Pierre Cavalli

Pierre Cavalli

Biografía
Nacemento	12 de xullo de 1928 Zürich, Suíza
Morte	28 de marzo de 1985 (56 anos) Zürich, Suíza
Actividade
Lugar de traballo	París
Ocupación	guitarrista, guitarrista de jazz
Xénero artístico	Jazz
Instrumento	Guitarra

Pierre Cavalli, nado en Zürich o 12 de xullo de 1928, e finado na súa cidade natal o 28 de marzo de 1985, foi un guitarrista suízo de Jazz. Cavali é recordado como un pioneiro da música psicodélica francesa e como o precursor que popularizou o estilo de jazz americano dos anos 50 na Suíza romanda.

Traxectoria

Con estudos de violín desde os sete anos pasou á guitarra aos quince, por influencia das escoitas de Stéphane Grappelli e Quincy Jones. O pai de Cavalli era dono dunha tenda de instrumentos en Lausana e o propio Pierre afeccionouse ao coleccionismo de vinilos desde a adolescencia.

Co Swiss All Star Bebop Team, unha casa discográfica de prestixio en Suíza nos 40, participou no primeiro Festival Internacional de Jazz de Niza en 1948, máis tarde é contratado por Fred Böhler, Hazy Osterwald e Kurt Edelhagen. En 1953 trasladouse a París, onde tivo o seu propio trío, tocou con Art Simmons e chegou a ser escollido como músico de estudio para Quincy Jones (Et voilà!, 1957) e Michel Legrand. Friedrich Gulda levouno á súa Euro Big Band. Un punto de inflexión significativo na carreira de Cavalli chegou co lanzamento do seu aclamado álbum, "Twilight Time", en 1959 que solidificou o seu status na industria musical. O lanzamento do disco en vinilo chamou a atención dos fans cun alto número de vendas e recibiu o apoio de críticos especializados. Co seu trío, Cavalli foi de xira polos Estados Unidos e a URSS.

A principios dos anos 60 tocou con Stéphane Grappelli. Xa de regreso a Suíza, a finais da década tras a morte do pai a mediados dos 60, traballou como solista coa DRS Big Band, e seguiu traballando como músico de estudio para Dennis Armitage mentres mantiña a tenda de música familiar coa axuda da nai. A este traballo regular sumáronse as colaboracións nas clases mestras a alumnos de jazz de Hans Koller (International Jazz Workshop, 1964) e Ingfried Hoffmann. Cavallli amosaba técnicas que aprendera no estranxeiro xa no seu país, por exemplo, considéraselle o primeiro en tocar en Suíza a Gibson de dobre pescozo, o que para os afeccionados máis novos era equivalente a terse pasado ao rock & roll.

No ano 1972 decide preparar unha nova viaxe, inspirado polas primeiras publicacións de Bossa nova que chegaban a Suíza e polo popular filme Orfeu Negro, nunha etapa dun ano no Brasil. Ao seu regreso grava en suíza xunto con Angel Pocho Gatti (italo-arxentino) e Bruno Spoerri (suízo) o álbum de jazz-fusion e trippy bossa-nova con letras en portugués Uma Vitamina Faz Favor que só é recuperado para a publicación polo selo Sonorama tras a morte do autor e publicado finalmente en 2014.

Durante o resto da década dos 70 segue traballando dando concertos ao vivo en pequenos grupos propios, sendo constantemente invitado a Francia por Eddie Barclay dono de clubs de jazz, e como músico de estudio (a partir de 1973 xa asentado en Zürich). Tamén compuxo música para películas de televisión francesas. Xunto con Thomas Moeckel, Markus Plattner e Roberto Bossard, fundou en 1983 a banda Guitar Summit, que estaba formada por catro guitarristas máis unha sección rítmica.

Estaba casado con Nanda van Bergen, que tamén actuou con el como cantante. Tamén é recordado na súa comunidade como un grande afeccionado á entomoloxía cunha ampla colección de insectos.

Discografía

• Twilight Time (Realm, 1959)
• Con Stéphane Grappelli: Django (Barclay 1962)
• Swiss All Stars (Ex Libris 1964)
• Con Wolfgang Dauner: The Oimels (MPS 1969)
• Coa DRS Big Band: Tour de swing (CH Record 1972–1974)
• Emphasis (Pick 1975, xunto a Renato Anselmi, Fernando Vicencio, Nick Liebmann e Curt Treier)
• Con Bert Campbell: Romantische Melodien (Corema Records 1983)
• Uma Vitamina Faz Favor (Sonorama 2014)

Véxase tamén

Ligazóns externas

• Possarinhos, canción de Cavalli do disco Uma Vitamina Faz Favor, en youtube