A Universidade deDundee é unha universidade situada na cidade de Dundee, Escocia. En 2008 foi proclamada "Universidade Escocesa do Ano" polo xornal británico The Times.[1] En 2011, clasificouse como a primeira no Reino Unido en farmacoloxía e a segunda en odontoloxía, inmediatamente despois de Oxford.[2] A Universidade de Dundee é o destino preferido para estudos científicos (medicina, odontoloxía, economía, enxeñaría) polos estudantes escoceses, mentres que a Universidade de St Andrews é, en xeral, o destino preferido para estudos humanísticos.
En 2012 foi recoñecida por Times Higher Education como a mellor experiencia universitaria de todo o Reino Unido, superando a Oxford e Cambridge.[3][4]
A partir de 2012, as taxas de matrícula subiron a 9.000 libras ao ano, aproximadamente 11.000 euros, en liña coas mellores universidades británicas.[5]
O presidente da universidade foi o famoso actor Brian Cox dende 2010 até 2016. O novo presidente é Mark Beaumont, que deu a volta ao mundo en bicicleta en 194 días e 17 horas.
Despois de ser fundada en 1881, a Universidade de Dundee foi durante a maior parte da súa existencia unha facultade constituínte da Universidade de St Andrews, xunto co United College e o St Mary's College, ambos situados en St Andrews. Crecendo gradualmente en tamaño e prestixio, obtivo a súa independencia en 1967, mantendo as mesmas tradicións e o mesmo sistema administrativo que a universidade da que descendía.
