Profilaxe preexposición para o VIH

Aviso médico

Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.

Situación da profilaxe preexposición:      Aprobada.      Aprobada para o seu uso fóra de indicación.      Programas experimentais en curso.      Programas experimentais realizados.      Sen programas experimentais previstos.      Sen información.

O fármaco Truvada, nome comercial da combinación de emtricitabina-tenofovir empregada na profilaxe preexposición ó VIH.

A profilaxe preexposición (acrónimo PPrE ou na súa versión inglesa PrEP) refírese á administración de fármacos antirretrovirais de forma continuada a persoas seronegativas para VIH con risco substancial, superior á media, de contraer unha infección por VIH.

Se unha persoa está a tomar PPrE e se expón ó seme, líquido pre-seminal ou fluídos vaxinais dunha persoa con VIH, o medicamento antirretroviral axuda a previr que o virus infecte as células do sistema inmunolóxico e así evita que se estableza a infección por VIH.

Na actualidade,^[cando?] o único fármaco recomendado para a profilaxe preexposición do VIH é Truvada, unha combinación de emtricitabina e tenofovir disoproxil fumarato.^{[Cómpre referencia]} Segundo os Centros para o Control e Prevención de Enfermidades a PPrE pode ser unha poderosa ferramenta de prevención do VIH ó combinarse con condóns e outros métodos de prevención para proporcionar unha protección aínda maior que cando se utilizan por separado. Con todo, as persoas que usan PrEP deben comprometerse a tomar o medicamento todos os días e manter un seguimento médico polo menos cada 3 meses.

Un dos ingredientes activos da preparación é o fumarato de disoproxilo de tenofovir, que é un análogo de nucleótido que inhibe da transcriptase inversa, bloqueando eficazmente a incorporación do material xenético do VIH no xenoma do hóspede, e por tanto, evitando a infección por VIH.

PPrE está recomendado para o uso combinado con preservativos, de maneira que cada método pode compensar os déficits de eficacia ocasionais do outro.

Existe unha división social entre o apoio e a oposición ó uso da profilaxe preexposición como método de prevención da infección por VIH. En febreiro de 2016 documentouse o primeiro caso dunha persoa que, tomando axeitadamente a PPrE, infectouse dunha cepa multirresistente ó tratamento, seguido por un segundo caso en outubro do mesmo ano. En febreiro de 2017 informouse do caso dunha terceira persoa infectada de VIH tomando axeitadamente o tratamento, sendo o primeiro caso de adquisición dunha cepa sen ningunha resistencia ós fármacos que contén a PPrE. Polo momento, as novas infeccións derivadas dun uso irregular ou esporádico da PPrE non están contabilizadas. Os actores pornográficos, que foron cuestionados en especial os que realizan escenas de sexo barebacking (coloquialmente chamado en español "a pelo"), están a ser chamados a tomar PPrE e a facelo público, como unha maneira de fomentar a prevención do virus.

Efectos secundarios e adversos dos principios activos empregados en PrEP segundo prospecto:

Efectos adversos frecuentes (poden afectar até 1 de cada 10 persoas)

• dor, dor de estómago
• dificultades para durmir, soños anormais
• problemas dixestivos con molestias despois das comidas, sentirse inchado (gases), flatulencia
• erupcións (incluíndo manchas ou grans vermellos ás veces con bochas e inchazón da pel), que poden ser reaccións alérxicas, picazón, cambios na cor da pel como escurecemento da pel en parches
• outras reaccións alérxicas, tales como respirar con dificultade, inchazón ou sentirse lixeiramente mareado

As análises tamén poden amosar:

• baixa cantidade de glóbulos brancos (unha cantidade reducida de glóbulos brancos pode facer ó paciente máis propenso ás infeccións)
• aumento dos triglicéridos (ácidos graxos), bile ou azucre en sangue
• problemas co fígado e o páncreas

Efectos adversos moi frecuentes (poden afectar a máis de 1 de cada 10 persoas)

• diarrea, vómitos, ganas de vomitar (náuseas)
• mareos, dor de cabeza
• erupción
• sensación de debilidade

As análises tamén poden amosar:

• diminución dos fosfatos en sangue
• elevación da creatinina quinasa

Véxase tamén

Outros artigos

• Profilaxe post-exposición para o VIH
• Medicamento preventivo