Terra Galega
| Terra Galega (Tega) | |
|---|---|
| Partido político de Galiza | |
| Dirixentes e organización | |
| Líder | Guillermo Sánchez Fojo (Presidente) Pablo Padín (Presidente de honra) |
| Historia | |
| Fundación | 4 de novembro de 2005 |
| Posicións políticas | |
| Ideoloxía | Galeguista Centrismo progresista |
| Representación | |
| Representación | sen representación parlamentaria |
| Concelleiros | 10 / 3.766 |
| Alcaldes | 1 / 313 |
| Outros datos | |
| Sede | Vigo |
| Publicación | www.maisgalicia.eu/ |
| Na rede | |
| http://www.terragalega.eu | |
   | |
Terra Galega (Tega) é un partido político de centro progresista e galeguista que se formou o 4 de novembro de 2005, aínda que está rexistrada dende maio dese ano.
Historia[editar | editar a fonte]
Xurdiu da unión do Centro Democrático Independiente (CDI), Iniciativa Galega, Coalición Galega, Unidade por Narón e algunhas outras pequenas forzas locais que sumaban 4 alcaldes e 64 concelleiros en 32 concellos galegos; os estatutos de Terra Galega permiten a existencia de partidos federados no seu seo. No ano 2010 sufriu unha forte escisión, na que o seu Secretario Xeral Xoán Gato e gran parte da militancia abandonaron o partido para incluírse na formación Converxencia Galega.[1]
Celebrou o Congreso Constituínte o 20 de maio de 2006 coa participación de 500 compromisarios que elixiron a Pablo Padín, exconselleiro de sanidade, como presidente e a Xoán Gato, alcalde de Narón, como coordinador xeral. Guillermo Sánchez Fojo foi elixido como Vice-Coordinador Zona Norte, Xosé Luis Vilas Martín como Vice-Coordinador Zona Sur, Marian Ferreiro Díaz como Coordinadora Nacional da Mocidade. As xuventudes do partido reciben o nome de Mocidade de Terra Galega.
En outubro de 2006 Unión Ourensana integrouse na coalición e tamén 6 dos doce concelleiros do Partido Popular de Galicia en Arteixo. Nas eleccións municipais de 2007 presentou 63 candidaturas, sobre todo na provincia da Coruña, e acadou 66 concelleiros. O 12 de xullo de 2008 celebrou o seu II Congreso, no que Pablo Padín saíu reelixido presidente e Xermán Tobío novo secretario xeral[2]. Non obstante, o sector liderado por Xoán Gato impugnou o Congreso e conseguiu que, o 23 de agosto seguinte, o xulgado suspendese de forma cautelar os acordos tomados no mesmo, co que este recuperou o seu cargo de coordinador xeral [3]. A Xunta Electoral permitiu a Xoán Gato presentarse ás eleccións autonómicas levando as siglas de Tega, tendo que ir o outro sector do partido nunha coalición co Partido Galeguista chamada Máis Galicia.
O 27 de marzo de 2009 a xustiza deu a razón a Tobío e a Padín, desestimando a demanda presentada por Xoán Gato e outros. O sector de Xoán Gato convocou unha asemblea para o 25 de abril, para acordar se se integran no partido Terra galega ou forman un novo[4]. Finalmente, en setembro de 2010 celébrase a asemblea constituínte de Converxencia Galega, o novo partido de Xoán Gato. No III Congreso celebrado o 10 de marzo de 2012 elixiu como secretario xeral a Guillermo Sánchez Fojo quedando Pablo Padín como presidente de honra [5].
Resultados electorais[editar | editar a fonte]
En 2007 nas súas primeiras municipais obtiveron 3 alcaldías e 66 concelleiros, mellorando en 2 concelleiros os anteriores resultados dos membros da coalición situándose como cuarta forza política por enriba de EU. Os membros da coalición en 2003 tiñan: 24 concelleiros(CDI), 15(IG), 13(UN) e 12(CG).
En 2009 situáronse como quinta forza política detrás de UPyD.[Cómpre referencia]
En 2011 obtiveron 1 alcaldía e 23 concelleiros.
Nas municipais de 2015 quedaron no sexto posto, cun total de 29 concelleiros e o 0,97 % do voto galego total, xusto por detrás da candidatura galeguista socialdemócrata: Compromiso por Galicia.
Notas[editar | editar a fonte]
- ↑ "Copia arquivada". Arquivado dende o orixinal o 24 de setembro de 2015. Consultado o 29 de abril de 2011.
- ↑ Pablo Padín revalida a presidencia no Congreso de Terra Galega, Vieiros 13 de xullo de 2008
- ↑ La Voz de Galicia, 24 de agosto.
- ↑ O grupo de Gato decidirá o 25 de abril se crea un novo partido Arquivado 02 de abril de 2009 en Wayback Machine., A Nosa Terra.
- ↑ Terra Galega elixe a Guillermo Sánchez Fojo como secretario xeral no III congreso Arquivado 04 de marzo de 2016 en Wayback Machine., Galicia Hoxe, 11 de marzo de 2012
