Premios María Casares

Na Galipedia, a Wikipedia en galego.
Algúns dos premiados na edición de 2014.

Os Premios María Casares son uns galardóns entregados anualmente pola Asociación de actores e actrices de Galicia que destacan os mellores espectáculos, actores e actrices e profesionais técnicos da temporada teatral anterior. Concedéronse por vez primeira no ano 1997 e reciben o nome de María Casares debido á que foi a actriz galega con máis éxito internacional de sempre[1]. Os gañadores son decididos por todas as persoas asociadas mediante votación electrónica.

A gala de entrega realízase no teatro Rosalía de Castro, na Coruña, en datas próximas ao Día Mundial do Teatro (27 de marzo). Os patrocinadores habituais son o Concello e a Deputación da Coruña, a AGADIC, a Fundación AISGE, a SGAE e nos últimos anos contou coa colaboración do Padroado da Cultura do Concello de Narón, do Centro Dramático Galego e de Gadis[2]. Ademais, é emitida a través da primeira canle da Televisión de Galicia e das redes sociais.

A mecánica é a habitual deste tipo de entregas, aínda que con varias peculiaridades. Unha delas é que o obxecto entregado a cada a cada gañadora é unha cunca coa cara de María Casares. Outra é que a escenografía, ḿúsica e guión de cada edición son encargadas a unha compañía teatral distinta, realizando representacións entre as entregas e agradecementos. A edición de 2010 foi conducida por Voadora, a de 2014 por Ibuprofeno Teatro[3], a de 2015 por Elefante Elegante[4], a de 2016 por Chévere[5] e a de 2018 por Talía Teatro[6].

En cada edición tamén é lido o Manifesto Galego do Día Mundial do Teatro, repasando os resultados da temporada pasada e facendo habitualmente alegatos á melloría das condicións de traballo do gremio e á importancia do sector no universo cultural galego.

Resultados[editar | editar a fonte]

Escenografía da gala de 2014.

Por compañías, tanto Sarabela Teatro ten 39 galardóns acadados e o Centro Dramático Galego levaba 37 en 2013. Teatro do Atlántico conseguira 18, Teatro de Aquí 14 e Lagarta Lagarta 10.

Por individuos, o iluminador e escenógrafo Baltasar Patiño e o escenógrafo Carlos Alonso teñen once, e a maquilladora Carmela Montero, o dramaturgo Roberto Vidal Bolaño, o escritor e actor Avelino González, a directora Ánxeles Cuña e o iluminador, actor e escenógrafo Suso Díaz Seoane, 7.

Notas[editar | editar a fonte]

  1. "Por que María Casares?". AAAG. Consultado o 09/03/2018. 
  2. "Os premios". AAAG. Consultado o 09/03/2018. 
  3. "A gala dos María Casares transformarase nun furancho ideado por...". www.aaag.gal. Consultado o 2018-03-09. 
  4. "A compañía Elefante Elegante conducirá a gala de entrega dos...". www.aaag.gal. Consultado o 2018-03-09. 
  5. "Chévere conducirá a gala dos XX Premios de Teatro María Casares". www.aaag.gal. Consultado o 2018-03-09. 
  6. "Talía Teatro conducirá a gala dos XXII Premios María Casares". www.aaag.gal. Consultado o 2018-03-09. 

Véxase tamén[editar | editar a fonte]

Ligazóns externas[editar | editar a fonte]