1953, por Fundamentos de la Geometría Integral.
• Prize of the Royal Academy of Exact, Physical and Natural Sciences, en 1953, por Generalización de los Invariantes Integrales, e en 1959 por Equivalencia entre algunos problemas del Cálculo de Variaciones, la Teoría de los Invariantes Integrales Generalizados y la Geometría Integral.
• Officier dans l' Ordre des Palmes Académiques, condecoración concedida polo goberno francés, en 1974, polas súas relacións científicas con Francia.

Os espazos case-foliados (almost-foliated manifolds) son coñecidos coma espazos de Vidal na súa honra, e as estruturas case hermíticas coma G₁-G₂, por Galicia.

Véxase tamén

Bibliografía

• Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 
• Barrera, Feliciano, ed. (novembro de 2004). Hijos predilectos y adoptivos de Galicia (en castelán). Santiago de Compostela: Editorial Compostela: El Correo Gallego / O Correo Galego. ISBN 84-8064-137-1. 
• Couceiro Freijomil, A. (1954). "Vidal Abascal, Enrique". Diccionario bio-bibliográfico de escritores (en castelán) III. Santiago de Compostela: Bibliófilos Gallegos. p. 501. 
• Fernández del Riego, F. (1992) [1990]. Diccionario de escritores en lingua galega (2ª ed.). Do Castro. ISBN 84-7492-465-0. 
• García Iglesias, José Manuel (1995). Vidal Abascal. Matemático-pintor, universitario-artista. A Coruña: Fundación Pedro Barrié de la Maza. ISBN 84-87819-81-8. 
• Igrexas, Manuel: "Enrique Vidal Abascal, presidente do Partido Galeguista de Lalín" (21/12/2017) en Historias de Deza.

Ligazóns externas

• "E. Vidal Abascal. Life and work" Área de Xeometría e Topoloxía. Departamento de Matemáticas, USC (en inglés).
• "Enrique Vidal Abascal". Álbum da Ciencia do Consello da Cultura Galega. 
• Varias referencias a traballos no campo de estrelas duplas (en inglés).