Trátase de dous vestixios construtivos dun establecemento hostaleiro erixido en dous momentos: o primeiro datable probablemente a principios da segunda centuria da era, consistiría nun gran corralón co teito apoiado sobre piastras, cuxas bases pétreas aínda se conservan no interior, máis unha serie de estancias residenciais contiguas, ata agora só parcialmente escavadas; o segundo, levantado tal vez nas primeiras décadas do século III, correspondería a implantación dun novo edificio que, en parte, anularía o antigo corralón máis a edificación dun cercado exterior, co seu pozo en medio, posiblemente para albergar e, á vez, abeberar os animais de transporte e montura. En todo caso, a presente construción, cuxo vestíbulo empredrado aínda se conserva íntegro na actualidade, achábase flanqueando unha vía urbana á que se descendería por unha escalinata de varios chanzos.

Fonte: Guía do xacemento arqueolóxico de Aqvae Qverqvennae. Edita Xunta de Galicia, Fundación Aquae Querquennae e Unión Fenosa.