Serhii Bubka
Serhii Nazarovych Bubka, (en ucraíno: Сергій Назарович Бубка, en ruso: Сергей Назарович Бубка), nado en Voroshilovgrad o 4 de decembro de 1963 é un exatleta ucraíno especializado en salto con pértega. Está considerado como o maior deportista na historia da especialidade, destacando as seis vitorias consecutivas no Campionato Mundial de Atletismo, a medalla de ouro nos Xogos Olímpicos de 1988 e os 35 récords mundiais (17 ao aire libre e 18 en recintos pechados).[1]
Traxectoria[editar | editar a fonte]
Bubka comezou a destacar nas competicións locais nas mans do adestrador Vitaly Petrov, primeiro cun salto de 2,70 metros aos 11 anos e logo superando os cinco metros con 16 anos. Saltou á fama internacional en 1981 cando foi sétimo no Campionato Europeo Júnior. Nese momento o seu potencial causou admiración e de feito, a pesar de clasificarse oitavo no campionato nacional, o adestrador do equipo soviético, Igor Ter-Ovanessian, incluíuno na selección que ía participar no primeiro Campionato Mundial de Atletismo, en Helsinqui, en 1983.
En Helsinqui conseguiu o campionato cun salto de 5,70 m. A partir de aí, empeñouse en demostrar que non lograra o título de casualidade e mellorou ano tras ano. En 1984 logrou o seu primeiro récord mundial, baixo teito, cunha marca de 5,81 metros, que logo superou en tres ocasións. Ao aire libre marcou 5,85 m, e superouno catro veces. Nese ano bateu nove récords mundiais en total.
Por mor do boicot do bloque comunista aos Xogos Olímpicos dos Ánxeles tivo que esperar catro anos para gañar a súa primeira medalla olímpica. Asemade, gañou todos os campionatos do mundo ata 1997.
A hexemonía de Bubka parecía inapelable. En competición en recinto pechado, o francés Thierry Vigneron bateu o seu récord en 1984 cunha marca de 5,91 m, superior nun centímetro. Porén, dez minutos despois, Bubka mostrou o seu poderío chegando tres centímetros máis alto e deixando segundo o francés.
As lesións comezaron a prexudicar o saltador e, na súa última competición, o seu principal obstáculo foi o seu tendón de Aquiles. Abandonou o atletismo en 2001, aos 37 anos.
Bubka é vicepresidente sénior da International Association of Athletics Federations (IAAF) dende 2007, e presidente do Comité Olímpico de Ucraína dende 2005. É membro honorario do Comité Olímpico Internacional.
Notas[editar | editar a fonte]
- ↑ "Bubka says farewell". BBC (en inglés). 4 de febreiro de 2001. Consultado o 19 de agosto de 2010.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Serhii Bubka  |
Ligazóns externas[editar | editar a fonte]
- IAAF profile for Sergey Bubka
- Interview with Sergey Bubka on BBC World News
- Magazine article tracing Bubka's career
- A small video with the highlights of Bubka's career
- Masters T&F Pole Vault All-Time Rankings Arquivado 16 de febreiro de 2020 en Wayback Machine.
- ESPN bio
- Atletas olímpicos de Ucraína
- Nados en Luhansk
- Nados en 1963
- Medallistas olímpicos en atletismo
- Medallistas olímpicos de ouro pola Unión Soviética
- Medallistas nos Xogos Olímpicos de 1988
- Premios Princesa de Asturias dos Deportes
- Atletas nos Xogos Olímpicos de 1988
- Atletas nos Xogos Olímpicos de 1992
- Atletas nos Xogos Olímpicos de 1996
- Atletas nos Xogos Olímpicos de 2000
- Atletas olímpicos da Unión Soviética
- Atletas olímpicos do Equipo Unificado
- Saltadores con pértega