Susan Dimock
  | |
| Biografía | |
|---|---|
| Nacemento | 24 de abril de 1847 Washington, Estados Unidos de América (pt)  |
| Morte | 7 de maio de 1875 (28 anos) |
| Causa da morte | Naufraxio (Afogamento ) |
| Datos persoais | |
| País de nacionalidade | Estados Unidos de América |
| Educación | Universidade de Zúric - doutor em medicina (pt) (–1871) |
| Actividade | |
| Ocupación | médica , xinecóloga |
Susan Dimock, nada en Washington (Carolina do Norte, EEUU) o 24 de abril de 1847 e finada na costa das illas Scilly (Inglaterra) o 7 de maio de 1875, foi unha pioneira da medicina estadounidense que recibiu a súa cualificación como médica na Universidade de Zúric en 1871 e posteriormente foi nomeada médica residente do Hospital de Nova Inglaterra para Mulleres e Nenos, agora coñecido como o Dimock Community Health Center, e que foi renomeado na súa honra despois do seu afogamento tráxico en 1875. Dimock viaxaba a Europa por traballo e vacacións cando morreu no naufraxio do SS Schiller na costa das illas Scilly. Tamén é lembrada por converterse na primeira muller membro da Sociedade Médica de Carolina do Norte.
Traxectoria[editar | editar a fonte]
Infancia[editar | editar a fonte]
Susan Dimock naceu en Washington, Carolina do Norte, filla de Henry e Mary Malvina (de solteira, Owens) Dimock. A familia descendía de Thomas Dimock que emigrou de Inglaterra a Dorchester, Massachusetts en 1637 e máis tarde reasentouse en Barnstable, Massachusetts. Susan Dimock era curmá afastada de Ira Dimock (1827-1917), un fabricante de seda, e tamén estaba emparentada con Henry F. Dimock, un avogado da cidade de Nova York asociado cos intereses empresariais da familia Whitney. O seu pai, que era nativo de Limington, Maine, foi nomeado director da Roxbury High School en 1831 aínda que era totalmente autodidacta; máis tarde trasladouse a Carolina do Norte, onde ensinou na escola, estudou dereito e serviu como editor do North State Whig. A súa esposa Mary era tamén mestra e complementaba os seus ingresos administrando un hotel.[1]
Despois de que o pai de Dimock morrese en 1863, Susan Dimock foi educada en casa pola súa nai. Ao final da guerra civil estadounidense mudouse coa súa nai a Sterling, Massachusetts, onde asistiu a unha escola de nenas e levou a cabo unha exhaustiva lectura de cada libro de texto médico que podía pedir prestado. No outono de 1865 ela ensinou na escola en Hopkinton, Massachusetts. O 10 de xaneiro de 1866, entrou no Hospital de Nova Inglaterra para Mulleres e Nenos, onde comezou a aprender medicina mediante unha estreita observación nas salas e o dispensario. Tamén se lle permitiu a asistir a roldas clínicas no Hospital Xeral de Massachusetts así como ás da Enfermaría de Ollos e Oídos.[1]
Carreira[editar | editar a fonte]
Cando a súa solicitude para inscribirse na facultade de medicina de Harvard foi rexeitada, Dimock dirixiuse ás facultades de medicina de Europa e foi admitida na Universidade de Zúric en Suíza en 1868. Graduouse con honras en 1871 e a súa tese foi publicada ese ano en Zúric. Os últimos anos dos seus estudos viviu coa familia da súa amiga Marie Heim-Vögtlin, onde se sentiu moi feliz.[2] A pesar da súa mala situación financeira, decidiu ir a Viena xunto coa súa compañeira de estudos de medicina de Zúric, Marie Bokowa, durante uns meses, onde coñeceu a Auguste Forel e a C. E. Hoestermann. Os catro chamáronse a si mesmos o "Wiener Quartett" (Cuarteto de Viena) e planeaban reunirse novamente en xullo de 1875 en Zúric.[3]
Despois dos seus estudos clínicos en Viena e París, volveu aos Estados Unidos. Como a Sociedade Médica de Carolina do Norte estaba constituída unicamente por homes e só se lle outorgaría unha membresía honoraria, Dimock incorporouse ao Hospital de Nova Inglaterra para Mulleres e Nenos, onde foi nomeada médica residente o 20 de agosto de 1872. Ela mellorou e aumentou o servizo do hospital, no curso do cal abriu a primeira escola de enfermaría nos Estados Unidos o 1 de setembro de 1872. Traballou como cirurxián, desenvolveu unha práctica privada en obstetricia e xinecoloxía e realizou unha serie de operacións cirúrxicas importantes, algunhas das cales foron mencionadas nas revistas médicas da época.[1]
Falecemento[editar | editar a fonte]
Desde había moito tempo Dimock quería volver visitar Europa, tivo a oportunidade de facelo en maio de 1875; Dimock e dúas das súas amigas máis próximas —Caroline Crane e Elizabeth "Bessie" Greene (filla do reformador William Batchelder Greene)- abordaron o vapor SS Schiller, desde Nova York a Plymouth e Hamburgo. O 7 de maio de 1875, Dimock, Greene e Crane estaban entre as 336 persoas que perderon a vida cando o SS Schiller golpeou o Retarrier Ledges das illas Scilly preto do faro Bishop Rock.[1] Dimock tiña 28 anos.
A súa lápida no cemiterio Forest Hills, en Boston, di: «Susan Dimock, cirurxián e médica do Hospital de Mulleres e Nenos de Nova Inglaterra, perdida no vapor Schiller, nas illas Scilly, o 8 de maio (sic) de 1875».
En 1939 o Departamento de Conservación e Desenvolvemento de Carolina do Norte erixiu un marcador histórico na súa honra.
En 1996, a pedra de mármore orixinal foi trasladada de Boston ao cemiterio da igrexa episcopal de San Pedro en Washington, Carolina do Norte, debido a que un grupo en Boston decidiu substituílo cunha réplica de granito.
Notas[editar | editar a fonte]
- ↑ 1,0 1,1 1,2 1,3 The National Cyclopaedia of American Biography, Vol. XIX, p. 30. Nova York: James T. White & Company, 1926.
- ↑ Müller, Verena E. (2008). Marie Heim-Vögtlin – die erste Schweizer Ärztin (1845–1916): Ein Leben zwischen Tradition und Aufbruch (en alemán) (2ª ed.). hier+jetzt Verlag. ISBN 978-3-03919-061-4, p.155
- ↑ Hans H. Walser (ed.) (1968). August Forel: Briefe. Correspondance 1864 - 1927 (en alemán, parcialmente en francés). Verlag Hans Huber, Berna, pp. 82, 85, 487
Véxase tamén[editar | editar a fonte]
Ligazóns externas[editar | editar a fonte]
- Mass Moments - Dr Susan Dimock begins residency, 20 de agosto de 1872. (en inglés)
- Susan Dimock M.D. (en inglés)
- 1875 Memoir of Susan Dimock reviewed by Cabinet of Art and Medicine. (en inglés)
- Ueber die verschiedenen formen des puerperalfiebers : Nach Beobachtungen in der Züricher Gebäranstalt. Thesis (Dr. med.)--Universität Zürich, 1871. Arquivado 26 de febreiro de 2013 en Wayback Machine.
- Harvard University. Corporation. Committee on Admitting Women to the Medical School. Report 1867. Mar 23. HUA. Call no HUG 4823.72 (en inglés)
- Transactions of the Nineteenth Annual Meeting of the Medical Society of the State of North Carolina, held at New Bern, N.C., May 1872, pp. 10-12 (en inglés)
