Voo 647 de FedEx Express

Na Galipedia, a Wikipedia en galego.
Voo 647 de FedEx Express
O avión despois do accidente
Resumo
Data  18 de decembro de 2003
Causa  erro do piloto
Lugar  aeroporto de Memphis
Coordenadas  Coordenadas: 35°02′00″N 89°58′19″O / 35.033305555556, -89.971861111111
Orixe  aeroporto de Oakland
Destino  aeroporto de Memphis
Aeronave
Tipo de aeronave McDonnell Douglas MD-10-10F
Operador  FedEx Express
Rexistro  N364FE
Pasaxeiros  5
Tripulación  2
Superviventes  7

O voo 647 de FedEx Express era un servizo de carga entre o aeroporto de Oakland e o aeroporto de Memphis. O día 18 de decembro de 2003 o McDonnell Douglas MD-10-10F que operaba a ruta esnafrouse durante a aterraxe.[1]

Avión e tripulación[editar | editar a fonte]

O aparello implicado no incidente era un McDonnell Douglas MD-10-10F, con rexistro N364FE.[2] O MD-10 é unha versión actualizada do trimotor de fuselaxe ancha McDonnell Douglas DC-10. No momento do accidente o avión tiña unhas 65 375 horas de voo.[2]

O voo tiña unha tripulación experimentada. O capitán tiña unhas 21 000 horas de voo, incluídas 2 602 horas nos MD-10 e MD-11, mentres que o primeiro oficial tiña unhas 15 000 horas, das cales 1 918 eran nos MD-10/MD-11.[2]

A bordo do avión había tamén 5 empregados de FedEx que non estaban traballando.[2]

Accidente[editar | editar a fonte]

O 18 de decembro de 2003 o voo 647 estaba programado para saír de Oakland ás 08:10 CST, e tras un pequeno atraso debido a un problema coa clasificación de paquetes, engalou cara a Memphis ás 08:32. A saída e o voo foron normais.[2]

O avión tocou terra ao redor das 12:26 na pista 36R, e case inmediatamente o tren de aterraxe dereito colapsou. O avión desviouse cara ao lado dereito da pista incendiándose mentres o facía. A copiloto recibiu feridas leves cando evacuou o avión, ao igual que un dos cinco pasaxeiros. Posteriormente descubriuse que o pasaxeiro, que era piloto, que activou a rampla de emerxencia non estaba axeitadamente adestrado para realizar esa operación, e accidentalmente tirou da panca que liberaba a rampla como unha balsa no caso dunha amaraxe, polo que se separou do avión.

Investigación[editar | editar a fonte]

A NTSB realizou a investigación do accidente. Descubriu que aínda que o avión se atopara con vento cruzado durante a aterraxe as condicións estaban dentro das capacidades de seguridade do avión. Porén, descubríuse que o primeiro oficial non aliñou correctamente ou non freou axeitadamente o aparello antes de tocar, polo que o avión pisou a pista con moita forza. A medida que o avión descendía, debido ao vento cruzado, a á dereita baixou de súpeto uns 6 graos. Isto estaba máis aló das capacidades de deseño do tren dereito e rompeuse como resultado. A NTSB tamén citou o fallo do capitán ao comprobar o traballo do primeiro oficial.[3]

A NTSB atopou ademais que a Orde da FAA 8400.10 (Manual do inspector de transporte aéreo) era deficiente na sección que trata sobre o adestramento de evacuación para a tripulación de voo.

Notas[editar | editar a fonte]

  1. "FedEx on for busiest night; crash inquiry continues". Memphis Business Journal. Consultado o 2019-01-20. 
  2. 2,0 2,1 2,2 2,3 2,4 "Informe do accidente" (PDF). NTSB. Consultado o 2019-1-20. 
  3. Ranter, Harro. "ASN Aircraft accident McDonnell Douglas MD-10F N364FE Memphis International Airport, TN (MEM)". aviation-safety.net. Arquivado dende o orixinal o 03 de novembro de 2012. Consultado o 2019-01-22.