Primeira Costa (Florida)

Primeira Costa
Localización no estado de Florida
Condados	Baker Clay Duval Nassau St. Johns
Maiores cidades	Jacksonville Fernandina Beach Yulee St. Augustine Jacksonville Beach

A Primeira Costa de Florida ou, simplemente, a Primeira Costa (inglés: First Coast), é unha rexión vernácula dos Estados Unidos en Florida, situada na costa atlántica de Florida do Norte. A Primeira Costa comprende aproximadamente aos cinco condados que rodean a cidade de Jacksonville: Duval, Baker, Clay, Nassau e St. Johns, coincidente en gran parte coa Área Metropolitana de Jacksonville. O termo ten a súa orixe nunha efectiva campaña de mercadotecnia da década de 1980 que a situou desde entón como unha das rexións vernáculas máis coñecidas de Florida. A Primeira Costa esténdese pola mesma área que a rexión direccional de Florida do Nordés, que inclúe ademais os condados de Putnam e Flagler.

Historia

Tal como o seu nome suxire, a Primeira Costa foi a primeira zona de Florida colonizada por europeos, pero, como sucedeu con outras moitas rexións vernáculas de Florida, a identificación desta área co nome produciuse primeiro a nivel da industria turística antes de ser aceptada pola poboación en xeral. O concepto Primeira Costa foi desenvolvido pola Cámara de Comercio de Jacksonville, pola axencia de publicidade William Cook Advertising Agency en 1983. Jacksonville empregaba daquela outros alcumes e slogans, pero funcionarios locais querían levar a cabo unha campaña de mercadotecnia que integrara por enteiro a área metropolitana (os condados de Duval, Baker, Clay, Nassau e Saint Johns) para promover a rexión por enriba das identidades das diferentes localidades que se incluían nela. O termo "Florida's First Coast" foi acuñado polos membros de William Cook, Kay Johnson, Bryan Cox e Bill Jones, e foi oficialmente presentado no Gator Bowl (un partido de fútbol americano polo campionato local) de 1983, ao interpretarse o "First Coast Anthem" (Himno da Primeira Costa).

A Primeira Costa é similar a outras rexións "costeiras" de Florida, como a Costa Espacial e a Costa Dourada que xurdiron como resultado dunha campaña de mercadotecnia. O seu nome débese ao dobre feito de ser a "primeira costa" que moitos visitantes ven cando entran en Florida e, ao mesmo tempo, de ser a primeira rexión continental dos Estados Unidos que tivo contacto cos europeos. Juan Ponce de León debeu chegar a esta rexión durante a súa primeira expedición en 1513 e a primeira colonia francesa de Forte Caroline fundouse en 1563 no que hoxe por hoxe é Jacksonville. Dun xeito moi significativo, a Primeira Costa inclúe Saint Augustine, a poboación máis antiga dos Estados Unidos no continente en manterse habitada de xeito continuo desde a súa fundación en 1565.

Un estudo levado a cabo en 2007 polos xeógrafos Ary J. Lamme e Raymond K. Oldakowski observou que o termo "Primeira Costa" suplantou a outras dúas apelacións xeográficas máis antigas da rexión: a "Coroa de Florida" (Florida's Crown) e "Xeorxia do Sur" (South Georgia), acreditadas en fontes antigas. Estes antigos nomes veñen, por unha banda, de que esta área é a que está máis ao norte de Florida, coroándoa xunto á fronteira con Xeorxia. O outro apelativo salienta o feito de que a cultura local considérase máis similar á do veciño estado de Xeorxia e á dos estados sureños en xeral que á da parte meridional da península de Florida. Semella que hai unha intención consciente de substituír as connotacións indesexadas que o nome "Xeorxia do Sur" puidera ter en favor de "Primeira Costa"; isto coincide coa diminución do emprego doutros termos como "Vello Sur" e "Dixie" en boa parte do estado. O termo "Primeira Costa" reforza a conexión desta rexión co resto de Florida, unha importante ligazón perceptiva para atraer residentes, negocios e turistas.

O termo "Primeira Costa" pasou a ser moi popular desde a década de 1980, sorprendendo ata aos seus creadores. Sobre 2002 preto de oitocentas organizacións e negocios levaban o termo "First Coast" no seu nome. Lamme e Oldakowski observaron que en 2007 o 18% dos floridanos enquisados estaban familiarizados co termo Primeira Costa, facendo del unha das rexións vernáculas mellor coñecidas polos floridanos. En 2013 o xornal The Florida Times-Union informou que a Primeira Costa ás veces esténdese tan ao sur como Flager Beach, no Condado de Flagler e que, na mesma área, o Condado de Saint John tiña comezado a empregar para si mesmo o termo "Costa Histórica" (inglés: Historic Coast).

Véxase tamén

Referencias xornalísticas

• Calnan, Christopher (6-11-2002). "The birth of the 'First Coast'". The Florida Times-Union (en inglés). Consultado o 4-1-2015. 
• Dixon, Drew (28-7-2013). "Historic Coast latest in a growing number of Florida coastal monikers". The Florida Times-Union (en inglés). Consultado o 4-1-2015. 
• Lamme, Ary J.; Oldakowski, Raymond K. (2007). University of North Carolina Press, ed. "Spinning a New Geography of Vernacular Regional Identity: Florida in the Twenty-First Century". Southeastern Geographer (en inglés) 47 (2). pp. 320–340. doi:10.1353/sgo.2007.0029. 
• Anthony J. Catanese Center for Urban and Environmental Solutions at Florida Atlantic University (2006). Florida Atlantic University, ed. Charting the Course: Where is South Florida Heading? (PDF) (Informe) (en inglés). Arquivado dende o orixinal (PDF) o 16-12-2011. Consultado o 3-4-2012.