Soledad Becerril

Soledad Becerril
Nome completo	Soledad Becerril Bustamante
Nacemento	16 de agosto de 1944
	Madrid
Nacionalidade	España
Alma máter	Universidade de Madrid e Universidade de Columbia
Ocupación	política e catedrática
Premios	Grand Cross of the Order of Charles III, Medalla de Andalucía, Gran Cruz da Orde de San Raimundo de Peñafort e Grand Officer of the Order of Merit of the Italian Republic
[ editar datos en Wikidata ]

María Soledad Becerril Bustamante Marquesa consorte de Salvatierra, nada en Madrid o 16 de agosto de 1944, é unha política (UCD e PP) e profesora española. En 1981 foi nomeada ministra de Cultura, converténdose na primeira muller que ocupou unha carteira ministerial dende a Segunda República. En 2012 foi tamén a primeira muller que ocupou o cargo de defensora do Pobo.

Traxectoria

Soledad Becerril é filla de Enrique Becerril y Antón-Miralles e da súa dona, María Bustamante y Polo de Bernabé. É a máis nova de catro irmáns.

Licenciada en Filosofía e Letras, especializada en filoloxía inglesa pola Universidade de Madrid, completou os seus estudos na Universidade de Columbia. Foi profesora na Universidade de Sevilla. Fundou en Sevilla a revista de información andaluza La Ilustración Regional, da que foi conselleira delegada. En 1974, ingresou na Federación de Partidos Demócratas y Liberales, integrándose despois no Partido Demócrata de Andalucía que posteriormente se integrou na Unión de Centro Democrático. Foi elixida deputada nas eleccións xerais de 1977 pola UCD. Nas cuart, quinta e sexta lexislaturas foi elixida deputada polo Partido Popular. Formou parte da comisión encargada de redactar o Estatuto de Autonomía de Andalucía.

Durante a primeira lexislatura foi nomeada por Leopoldo Calvo-Sotelo ministra de Cultura en decembro de 1981, sendo a primeira muller que accedeu ao Consello de Ministros dende a Segunda República, cando foran Federica Montseny e, xa no exilio, Victoria Kent. Permaneceu no cargo ata decembro de 1982, cando tomou posesión o primeiro goberno de Felipe González.

Foi alcaldesa de Sevilla dende 1995 a 1999 e en 2004 foi elixida senadora pola provincia de Sevilla e en 2008, deputada pola circunscrición electoral de Sevilla.

O 29 de xuño de 2012 foi designada para o cargo de defensora do pobo, sendo a primeira muller escollida para este posto. En xuño de 2017 anunciou a súa renuncia tras cinco anos no cargo, que se fixo efectiva o 21 de xullo.

Cargos desempeñados

• Deputada por Sevilla no Congreso dos Deputados (1977-1982).
• Ministra de Cultura de España (1981-1982).
• Deputada por Sevilla no Congreso dos Deputados (1989-1996).
• Tenente de alcade de Sevilla (1991-1995).
• Alcaldesa de Sevilla (1995-1999).
• Deputada por Sevilla no Congreso dos Deputados (2000-2004).
• Vicepresidenta terceira do Congreso dos Deputados (2000-2004).
• Senadora por Sevilla (2004-2008).
• Deputada por Sevilla no Congreso dos Deputados (2008-2011).
• Defensora do Pobo de España (2012-2017).

Distincións honoríficas

• Dama Gran Cruz da Orde de Carlos III (2-12-1982).
• Gran Oficial da Orde ao Mérito da República Italiana (2-6-1999).
• Medalla de Ouro de Andalucía (21-2.2006).
• Dama Gran Cruz da Orde de San Raimundo de Peñafort (16-6-2017).
• Premio Manuel Clavero (23-5-2018).

Véxase tamén

Ligazóns externas

• Ficha persoal do Senado de España.
• Concesión da Medalla de Andalucía no Boletín Oficial da Junta, 21 de febreiro de 2006