Universidade de Dole
| Universidade de Dole | |
|---|---|
| Datos xerais | |
| Localización |  Franco Condado Francia |
| Datos actuais | |
| Datos de contacto | |
| [ editar datos en Wikidata ] | |
A Universidade de Dole foi unha universidade fundada para as dúas Borgoñas (condado e ducado), en 1423 na vila de Dole, a capita
l do condado de Borgoña, polo duque Filipe o Bo. Tras a conquista do Franco Condado en 1678, o rei Lois XIV fixo trasladar a universidade, en 1691, a Besançon, a nova capital, co novo nome de Universidade de Franco Condado.[1]
Historia
[editar | editar a fonte]Xa en 1287, o conde Otón IV, fundara unha pequena estrutura universitaria na vila de Gray, na rexión francesa de Borgoña-Franco Condado.[2]
Pero non foi ata 1423 cando Filipe III de Borgoña fundou unha grande universidade á imaxe doutras existentes en Europa, para cuxa localización escolleu Dole, a capital do Ducado de Borgoña, en lugar de Dijon, que era a capital do ducado, cidade esta última que, malia non chegar a ter universidade propia ata 1722, contaba xa, no entanto, con numerosas escolas de moita sona. Esta elección explícase fundamentalmente pola súa situación xeográfica central con respecto aos dous territorios borgoñóns.
A primeira sede da nova universidade foi a antiga capela de San Xurxo, sita na actual Grande-rue, e posteriormente trasladouse ao convento carmelita, preto do actual xardín Granvelle. En 1437, instituíuse unha facultade de Teoloxía.
A Universidade de Dole converteuse axiña nunha das universidades máis prestixiosas de Europa, particularmente debido á boa reputación da súa ensinanza do dereito canónico e do dereito civil.
Dous anos despois do asedio da cidade de Dole de 1479, o rei Lois XI ordenou o traslado da universidade inicialmente a Besançon e máis tarde a Poligny, ata que Carlos VIII a fixou novamente en Dole en 1484.
No lindeiro entre os séculos XV e XVI, Antoine de Roche fundou o Colexio de San Xerome, na actual rúa Aristide Briand, para o acollemento dos estudantes tanto estranxeiros como procedentes do Franco Condado.
En 1562, Dole contaba con 268 alumnos, dos cales 45 eran do Franco Condado e 223 proviñan doutros países. Á parte dos profesores locais, habíaos tamén flamengos e italianos, o que dá conta da reputación internacional desta univarsidade a finais da Idade Media.
En 1613, os profesores desexaban transformar a súa universidade tomando como referencia os estatutos das de Lovaina e Douai. Para tal efecto, enviaron un emisario ao duque, que residía en Bruxelas, para facer a solicitude, que se concedeu a través de varios editos entre 1616 e 1618. No entanto, esta transformación non era do gusto dos estudantes do Franco Condado, que se opuñan abertamente, e estes abandonan durante un tempo a universidade.[3] O resultado deste episodio é descoñecido, aínda que é probable que tales editos non se chegasen a aplicar nunca.
En 1691, o rei Lois XIV, nova máxima autoridade do Franco Condado ao pasar este a soberanía francesa, trasladou a universidade a Besançon, a nova capital da rexión. A actual Universidade de Franco Condado é, pois, hereditaria da primitiva Universidade de Dole.[4]
Personalidades relacionadas
[editar | editar a fonte]
Reitores
[editar | editar a fonte]A lista non é exhaustiva:[5]
- Peter Phoenix (1524)
- Richard Receptor (1540)
- Pierre Mercier (1541)
- Raimond Chosal (1542)
- Louis Chavirey (1543)
- John Eck (1545)
- Guillaume Maertenne (1546)
- Christophe Mellinger (1547)
- Stephen Mairot (1550)
- John Lalemand (1552)
- Thierry Vanderkarck (1553)
- Mathieu Stainberger (1554)
- Jean de Marnix (1557)
- Jean-Jacques de Lamberg (1581)
- Jean-David Kalkenriedt (1605)
- Claude Bassand (1607)
- Marquardt Aw (1608)
- Gilles de Calenelle (1609)
- Séverin Kreitmayer (1610)
- Vandelin-Simon Vuillin (1611)
- Claude Baguinet (1612)
- Claude Maillot (1613)
- Charles Moscon (1615)
- Maximiliano Zwanger (1616)
Alumnos salientables
[editar | editar a fonte]
- Heinrich Cornelius Agrippa (1486-1535). Astrólogo e alquimista.[6]
- Viglius Van Aytta (1507-1577). Xurista holandés doutorado en 1526.
- Otto Truchsess von Waldburg (1514-1573), bispo de Augsburgo e de Palestrina.
- Balthasar Gérard (1557-1584), autor do asasinato de Guillerme I de Orange-Nassau.
- Jean-Baptiste Besard (1567-1625?), avogado, médico e compositor para laúde.
Notas
[editar | editar a fonte]- ↑ Historia da Universidade de Dole. Sitio web oficial da Universidade de Franco Condado (en castelán)
- ↑ Carta fundacional da Universidade de Gray. Arquivo Municipal de Gray.
- ↑ Feingold, Mordechai (ed.). Histoire des Universités Vol. XVIII / 2, Oxford University Press. Oxford, 2003. Páxinas 41-42 (en francés)
- ↑ Frasquin. Notes Topopgraphiques et Historiques sur la Ville de Dole. Dole, 1822 (en francés)
- ↑ Arquivos municipais de Besançon, Acta rectorum et matricula Universitatis Dolanae... (508 a 1004).
- ↑ Philippe Thiéfaine. Anima mundi, Agrippa à Dole, Les Éditions de la Passerelle. Dole, 2010 [ISBN 978-2953204636] (en francés)
Véxase tamén
[editar | editar a fonte]Bibliografía
[editar | editar a fonte]- Beaune, H; De Arbaumont, J. Les Universités de Franche-Comté: Gray, Dole, Besançon. Marchand. Dijon, 1870 (en francés)
- Jacques Heers, Louis XI. Perrin. París, 2003. Páxina 389 (en francés)
- Theurot, J. "L'Université de Dole de sa fondation à son fils transfert à Besançon". En Gresset, M.; Lassus. F. (dir.). Institutions et vie universitaire dans l'Europe d'hier et d'aujourd'hui. Actas do Coloquio da Asociación Interuniversitaria do Leste de París, 1991. Páxinas 25-44 (en francés)