Galego: Foi reedificada sobre a igrexa primitiva no ano 1860, segundo consta na inscrición da fachada principal. É dunha soa nave con ábsida rectangular, de máis altura que a nave. Posteriormente engadíronselle no lado sur unha pequena capela e a sancristía. A fachada enmárcase con dúas pilastras laterais, con basa e capitel destacados, e rematadas en pináculos. Remátase con volutas estilizadas ata a espadana de dobre ollo adornada con pináculos máis pequenos. Enriba dela fixeron outro frontón cun oco máis. Como remate con cruz metálica. A Portada móstrase con lintel recercado con molduras acobadadas. Ten derrame de xambas para o interior. Entre o lintel e a ventá central da fachada, que ten recercado de moldura e acobadada similar ao da porta, atópase unha cartela enmarcada en resalte coa inscrición á que fixemos referencia:

"REEDIFICADA EN 1860
ABAD D. MANUEL ANT.
ALVARES NAT. DE TUI”

As portas laterais teñen tamén lintel recto e derrame de xambas para o interior. As ventás son pequenas e recércanse polo exterior e abucinamento para ambos lados. Toda ela está adornada dunha cornixa perimetral na que descansa a cuberta. Os pináculos da nave son de sección piramidal mentres que os da ábsida son cónicos.