Pectínidos

Na Galipedia, a Wikipedia en galego.
Vieira redirixe aquí. Para o futbolista francés, faga clic en Patrick Vieira.
Vieira
Scallop eyes.jpg
Clasificación científica
Reino: Animalia
Filo: Mollusca
Clase: Bivalvia
Orde: Pectinoida
Familia: Pectinidae
Xéneros

Os pectínidos (Pectinidae), coñecidos popularmente como vieiras, son unha familia de moluscos bivalvos, emparentados de preto coas ameixas e as ostras. Viven en augas profundas da maior parte dos mares, sobre bancos de area limpa e firme preto da costa, até 100 metros de profundidade. Son hermafroditas, e maduran primeiro as gónadas masculinas.

A vieira endémica do Mediterráneo é a (Pecten jacobaeus) e a das costas galegas denomínase (Pecten maximus).

Características[editar | editar a fonte]

A valva é ondulada, e a inferior é máis grande ca superior que é case plana. As ondulacións radian dende o vértice de cada valva, efectuando un debuxo semellante a un abano. Os seus bordos son afiados e ondulados.

As vieiras posúen cunchas con sucos ou canles nos cales se pode apreciar o rexistro do crecemento do animal. Do mesmo xeito co resto dos moluscos bivalvos, as súas valvas ábrense e pechan grazas ao músculo abdutor.

Son organismos nadadores, xeralmente atópanse repousando no fondo sobre a súa valva inferior, a que adoita ter unha coloración máis pálida ca superior.

Son organismos filtradores, polo que durante os fenómenos de mareas vermellas, onde hai posibilidades de afloramento de algas nocivas, é recomendable evitar o seu consumo.

Usos[editar | editar a fonte]

As vieiras son bivalvos de gran importancia comercial, debido ao saboroso sabor da súa carne, que pode ser consumida crúa ou cocida (en empanadas, ó forno, á parmesana etc.).

Simbolismo[editar | editar a fonte]

A vieira atlántica (Pecten maximus) é o símbolo do peregrino no Camiño de Santiago. A razón é que, ao ser típico das costas de Galicia, os peregrinos levábana aos seus lugares de orixe como proba de que chegaran até o final da viaxe.