Wolfgang Szaivert
| Biografía | |
|---|---|
| Nacemento | 9 de xuño de 1950. Viena.  Austria. |
| País de nacionalidade | Austríaca. |
| Educación | Universidade de Viena. |
| Tese académica | A actividade das cecas da moeda sasánida desde a introdución xeneralizada das sinaturas e as datas. |
| Director de tese | Robert Göbl. |
| Actividade | |
| Campo de traballo | Numismática, historiografía. |
| Ocupación | numismático  |
| Empregador | Instituto de Numismática e Historia Monetaria (Universidade de Viena). |
| Familia | |
| Cónxuxe | (1971) Eva Pytlik. |
| Pais | Wilhelm Szaivert e Martha Szaivert. |
| Premios | |
| 2008: Medalla Eckhel. 2009: Medalla Liechtenstein. 2012: Medalla Wolfgang Hahn. | |
Wolfgang Szaivert, nado en Viena o 9 de xuño de 1950, é un numismático austríaco, profesor de Numismática na Universidade de Viena e investigador sobre as emisións monetarias en Oriente Medio na Antigüidade.
Traxectoria
[editar | editar a fonte]Primeiros anos e formación
[editar | editar a fonte]Wolfgang Szaivert naceu en Viena o 9 de xuño de 1950, fillo de Martha Szaivert e de Wilhelm Szaivert (1922-2009), arquiveiro, bibliotecario e conselleiro imperial,[1] un erudito de quen Wolfgang herdou o seu interese pola cultura de Oriente Medio. Asistiu á escola primaria entre 1956 e 1960, e logo cursou os seus estudos de secundaria no Akademische Gymnasium de Viena, entre 1960 e 1968.[2]
Nese mesmo ano comezou os seus estudos superiores de Historia Antiga, Arqueoloxía Clásica, Prehistoria, Protoshistoria, Historia da Arte e Estudos Orientais na Universidade de Viena. En 1971 comezou a traballar como asistente de investigación no Instituto de Numismática Antiga e Historia Preislámica de Asia Central, onde recibiu as influencias de colegas como Peter Robert Franke e Maria Radnoti-Alföldi.[2] En 1975 acadou o seu doutoramento na mesma universidade,[3] baixo a dirección de Robert Göbl,[4] cunha tese acerca da organización das cecas da moeda do Imperio Sasánida.[5][6]
Carreira académica e numismática
[editar | editar a fonte]O seu doutoramento permitiulle comezar a dedicarse á docencia na universidade de xeito interino. A partir dese momento, coa única paréntese da súa incorporación ao Exército federal durante uns meses en 1976, foi o único colaborador científico cun posto fixo no Instituto —que en 1978 pasou a chamarse Instituto de Numismática— ata o nomeamento de Hubert Emmerig en 1996.[4]
En 1984 acadou a súa habilitación para impartir docencia de Numismática na Universidade de Viena, cunha tese sobre as moedas imperiais romanas a nome de Marco Aurelio, Lucio Vero e Cómodo, que foi publicada dous anos máis tarde.[7] Logo desta habilitación, en 1992 accedeu a un posto de profesor adxunto de Numismática no Instituto de Numismática e Historia Monetaria desta universidade, baixo a dirección de Wolfgang Hahn, e en 1997 foi nomeado profesor extraordinario.[8]
En febreiro de 2010, a xubilación de Hahn na dirección do Instituto converteu a Szaivert en director interino a partir do 1 de marzo dese ano, con Hubert Emmerig como o seu adxunto.[8] Szaivert non abandonou a docencia universitaria e o seu labor investigador no Instituto ata a súa xubilación o 29 de febreiro de 2012.[3]
En 1999, Szaivert foi elixido membro da Comisión Numismática Austríaca.[8]
Vida persoal
[editar | editar a fonte]Wolfgang Szaivert casou en 1971 con Eva Pytlik (nada en 1948),[8] a quen coñecera no Instituto de Numismática e Historia Monetaria, no que tamén traballaba como investigadora.[9]
Recoñecementos
[editar | editar a fonte]- 2008: Medalla Eckhel, da Sociedade Numismática Austríaca.[3][10]
- 2009: Medalla Liechtenstein, da Sociedade Heráldica e Xenealóxica "Adler".[3]
- 2012: Medalla Wolfgang Hahn, da Universidade de Viena.[3][11]
Publicacións
[editar | editar a fonte]Esta é unha escolma dos traballos monográficos máis representativos publicados por Wolfgang Szaivert ao longo da súa traxectoria:[12][13]
- .(1975). Die Tätigkeit der sāsānidischen Münzstätten ab der generellen Einführung der Signaturen und Datenangaben, (Organisation, Technisches und historische Bezüge). 3 volumes. Universität Wien, Viena.
- (1980-1983). Griechischer Münzkatalog.(con E. Szaivert e D. Sear). Battenberg, Múnic.
- (1980). Tomo 1: Europa. ISBN 3870451823
- (1983). Tomo 2: Asien und Afrika. ISBN 978-3870451875
- (1986). Die Münzprägung der Kaiser Marcus Aurelius, Lucius Verus und Commodus (161-192). Österreichische Akademie der Wissenschaften, Viena. ISBN 9783700107781
- (1992). Die antiken Münzen aus St. Pöltner Museen: die Sammlungen des Diözesanmuseums und des Stadtmuseums (con F. Schmidt-Dick). Österreichische Akademie der Wissenschaften, Viena. ISBN 9783700119401
- (2000-2004). Sylloge Nummorum Graecorum Österreich, Sammlung Leypold, Kleinasiatische Münzen der Kaiserzeit (con C. Daburon). Institutes für Numismatik und Geldgeschichte, Viena.
- (2000). Tomo 1: Pontus-Lydien. ISBN 3950053042
- (2004). Tomo 2: Phrygien-Kommagene. ISBN 3950053077
- (2005). Löhne, Preise, Werte: Quellen zur römischen Geldwirtschaft (con R. Wolters). WBG Academic. ISBN 978-3534167746
Notas
[editar | editar a fonte]- ↑ Emmerig, H.; List, E. (2012)[Ligazón morta]. Páxina 12.
- 1 2 Emmerig, H.; List, E. (2012)[Ligazón morta]. Páxina 13.
- 1 2 3 4 5 Emmerig, H.; List, E. (2012)[Ligazón morta]. Páxina 8.
- 1 2 Emmerig, H.; List, E. (2012)[Ligazón morta]. Páxina 14.
- ↑ Véxase "(1975)" en "Publicacións".
- ↑ Emmerig, H.; List, E. (2012)[Ligazón morta]. Páxina 17.
- ↑ Véxase "(1986)" en "Publicacións".
- 1 2 3 4 Emmerig, H.; List, E. (2012)[Ligazón morta]. Páxina 14.
- ↑ Emmerig, H.; List, E. (2012)[Ligazón morta]. Páxina 32.
- ↑ "Eckhel-Medaille". Österreichische Numismatische Gesellschaft (Oeng.at).
- ↑ "Wolfgang-Hahn-Medaille". Institut für Numismatik und Geldgeschichte. Univarsität Wien.
- ↑ "Schriftenverzeichnis von Wolfgang Szaivert 1975−20121". Emmerig, H.; List, E. (reds.) (2012). Páxinas 36-47.
- ↑ "Wolfgang Szaivert (*1950). Zusammenstellung numismatischer Schriften". Coingallery.com
Véxase tamén
[editar | editar a fonte]Bibliografía
[editar | editar a fonte]- Emmerig, H.; List, E. (reds.) (2012). "Univ.-Prof. Dr. Wolfgang Szaivert". Universität Wien. Institut für Numismatik und Geldgeschichte. ISSN 1563-3764
