Radomir Antić

Radomir Antić

(2009)
Biografía
Nacemento	22 de novembro de 1948 Žitište, Serbia (en)
Morte	6 de abril de 2020 (71 anos) Madrid, España
Causa da morte	pancreatite (pt)
Actividade
Ocupación	futbolista, adestrador de fútbol
Deporte	fútbol
Posición de xogo	Defensa
Traxectoria   Equipo 1967–1970 FK Sloboda Užice 1970–1977 FK Partizan 181 (9) 1977–1978 Fenerbahçe 28 (2) 1978–1980   Real Zaragoza 58 (7) 1980–1984 Luton Town Football Club 100 (9)   Selección nacional 1973–1973   Iugoslavia 1 (0)   Adestrador 1985–1988 FK Partizan 1988–1990   Real Zaragoza 1990–1992   Real Madrid CF 1992–1995   Real Oviedo 1995–1998   Atlético de Madrid 1999–2000   Atlético de Madrid 2000–2001   Real Oviedo 2003–   FC Barcelona 2003–2003   FC Barcelona 2004–2004   Celta de Vigo 2008–2010   Serbia 2013–2013 Shandong Taishan Football Club (pt) 2015–2015 Hebei Football Club (pt)

Radomir Antić, nado en Žitište (Serbia, por entón pertencente á República Federal Socialista de Iugoslavia) o 22 de novembro de 1948 e finado en Madrid o 6 de abril de 2020, foi un exfutbolista e adestrador de fútbol serbio que xogou na demarcación de defensa.

Traxectoria

Coma xogador

Comezou xogando no FK Sloboda Užice, fichando pronto por un grande da liga iugoslava, o FK Partizan Belgrado, no que militou durante sete tempadas, durante as cales se proclamou campión de liga en 1976.

En 1977 fichou polo Fenerbahçe SK turco, co que tamén conquistou o título da liga. Un ano despois fichou polo Real Zaragoza, onde permaneceu dous anos. En 1980 trasladouse a xogar a Inglaterra, fichando polo Luton Town FC, onde se retirou coma futbolista profesional.

Coma adestrador

Comezou a súa carreira coma adestrador no FK Partizan Belgrado, onde gañou dúas ligas nas súas dúas primeiras tempadas no club. En 1988 volveu ao Real Zaragoza; na súa primeira tempada no equipo aragonés rematou o campionato en quinta posición, clasificandoa para disputar a Copa da UEFA.

A metade da tempada 1990/91 fichou polo Real Madrid para substituír a Alfredo Di Stéfano; obtivo bos resultados e rematou o campionato en terceira posición. Porén, o ano seguinte foi destituído a causa do mal xogo a pesar de estar na primeira posición da liga.

Comezada a tempada 1992/93 substitúe a Javier Irureta no Real Oviedo, equipo onde permaneceu tres tempadas. En 1995 fichou polo Atlético de Madrid; no equipo madrileño tivo a súa mellor época, gañando a Liga e a Copa do Rei en 1996. En 1998 deixou o equipo, pero a finais da tempada 1999/00 volveu ser chamado para tentar salvalo do descenso a Segunda División, obxectivo que non acadou.

Ao ano seguinte sufriu outro descenso, esta vez no Real Oviedo.

En xaneiro de 2003 fichou polo FC Barcelona para substituír a Louis Van Gaal, colleu o equipo a tres puntos do descenso e rematou a tempada en postos de Copa UEFA e chegou a cuartos de final da Liga de Campións. A pesar deste bo rendemento e da boa opinión da xunta directiva, a vitoria de Joan Laporta nas eleccións a presidencia fan que non se renove o adestrador serbio e se fiche o holandés Frank Rijkaard.

A mediados da tempada 2003/04 fichou polo Celta de Vigo en substitución de Lotina para tentar salvar o equipo do descenso. Porén, o tecnico centrou a atención na Liga de Campións, na que o equipo galego seguía vivo, e renunciou ao seu cargo trala eliminación do mesmo ante o Arsenal Football Club e tras so dúas vitorias en campionato ligueiro. O equipo rematou descendendo a final de tempada.

Entre os anos 2008 e 2010 fíxose cargo da Selección de fútbol de Serbia e clasificouna como primeira de grupo para o Mundial de Fútbol de Suráfrica 2010, pero foi eliminada na fase de grupos e foi destituído en setembro dese ano.

O 26 de decembro de 2012 foi contratado polo Shandong Luneng, da Superliga chinesa. Deixou o equipo o ano seguinte e en 2015 fichou polo Hebei Zhongji, da segunda división chinesa.