VGTRK

Na Galipedia, a Wikipedia en galego.
VGTRK
Inicio das emisións 10 de decembro de 1990
Propiedade de Goberno federal ruso
País Rusia
Sede central Moscova

Na rede
http://vgtrk.com

VGTRK ou, na súa forma completa, Vserossiiskaia gosudarstvennaia televizionnaia i radioveshchatelnaia kompaniia (ВГТРК ou Всероссийская государственная телевизионная и радиовещательная компания, en galego Compañía Estatal de Televisión e Radio Panrusa) é unha compañía estatal rusa de radiotelevisión organizada como empresa federal unitaria, dende 1998[1], con carácter comercial para exercer as funcións de produtor e distribuídor público de programas de radio e televisión. Estableceuse por decreto do Presídium do Soviet Supremo de Rusia o 14 de xullo de 1990[2].

Historia[editar | editar a fonte]

Sede da GTRK Alania

O 21 de xuño de 1990 o Congreso dos Deputados do Pobo da RSFS de Rusia adoptou unha resolución sobre os medios de comunicación da república ordenándolle ao consello de ministros tomar as medidas necesarias para crear o Comité de Estado de Radio e a Televisión. O 14 de xullo de 1990 o Presídium do Soviet Supremo estableceu no seu canto a Compañía Estatal de Televisión e Radio Panrusa e designou como o seu primeiro presidente a Oleg Poptsov, antigo subdirector de Moskovskije Novosti.

As primeiras emisións foron o 10 de decembro de 1990[3] ao emitir Radio Rossii por algunhas horas ao día. O 13 de maio de 1991[4] comezou a emitir programas televisivos na primeira segunda canle, baixo o nome de RTR, durante seis horas ao día en tres bloques. O 16 de setembro de 1991 ocupou as frecuencias que deixara libre a segunda canle da Televisión Central Soviética ao deixar de emitir.

Servizos[editar | editar a fonte]

Televisión[editar | editar a fonte]

A VGTRK conta con catro canles nacionais principais, que emiten por satélite, cable e no primeiro múltiplex da televisión dixital, e que contan con canles adicionais que transmiten a programación con diferentes horas de atraso para asegurar a transmisión dos programas no horario axeitado nun estado con once fusos horarios.

Canles federais[editar | editar a fonte]

Redactora e cámara realizando unha reportaxe para unha canle de televisón da VGTRK
  • Rossiia 1 é a canle de televisión insignia da compañía, emite principalmente información e mais entretemento. A canle principal transmite á parte europea de Rusia, 48 entidades constitutivas da Federación Rusa. Dende o 31 de decembro de 2018 hai outras 9 canles que transmiten a emisión con entre unha e nove horas de atraso sobre o horario de Moscova.
  • Rossiia K é unha canle que emite información cultural e programas educativos e musicais e que comezou as súas emisións o 1 de novembro de 1997. Conta con tres canles coa emisión en horario atrasado entre 2 e 7 horas.
  • Rossiia-24 é unha canle de información continua, con novas e reportaxes de Rusia e internacionais que comezou as súas emisións o 1 de xullo de 2006 e levou primeiro o nome de Vesti ata o 1 de xaneiro de 2010[5] cando o mudou para o actual.
  • Karusel é unha canle dedicada ao público infantil que se puxo en funcionamento o 27 de decembro de 2010 en colaboración coa canle Pervyi Kanal [6].
Furgoneta da VGTRK

Canles internacionais[editar | editar a fonte]

  • RPR-Planeta é o servizo internacional da VGTRK que se dirixe principalmente á diáspora rusa e á poboación rusófona das antigas repúblicas da URSS. Implantouse o 1 de xullo de 2002[7] e a súa programación está composta principalmente por programas de Rossiia 1 e Rossiia K. A canle principal emite para Europa, e conta con outras tres: RPR-Planeta CIS, RPR-Planeta USA e RPR-Planeta Asia.
  • Karusel International é a versión internacional da canle Karusel, e que transmite para Europa, Estados Unidos, CIS e Asia.

Televisión dixital[editar | editar a fonte]

Ademais de versións en alta definición das principais canles, a VGTRK baixo o nome de televisión dixital emite múltiples canles temáticas[8]:

  • Cinéma, filmes clásicos internacionais.
  • Doktor, programas de medicina.
  • FAN, dedicado a filmes e series de animación.
  • Istoriia, con programas de historia.
  • Komediia, series e filmes de comedia rusos.
  • Mama, dedicado á vida familiar e á crianza de nenos.
  • Moia Planeta, dedicado a programas de viaxes e aventuras.
  • Mult, con debuxos animados rusos para os cativos.
  • Mult Muzika, con cancións e debuxos.
  • Nastoiashchee Strashoe Televidenie, filmes de terror e misterio.
  • Nauka, dedicado ao mundo da ciencia, tanto rusa como internacional.
  • Russkiia Bestseller, series rusas populares.
  • Russkiia Detektiv, filmes policíacos rusos.
  • Russkiia Roman, filmes románticos.
  • Sarafan, canle familiar dedicado á comedia e ao humor.
  • T24, dedicado aos homes, con especial énfase no mundo militar e das armas.
  • Zhivaia Planeta, dedicado á vida salvaxe.

Canles rexionais[editar | editar a fonte]

  • Moskva 24 (Moscova)
  • Moskva Doverie (Moscova)
  • 360° (óblast de Moscova)
  • 360° Novosti (óblast de Moscova)
  • Zapad 24 (Distrito Federal do Noroeste)
  • Lotos 24 (óblast de Astrakán)
  • Pervyi Krymskii (Crimea)
  • Krym 24 (Crimea)
  • Volgograd 24 (óblast de Volgograd)
  • Alania 1 (Osetia do Norte)
  • Kavkaz 24 (Distrito Federal do Cáucaso Norte)
  • NNTV (óblast de Nizhnii Novgorod)
  • Nizhnii Novgorod 24 (óblast de Nizhnii Novgorod)
  • Vtoraia Sadovaia (óblast de Saratov)
  • Samara 24 (óblast de Samara)
  • Bashkortostan 24 (Bashkortostán)
  • Cheliabinsk 24 (óblast de Cheliabinsk)
  • Region Sibir 24 (óblast de Tiumen)
  • Krasnoiarsk 24 (krai de Krasnoiarsk)
  • Iakutiia 24 (Sakha)
  • Vosktok 24 (Distrito Federal do Extremo Oriente)

Radio[editar | editar a fonte]

Emisoras federais[editar | editar a fonte]

  • Radio Rossii, a principal emisora pública rusa de radio, cunha programación variada, de carácter xeral.
  • Radio Maiak, dedicada á información, ao entretemento e á música.
  • Vesti FM, emisora informativa.
  • Kultura, emisora cultural que polo de agora só se difunde en Moscova, na frecuencia 91.6 de FM

Emisoras rexionais[editar | editar a fonte]

  • En Moscova e na súa rexión, en colaboración con Moskva Media contra con tres emsoras rexionais:
    • Moskva FM, programación informativa e de entretemento.
    • Capital FM, información e música en inglés.
    • Radio Moskv, programación informativa e musical.
  • Noutras rexións conta coas emisoras:
    • Heart FM (Barnaul)
    • Volvograd 23 FM (Volvograd)
    • Radio Khroshego Nastroeniia (Khabarovsk)
    • Alania FM (Osetia do Norte)

Cadeas territoriais dependentes[editar | editar a fonte]

Notas[editar | editar a fonte]

  1. Estatutos da VGTRK (en ruso)
  2. Historia da VGTRK. vgtrk.com (en ruso)
  3. A. A. Sherelia (2000) Radiozhurnalistika. Universidade de Moscova
  4. Ellen Propper Mickiewicz e James R Shepley (1999) Changing Channels: Television and the Struggle for Power in Russia. Duke University Press, p. 97
  5. "Мnogolikaia Rossiia". Rossiiskaia Gazeta, 31 de decembro de 2009
  6. "Новый детско-юношеский телеканал "Карусель" начнет вещание 27 декабря". RIA Novosti, 20 de decembro de 2010
  7. "Начинает вещание некоммерческий канал "РТР-Планета"". podrobnsti.ua, 1 de xullo de 2002
  8. "Бренды" Arquivado 05 de xuño de 2020 en Wayback Machine., digitalrussia.tv
  9. "ВГТРК создала региональную телекомпанию в Севастополе". TASS. 19 de xuño de 2017. Arquivado dende o orixinal o 05 de xuño de 2020. Consultado o 05 de abril de 2020. 
  10. "В Крыму и Севастополе откроют отделения ВГТРК". Первый Крымский. 19 de xuño. Arquivado dende o orixinal o 23 de xullo de 2018. Consultado o 05 de abril de 2020.