Víctor Lago Román
Víctor Lago Román | |
---|---|
Placa ao xeneral Víctor Lago Román. Cuartel das Forzas Pesadas, Burgos. | |
Nome completo | Víctor Lago Román |
Nacemento | 13 de agosto de 1919, O Carballiño, Galicia |
Defunción | 4 de novembro de 1982, Madrid |
Fidelidade | Bando sublevado España franquista España |
Rama | Infantaría do Exército de Terra de España División Azul |
Rango | Xeneral de División |
Unidade | División Acoirazada Brunete |
Batallas/Guerras | Guerra civil española Segunda guerra mundial |
Distincións | Medalla da Campaña (1936-1939) Medalla da Campaña de Rusia Gran Cruz ao Mérito Militar con distintivo branco Cruz de Guerra Cabaleiro gran cruz da Orde de San Hermenexildo |
Víctor Lago Román, nado no Carballiño o 13 de agosto de 1919 e finado en Madrid o 4 de novembro de 1982, foi un militar galego, que foi xefe da División Acoirazada Brunete. Morreu asasinado nun atentado de ETA.[1]
Traxectoria[editar | editar a fonte]
Carreira militar durante a guerra e o franquismo[editar | editar a fonte]
Ingresou no Exército o 18 de xullo de 1936 como voluntario. O seu primeiro destino coas tropas do xeneral Franco foi en defensa do Alto del León en Madrid. Máis tarde incorporouse á V Bandeira da Lexión, onde alcanzou os graos de tenente e capitán. En 1940 ingresou na primeira promoción de Transformación, da Academia Xeral de Zaragoza. Ingresou na División Azul e fixo toda a campaña ata 1944. Mandou despois o primeiro tabor do Corpo de Tiradores de Ifni. Participou nas campañas de Ifni e Sáhara. Despois mandou a VII Bandeira do Terzo Sahariano Don Juan de Austria, III da Lexión. Tamén comandou o rexemento Wad Ras.[2]
Carreira militar na democracia[editar | editar a fonte]
O 30 de setembro de 1981 foi nomeado gobernador militar de Madrid e subinspector de tropas e servizos da Primeira Rexión Militar. Ocupando este cargo, o 28 de outubro de 1981, presidiu os consellos de guerra celebrados contra o coronel Álvaro Graíño e o capitán Juan Milan del Bosch y Portolés.[3] As sentenzas dos consellos foron reunidas polo goberno e anuladas polo entón capitán xeneral de Madrid, o tenente xeneral Guillermo Quintana Lacaci, celebrándose uns novos consellos de guerra o 26 de xaneiro de 1982, presididos xa polo novo gobernador militar de Madrid, o xeneral Salvador Portillo Togores. O xeneral Víctor Lago Román foi nomeado xefe da División Acoirazada Brunete número 1. O 23 de setembro de 1981 substituíu no cargo ao xeneral Carbonell, que pasou á situación B ao cumprir a idade regulamentaria. O xeneral Lago Román foi o que ocupou accidentalmente a Capitanía xeneral de Madrid durante o curto período de tempo entre o paso do tenente xeneral Guillermo Quintana Lacaci á situación B e o nomeamento de Ricardo Arozamena Girón como capitán xeneral de Madrid.
Atentado e morte[editar | editar a fonte]
O xeneral Lago Román morreu ametrallado por dous terroristas que usaron unha motocicleta, pouco despois das 8:30 da mañá do 4 de novembro de 1982, na avenida do Arco da Victoria na Cidade Universitaria de Madrid.[4]
Ese día saíu da súa casa, unha vivenda militar situada na rúa Santa Engracia, ás 8.15 horas, vestido de uniforme. Como de costume, non levaba escolta. Subiu ao seu coche oficial, un Seat 131 con matrícula do exército español, número 5.714-1. Ao volante atopábase Juan Carlos Villalba, o soldado condutor. O xeneral instalouse no asento traseiro. O coche dirixiuse cara á Cidade Universitaria. Ás 8:35 unha moto Guzzi ocupada por dúas persoas achegouse desde a dereita, estabilizando a marcha cando se colocou á altura do coche. Un dos motoristas, o acompañante, disparou dous ou tres refachos de metralleta contra o coche. O soldado xirou á esquerda e baixou a cabeza. Uns vinte proxectís perforaron a chapa e pulverizaron os cristais. O xeneral inclinouse sobre o asento no medio dunha gran mancha de sangue. O coche detívose, mentres que a moto fuxiu. Tanto o xeneral como o condutor foron levados ao hospital, estando xa morto o primeiro deles.
O atentado tivo un grande impacto político, non só polo prestixio do xeneral asasinado, senón polo momento escollido, xusto unha semana despois de que o PSOE gañase as eleccións do 28 de outubro e cando Felipe González, presidente electo, non tomara posesión oficial do cargo.[5]
Funerais e enterro[editar | editar a fonte]
No Palacio de Buenavista, sede do exército, tivo lugar a misa corpore insepulto e a entrega de máximas honras militares, como xeneral con mando en praza, aos restos mortais de Víctor Lago Román, que foi decorado postumamente coa Gran Cruz ao Mérito Militar con distintivo branco.[6] Foi enterrado en Pontedeume, de onde era natural a súa muller.[7]
Xuízos e condenados polo atentado[editar | editar a fonte]
Os membros de ETA Henri Parot "Unai" e Juan Lorenzo Lasa Mitxelena "Txikierdi", foron condenados pola Audiencia Nacional o 1 de agosto de 2006 a 50 anos de prisión pola súa participación no atentado cometido polo chamado comando Argala ou itinerante. Parot xa fora condenado a 4.797 anos de prisión por 26 asasinatos. Txikierdi fora condenado a máis de 300 anos de prisión por varios delitos e encarcerado en Francia desde xaneiro de 1985 e en España desde abril de 1992.[8]
Notas[editar | editar a fonte]
- ↑ "Un militar profesional, leal al Rey y a la Constitución". El País (en castelán). Consultado o 1 de xuño de 2020.
- ↑ "Reseña biográfica". ABC (en castelán). Consultado o 1 de xuño de 2020.
- ↑ "El general Lago Román presidirá el consejo de guerra contra Graíño y Milans del Bosch". El País (en castelán). 23 de outubro de 1981. Consultado o 1 de xuño de 2020.
- ↑ "Dos motoristas asesinan al general jefe de la División Acorazada Brunete e hieren gravemente a su conductor". El País (en castelán). Consultado o 1 de xuño de 2020.
- ↑ "Un asesinato más de ETA". El País (en castelán). 8 de novembro de 1982. Consultado o 1 de xuño de 2020.
- ↑ "Sobria emoción y estricta disciplina en las honras fúnebres por el asesinado general Víctor Lago Román". El País (en castelán). Consultado o 1 de xuño de 2020.
- ↑ "El cadáver del general, enterrado en Puentedeume". El País (en castelán). Consultado o 1 de xuño de 2020.
- ↑ "Parot y Txikierdi, condenados a 50 años por asesinar al general Lago". El País (en castelán). Consultado o 1 de xuño de 2020.