Reforma Democrática

Reforma Democrática
Instancia de partido político español
Posición política dereita política
Persoas e organizacións
Presidente/a Manuel Fraga
Datas
Fundación / creación 1976  Disolución / destrución 1977
Localización
Sede Madrid  Área de operación España  País España
Identificadores
VIAF 129724295
Wikidata

Reforma Democrática (RD) foi unha efémera asociación política (protopartido) española de ideoloxía conservadora. Foi fundada en 1976 por diversas personalidades procedentes da ala moderada e tecnócrata do franquismo e participou no proceso de constitución de Alianza Popular, disolvéndose ao ano seguinte (1977).

Antecedentes

Ao abeiro da Lei de Asociacións Políticas aprobada polas Cortes franquistas en 1974, que autorizaba por primeira vez a creación de estruturas de participación política (as asociacións políticas) fieis aos principios do Movemento Nacional, diferentes sectores moderados do réxime organizáronse baixo a dirección de Manuel Fraga Iribarne co obxectivo de constituír unha formación política de carácter conservador orientada cara a unha reforma limitada do sistema franquista.

Para ese fin constituíuse en Madrid a sociedade anónima Gabinete de Orientación y Documentación (Godsa), cuxa actividade se concretou, entre outras iniciativas, na elaboración do Libro Blanco para la Reforma Democrática e no Llamamiento para una Reforma Democrática. Ambos documentos constituíron a base da asociación política Reforma Democrática, inscrita no Rexistro de Asociacións Políticas do Ministerio do Interior en outubro de 1976.

Reforma Democrática e Alianza Popular

O 29 de decembro dese mesmo ano (1976) celebrouse o I Congreso Nacional de Reforma Democrática, no que se aprobou a integración de RD en Alianza Popular e se elixiu o Comité Executivo Nacional, sendo elixido presidente Manuel Fraga Iribarne e secretario xeral Carlos Argos García.

En paralelo ao despregamento de Reforma Democrática, o contorno de Manuel Fraga estableceu contactos con outros sectores afíns dos cadros dirixentes moderados do franquismo, entre os cales se contaban exministros como Laureano López Rodó ou Federico Silva Muñoz. Estes contactos, que culminaron na creación de Alianza Popular, dividiron os integrantes de RD, algúns dos cales—como Gabriel Cisneros—, abandonaron o proxecto en rexeitamento á perspectiva de integración con outros grupos da dereita franquista.

Os días 5, 6 e 7 de marzo de 1977 celebrouse o Congreso constituínte de Alianza Popular, froito da converxencia e fusión de Reforma Democrática con outras iniciativas semellantes. Neste Congreso disolvéronse a maioría das asociacións políticas participantes, incluída Reforma Democrática, na Federación de Partidos de Alianza Popular.

Personalidades relacionadas con RD

• Manuel Fraga Iribarne, exministro de Información e Turismo, fundador e dirixente de Alianza Popular (secretario xeral e presidente) e do Partido Popular (expresidente), relator da Constitución de 1978, expresidente da Xunta de Galicia, senador e Presidente Fundador do Partido Popular.

• Rita Barberá Nolla, exalcaldesa de Valencia entre 1991 e 2015 e exsenadora.

• Gabriel Cisneros, relator da Constitución de 1978, dirixente de UCD, o Partido Liberal e o Partido Popular.

• Francisco Álvarez Cascos, exsecretario xeral de Alianza Popular, exministro de Fomento, exvicepresidente do Goberno.

• Rafael Pérez Escolar, exconselleiro de Banesto e xuíz en excedencia.

• Juan de Arespacochaga, alcalde de Madrid entre 1976 e 1978, senador por designación real en 1977 e posterior membro de Alianza Popular.

• Jorge Verstrynge, ex-vicesecretario de acción territorial de RD e un dos seus fundadores.