Accidente dun Learjet 45 en 2008

Voo da Learjet 45XR
Un avión similar ó accidentado.
Resumo
Data	4 de novembro de 2008
Causa	Aínda descoñecida
Lugar	Cidade de México
Coordenadas
Orixe	San Luís de Potosí
Destino	Cidade de México
Finados	16
Feridos	40
Aeronave
Tipo de aeronave	Learjet 45
Operador	Secretaría de Gobernación
Rexistro	XC-VMC
Pasaxeiros	7
Tripulación	2
Superviventes	0

O lugar do accidente

O 4 de novembro de 2008, un avión modelo Learjet 45XR caeu cando se aproximaba ao aeroporto de Cidade de México. No accidente faleceron catorce persoas, entre elas o ministro de interior mexicano, o galego Juan Camilo Mouriño.

A aeronave

O avión era un Learjet 45 XR, propiedade do goberno de México. Os Learjet 45 son avións pequenos, de 17,68 m de eslora, e 14,57 m de amplitude de ás, e que alcanza unha velocidade de cruceiro de 457 nós. Están fabricados pola empresa canadense Bombardier Aerospace.

Ten espazo para dúas persoas no posto de mando e 9 pasaxeiros. No avión voaban no momento do accidente 3 tripulantes e 5 pasaxeiros. Fora fabricado no ano 2000 e a súa matrícula era XC-VMC.

Lugar do accidente

O pequeno avión facía a viaxe de volta dende o aeroporto Ponciano Arriaga, na cidade de San Luis Potosí ata o aeroporto Benito Juárez de Cidade de México. Engalou ás 17:30, hora local, e tiña prevista a aterraxe pouco antes das sete da tarde. Ás 18:42 a torre de control perdeu o contacto co avión, cando este estaba realizando xa a manobra de aproximación á pista.

O avión caeu sobre a estrada Paseo de la Reforma, unha das principais arterias do oeste de Cidade de México á altura do cruzamento coa rúa Prado Norte, e a escasos metros do bosque de Chapultepec, un dos pulmóns arbóreos da capital mexicana.

As causas

Unha primeira hipótese asociou o accidente á reducida distancia entre o avión e un Boeing 767 que viaxaba diante, e que puido ser orixe de turbulencias que derrubasen a aeronave. Porén, e tendo en conta o alto perfil político das vítimas, a investigación non descartou un atentado, sucedido precisamente logo de semanas de grandes disturbios no país entre as forzas do estado e bandas de narcotraficantes, que se cobraron 4.200 mortos.

Finalmente, as pescudas consideraron que a primeira hipótese era a correcta, e que a escasa distancia entre os avións foi produto da inexperiencia dos pilotos.

As vítimas

Faleceron 14 persoas, e ata 40 resultaron feridas de diversa consideración. Entre os falecidos estaba toda a tripulación e a pasaxe da aeronave (8 persoas) e seis persoas máis, de distintas nacionalidades, que se atopaban na rúa sobre a que caeu o avión.

Tres dos falecidos ocupaban elevadas posicións na política mexicana. Un era Juan Camilo Mouriño, político e economista galego, que nese momento era o ministro da Gobernación (interior) mexicano. Tamén faleceu José Luis Santiago Vasconcelos, alto cargo do ministerio e responsable da loita contra a droga, e Miguel Monterrubio, voceiro do ministerio.