Ryan Anderson

Ryan Anderson

Axente libre
Posición	Ala-pivote
Información persoal
Nacemento	6 de maio de 1988 (35 anos) Sacramento (California)
Nacionalidade	Estados Unidos
Altura	2,08 m (6 ft 10 in)
Peso oficial	109 kg (240 lb)
Información da carreira
Instituto	Oak Ridge (El Dorado Hills, California)
Universidade	California (2006–2008)
NBA Draft	2008 / Rolda: 1 / Elección: 21 Por New Jersey Nets
Carreira	dende 2008
Historial de equipos
New Jersey Nets (2008–2009) Orlando Magic (2009–2012) New Orleans Hornets / Pelicans (2012–2016) Houston Rockets (2016–2018) Phoenix Suns (2018–2019) Miami Heat (2019) Houston Rockets (2019)
Premios e galardóns
Xogador Máis Mellorado da NBA (2012)

Ryan James Anderson, nado o 6 de maio de 1988 en Sacramento (California), é un xogador profesional de baloncesto estadounidense. Con 2,08 metros de alzada xoga na posición de ala-pivote.

Traxectoria

Universidade

Procedente do Instituto Oak Ridge, Anderson xogou dúas tempadas na Universidade de California. No seu primeiro ano liderou aos Golden Bears en anotación (16,3 puntos por partido) e en rebotes (8,2), finalizando quinto en ambas as categorías na Pacific Ten Conference, logrando ademais a marca de máis rebotes capturados por un "freshman" na historia da universidade con 269. Os Golden Bears chegaron até as semifinais do torneo da Pac-10 de 2007, caendo eliminado ante Oregon a pesar dos 17 puntos e 12 rebotes de Anderson. Previamente, na primeira rolda, desfixéronse de Oregon State cun gran Anderson, asinando 27 puntos e 15 rebotes.

Na súa segunda tempada en California, os seus números ascenderon até os 21,1 puntos, liderando a conferencia e finalizando décimo oitavo na nación, e 9,9 rebotes, terceiro na Pac-10. Os seus 697 puntos foi a segunda mellor marca anotadora na historia dos Golden Bears, converténdose ademais no primeiro xogador de California en conseguir polo menos 600 puntos e 300 rebotes. Anotou en dobres figuras nos 33 partidos que disputou, anotando 20 ou máis puntos en 18 ocasións e chegando á marca de 30 puntos en catro partidos. Debido a que California non se clasificou para o torneo da NCAA, Anderson foi peza clave para entrar na National Invitation Tournament, onde caeron en segunda rolda ante Ohio State.

Anderson foi nomeado no segundo equipo All-America e foi elixido no mellor quinteto da conferencia. Deixou os Golden Bears como o 16ª máximo anotador da historia de California con 1.236 puntos e foi o primeiro sophomore en superar a barreira de 1.000 puntos. Tamén finalizou noveno en triplas anotados (122) e terceiro en porcentaxe de tiros libres (84,1).

NBA

Anderson foi seleccionado por New Jersey Nets na vixésimo primeira posición do Draft da NBA de 2008, equipo co que asinou contrato en xullo de 2008 por dúas tempadas, a razón de 1 millón de dólares a primeira campaña e 1,1 a segunda, ampliable a dous anos máis.

O 25 de xuño de 2009 foi traspasado xunto con Vince Carter a Orlando Magic a cambio de Rafer Alston, Tony Battie e Courtney Lee. Anderson comezou a tempada 2009-10 coma titular, en lugar do sancionado Rashard Lewis.

Na tempada 2011-12, foi premiado co galardón ao Xogador máis mellorado da NBA.

O 6 de febreiro de 2019, Anderson foi traspasado ós Miami Heat a cambio de Tyler Johnson e Wayne Ellington. O 6 de xullo de 2019, foi cortado polos Heat.

Véxase tamén

Ligazóns externas

• Perfil en NBA.com (en inglés)
• Estatísticas de Ryan Anderson Arquivado 04 de decembro de 2012 en Wayback Machine. (en inglés)