Real Filharmonía de Galicia

Na Galipedia, a Wikipedia en galego.
Real Filharmonía de Galicia
Auditorio de Galicia.jpg
Auditorio de Galicia
Alcume RFG
País Galicia Galicia
Cidade Santiago de Compostela
Teatro Auditorio de Galicia
Anos de actividade Dende 1996
Tipo de formación Orquestra filharmónica
Xénero Música sinfónica, ópera
Enderezo Av. Burgo das Nacións, s/n
15705 Santiago de Compostela
Membros actuais Paul Daniel (director)
Christoph König (principal director convidado)
Circunstancias de creación
1996
Efectivo ~50 músicos
Sitio web Sitio web oficial

A Real Filharmonía de Galicia é unha orquestra filharmónica con base en Santiago de Compostela. Comezou a súa andaina en febreiro de 1996 cun concerto dirixido polo mestre Helmuth Rilling. Actualmente o seu director principal é Paul Daniel. Ten a súa sede no Auditorio de Galicia, onde presenta a súa tempada de concertos.

Historia[editar | editar a fonte]

A Real Filharmonía de Galicia naceu en 1996, sendo o seu primeiro director Helmuth Rilling, que traballou partindo do repertorio sinfónico clásico austro-alemán. Tralas súas actuacións en 1996 no Auditorio Nacional en Madrid, e en 1997 na Coruña, Valencia e León, a orquestra realizou unha xira por Europa en xaneiro de 1998 con concertos en Alemaña e Austria baixo a dirección de H. Rilling, sendo acompañada polo coro Gächinger Kantorei de Stuttgart. As Estacións de J. Haydn e O Mesías de Haendel, na versión de Mozart, foron interpretados ante máis de 7.000 espectadores. No peche da xira, a Real Filharmonía de Galicia converteuse na primeira orquestra do Estado español en actuar no Grosses Festspielhaus de Salzburgo durante a sonada Semana Mozart.

En marzo de 1998, a Real Filharmonía de Galicia comezou a gravar con Rilling as sinfonías completas de Franz Schubert para a prestixiosa compañía discográfica Hänssler Classic. Este proxecto culminou coa saída ó mercado dos dous primeiros CDs coas Sinfonías nº 1, 2, 3 e 4. En xullo do mesmo ano, baixo a dirección de Zumalave, a orquestra actuou no marco da Expo-98 de Lisboa, e en agosto inaugurou, co Mesías de Haendel, a primeira edición do Compostela Millenium Festival, concerto ofrecido na Catedral de Santiago ante máis de 2.000 persoas.

A comezos de 1999 realizou a súa segunda xira internacional, na que interpretou o Elías de Mendelssohn no Auditorio Nacional de Madrid, como parte do ciclo Orquestas del Mundo de Ibermúsica, e no Festival Europeo da Música de Stuttgart. O alto nivel amosado pola orquestra, coro e solistas converteu á interpretación do oratorio do compositor alemán nun inesquecible e altamente louvado concerto.

A Real Filharmonía de Galicia foi ademais unha das orquestras convidadas no XXIV Festival Internacional de Música de Segovia, do Festival Internacional de Música de Galicia e na II Edición do Compostela Millenium tocou baixo a batuta de Neville Marriner.

A partir do ano 2001 a orquestra, xa baixo a dirección de Antoni Ros-Marbà, ofreceu concertos por diferentes cidades españolas como Sabadell, Bilbao, Madrid ou Barcelona, salientando na tempada 2001-2002 os das óperas Fidelio de Beethoven e Così fan tutte de Mozart, que se representaron con grande éxito en Santiago, Vigo, Barcelona e A Coruña. A RFG tamén foi convidada ao Concurso Internacional de Piano "Paloma O’Shea" de Santander. Dende xaneiro de 2013 o británico Paul Daniel é o director titular.

Nunha enquisa realizada no 2005 entre directores de orquestra, solistas, críticos e músicos elixiu á Real Filharmonía de Galicia como a cuarta mellor orquestra do Estado español, únicamente por detrás da Orquesta Sinfónica de Tenerife, a Orquestra Sinfónica de Galicia e a Orquesta Ciudad de Granada[Cómpre referencia].

A Real Filharmonía de Galicia presentou dous traballos discográficos inéditos adicados a Manuel de Falla e Frederic Mompou, editados polos selos Claves e Warner respectivamente. O seu último disco, editado en 2013, leva por título “Variaciones”, no que a orquestra e a soprano María Bayo renden homenaxe a Antón García Abril.

A Real Filharmonía de Galicia está xestionada administrativamente polo Consorcio de Santiago e forma parte da Asociación Española de Orquestras Sinfónicas (AEOS).

Repertorio[editar | editar a fonte]

O amplo repertorio da RFG, que vai de J.S. Bach a compositores da actualidade, séguese enriquecendo con especial atención aos compositores do clasicismo vienés, e recuperando e asumindo asemade a obra de compositores galegos como Rogelio Groba, Xabier de Paz, Paulino Pereiro, O. Rodríguez, Xoán Viaño, Manuel Balboa, Andrés Gaos, Juan Durán ou J.J. Castro.

Proxectos[editar | editar a fonte]

A Real Filharmonía de Galicia ten un protagonismo central nos "Concertos Didácticos para Xoves" que ofrece o Auditorio a colexios e institutos galegos. Tamén potenciou a súa actividade en Compostela en colaboración coa Universidade de Santiago de Compostela: co ciclo de cámara Música na Compañía e no proxecto son[UT]opías. Dende 2008 inicia diferentes actividades coordinadas co Conservatorio Profesional de Música de Santiago. Además, a orquestra intervén, cada mes de agosto, no ciclo de música española co que o Auditorio de Galicia se suma á celebración de Música en Compostela, o curso internacional de música máis antigo do Estado español.

O traballo e obxectivos da Real Filharmonía de Galicia vense reforzados coa Escola de Altos Estudos Musicais, un proxecto pedagóxico de formación de músicos de alto nivel estreitamente vinculado á Real Filharmonía de Galicia (sendo algúns membros da orquestra os seus profesores) e xestionado polo Instituto Galego das Artes Escénicas e Musicais (IGAEM).

Directores[editar | editar a fonte]

Directores titulares[editar | editar a fonte]

Directores convidados[editar | editar a fonte]

Ademais dos mestres Rilling, Ros-Marbá e Paul Daniel, así como do seu director asociado, o compostelán Maximino Zumalave, foron directores convidados: García Navarro, Odón Alonso, Enrique García Asensio, Edmon Colomer, Pedro Alcalde, e outros como Neville Marriner, David Shallon, Jeffrey Kahane, Gilbert Varga, Leopold Hager, Kryzstof Penderecki, Christoph Poppen, Jan Latham-Koenig, Antonio Florio e Peter Maxwell Davies.

Solistas[editar | editar a fonte]

Como solistas, actuaron coa Real Filharmonía de Galicia, entroutros, os violinistas Frank Peter Zimmermann e Ulrike-Anima Mahté, o violonchelista M. Rostropovich, a mezzosoprano Teresa Berganza, os pianistas Alicia de Larrocha, Tzimon Barto, Nikolaus Lahusen, Jeffrey Kahane, Rudolf Buchbinder, Robert Levin, Joaquín Achúcarro, Katia e Marielle Labèque, Evgeni Koroliov e György Sebök, e o frautista Jean-Claude Gérard.

Véxase tamén[editar | editar a fonte]

Ligazóns externas[editar | editar a fonte]