Eutelo, papa

Na Galipedia, a Wikipedia en galego.
(Redirección desde «Santo Outelo»)
Eutelo
AlcumeSanto Eutelo
Nacementovalor descoñecido
Lugar de nacementoNicópolis
Falecemento189 e 185
Lugar de falecementoOuteiro Vaticano
Relixióncatolicismo
Ocupaciónsacerdote católico
Períodoentre os anos 174-189
Coñecido porser o papa n° 13 da igrexa católica
OrganizaciónIgrexa católica
CargosBispo de Roma
Na rede
Find a Grave: 76977229 Editar o valor em Wikidata
editar datos en Wikidata ]

Eutelo[1], tamén Eleuterio[1], Eutel[1] ou Outelo[2], chamado logo santo Eutelo, santo Eleuterio ou Santoutelo, nado quizais en Nicópole (Mesia) e morto posiblemente en Roma en 189, foi bispo cristián desa diocese entre os anos 174 e 189.

Vida e pontificado[editar | editar a fonte]

Non se coñece moito da vida de Eutelo. Aparentemente foi diácono en Roma nos tempos dos papas Aniceto e Sotero. Sábese que tivo unha xuntanza con Ireneo de Lión en Roma, onde o galorromano lle pedía que tomase medidas contra o montanismo e sobre o dano que esta corrente lle estaba facendo aos cristiáns, aumentando as súas persecucións. Foi durante o papado de Eutelo cando Ireneo publicou a súa obra Adversus haereses (Contra os herexes), onde estuda os distintos movementos fóra da ortodoxia romana e que serve de referencia cronolóxica para os primeiros pontificados (ata o de Eutelo, precisamente). Tamén se xuntou con Eutelo para debater a cuestión montanista o bispo Abercio de Hierápole.

Dise no Liber pontificalis e recólleo tamén Beda o Venerable que o rei británico Lucio lle pediu o envío de misioneiros a Gran Bretaña; o papa houbo de enviar a San Damián e a San Fugacio, que bautizaron o monarca e parte da corte. Porén, os especialistas da historia do cristianismo na illa rexeitan a historicidade destes feitos. O teólogo Adolf von Harnack apuntou porén que se producira unha confusión na lectura do Liber pontificalis e que en realidade se refería a unha petición de misioneiros realizada polo reino oriental de Edesa, daquela chamado Britio.

Tamén se lle atribúe a Eutelo a eliminación das restricións alimentarias dos cristiáns, que herdaran dos xudeus.

Morte e santidade[editar | editar a fonte]

Como todos os papas anteriores ao edicto de Milán, foi considerado santo. Tamén se ten sinalado que foi mártir, se ben isto non está demostrado. Soterrado no outeiro Vaticano, posteriormente os seus restos foron levados á igrexa de San Xoán da Piña, preto do Panteón. En 1591 os seus restos movéronos de novo, desta vez á igrexa de Santa Susana, por petición de Camilla Peretti, a irmá de Sisto.

A súa festa é o 26 de maio.

Iconografía[editar | editar a fonte]

Santo Eutelo aparéceselle ao reverendo Timothy Lovejoy no episodio Cremos en Marge da serie de debuxos animados The Simpsons: falando dende a imaxe dunha vidreira, o santo pídelle ao reverendo que corrixa a apatía cara á súa parroquia [3].

Parroquias en Galicia[editar | editar a fonte]

Só existe unha parroquia en Galicia baixo a avogación de santo Eutelo: a de Tella, en Ponteceso.

Crenzas en Galicia[editar | editar a fonte]

Santo Outelo é o santo avogoso para protexer e curar ás xentes que foron trabadas por un can doente ou sospeitoso de selo. De feito, o cinamomo (Melia azedarach) chámase tamén árbore da rabia e árbore de Santo Outel ou árbore de Santo Outelo porque se considera que cura a enfermidade mediante unha infusión feita coa casca, as follas e as flores e o rezo de ensalmos coma estes [4]:

  • Can da rabia,/ tente en ti,/ que o San Alauterio/ está no medio de min e de ti.
  • Detente, can doente,/ como Dios se tuvo en si./ San Outeliño bendito/ no medio de min e de ti.

En Celas de Peiro (Culleredo) teñen o Santo Outelo por padroeiro dos cans. Alí béicense estes animais canda a festa, que celebran en abril[5].

Notas[editar | editar a fonte]

  1. 1,0 1,1 1,2 "Guía de nomes galegos". Real Academia Galega. Consultado o 2023-09-18. 
  2. Eladio Rodríguez González (1958-1961): Diccionario enciclopédico gallego-castellano, Galaxia, Vigo
  3. The Simpsons. Oitava tempada, episodio 22. Guión do episodio en The Simpsons Archive Arquivado 30 de outubro de 2007 en Wayback Machine.
  4. Xesús Ferro Ruibal, 259.
  5. "Celas celebrou o San Outelo | Concello de Culleredo". www.culleredo.es. Consultado o 2021-03-21. 

Este artigo tan só é un bosquexo
 Este artigo sobre Papas é, polo de agora, só un bosquexo. Traballa nel para axudar a contribuír a que a Galipedia mellore e medre.
 Existen igualmente outros artigos relacionados con este tema nos que tamén podes contribuír.