Pelecanus rufescens

Na Galipedia, a Wikipedia en galego.
Saltar para a navegação Saltar para a pesquisa

Pelecanus rufescens
Pelecanus rufescens (75923093).jpg

Pelecanus rufescens
Pelecanus rufescens

Estado de conservación
Pouco preocupante (LC)
Pouco preocupante[1]
Clasificación científica
Reino: Animalia
Filo: Chordata
Clase: Aves
Orde: Pelecaniformes
Familia: Pelecanidae
Xénero: Pelecanus
Especie: P. rufescens
Nome binomial
'Pelecanus rufescens'
Gmelin, 1789

Pelecanus rufescens é unha especie de aves do xénero dos pelicanos. Vive e reprodúcese nos pantanos e lagos de pouco fondo de África, sur da península Arábiga, sur da India e actualmente parece que desapareceu de Madagascar.

Descrición[editar | editar a fonte]

É un pelicano relativamente pequeno, pero aínda así unha ave grande. A súa lonxitude vai de 125 a 155 cm, a envergadura de ás está entre 2,15 e 2,9 m e a masa corporal é de 4 a 7 kg. O peteiro mide de 30 a 38 cm de lonxitude.[2][3] A súa plumaxe é gris e branca, con tons rosas nas costas ocasionalmente aparentes, que nunca son dun rosa tan forte coma nos flamengos, pero que lle valeron o nome que ten nalgúns idiomas de pelicano rosado ou de costas rosadas e tamén o seu nome científico (rufescens). A parte superior do peteiro é amarelo e a bolsa é xeralmente griseira. Os adultos reprodutores teñen penachos de plumas longas na cabeza.

Comparte o seu hábitat co pelicano branco, que é xeralmente máis grande e ten plumaxe branca en vez de gris.

Hábitat e reprodución[editar | editar a fonte]

O P. rufescens vive en diversos hábitats acuáticos, mais prefire as augas remansadas e pouco fondas, evitando as ribeiras costentas, ou con moita vexetación. Prefire lagos de augas doces, pantanos, ríos grandes de correntes calmas, e pozas estacionais, pero tamén frecuenta encoros, terras asolagadas estacionalmente e chairas asolagadas nas desembocaduras de ríos. Pode aparecer en lagos e lagoas alcalinos e salinos, e ás veces ao longo da costa en baías e estuarios (pero é raro en costas abertas). A especie tende a descansar e reproducirse nas árbores (por exemplo mangleiros), pero tamén en illas areentas, acantilados, arrecifes de coral e dunas.

As árbores usadas para a nidación conteñen moitos niños construídos próximos. Estes niños son reutilizados todos os anos ata que as árbores caen, aínda que, malia todo, as aves permanecen na área. A especie aniña colonialmente en árbores, xunqueiras ou arbustos baixos ao longo das ribeiras e tamén con menos frecuencia en illas areentas e en mangleirais.

O niño é unha gran morea de poliñas e pode ter unha altura de 10 a 50 m desde o chan. A femia pon dous ou tres ovos brancos grandes. As crías aliméntanse metendo a cabeza dentro da bolsa do adulto para coller comida regurxitada parcialmente dixerida.

Dieta[editar | editar a fonte]

O alimento é xeralmente peixe (de peso de ata 450 g, xeralmente entre 80 e 290 g) e anfibios, e obtéñenos xeralmente pescando en grupos. Entre os peixes que depredan están cíclidos como Haplochromis e Tilapia.

Notas[editar | editar a fonte]

  1. BirdLife International (2012). "Pelecanus rufescens". Lista Vermella de especies ameazadas. Versión 2013.2 (en inglés). Unión Internacional para a Conservación da Natureza. Consultado o 26 November 2013. 
  2. [1] (2011).
  3. [2] (2011).

Véxase tamén[editar | editar a fonte]

Ligazóns externas[editar | editar a fonte]