Paul Otlet

Paul Otlet

Biografía
Nacemento	(fr) Paul Marie Ghislain Otlet 23 de agosto de 1868 Bruxelas
Morte	10 de decembro de 1944 (76 anos) Bruxelas
Lugar de sepultura	Etterbeek Cemetery (en)
Residencia	Hôtel Otlet
Educación	Universidade Libre de Bruxelas UCL-KUL Collège Saint-Michel (en)
Actividade
Campo de traballo	Bibliografía, ciencias da computación, clasificación e ciencia da información
Lugar de traballo	Bruxelas (1890–1944)
Ocupación	escritor, inventor, bibliógrafo, xurista, científico da información, avogado, bibliotecario, esperantista
Membro de	movemento pacifista
Influencias	Henri La Fontaine, Edmond Picard e Melvil Dewey
Obra
Obras destacables (1895) Clasificación Decimal Universal (1993) Mundaneum
Arquivos en	Mundaneum
Familia
Pai	Édouard Otlet
Irmáns	Maurice Otlet

Paul Otlet, nado en Bruxelas o 23 de agosto de 1868 e finado na mesma cidade o 10 de decembro de 1944, foi un bibliógrafo, documentalista, xurista, emprendedor e escritor belga. Xunto con Henri La Fontaine, creou a clasificación decimal universal (CDU). Tamén participou no desenvolvemento da Oficina Internacional de Bibliografía, conservada no Mundaneum.

Otlet foi tamén socialista, pacifista, filántropo e anticolonialista. A súa ambición era permitir que as persoas se coñecesen mellor para non temerse os uns aos outros e vivir en paz.

Traxectoria

Fillo do político Édouard Otlet, Paul Otlet é coñecido polos seus traballos no eido da bibliografía. En 1895, coa intención de establecer unha rede de cooperación internacional entre bibliotecas e bibliotecarios creou, xunto con Henri La Fontaine, a Oficina Internacional de Bibliografía. A Oficina contribuíu ao recoñecemento da documentación como disciplina científica. Estableceron tamén o Repertorio Bibliográfico Universal (RBU), que tiña como función recoller todas as obras publicadas no mundo, con independencia da súa época ou temática.

Para facilitar o acceso á información ao maior número de persoas, en 1905 creou o sistema de clasificación decimal universal (CDU), así como o estándar de 125mm x 75mm para as fichas bibliográficas, aínda en vigor. Tamén traballou, xunto con La Fontaine, no establecemento dunha Bibliographica sociologica, un repertorio de feitos e escritos relativos á sociedade. Contra 1895, constaba dunhas 400.000 entradas.

En 1909, consciente da transformación do libro e da necesidade de incluír todos os soportes posibles na investigación bibliográfica, publicou La Fonction et les transformations du livre. Ao ano seguinte, co seu colaborador Robert Goldschmidt, desenvolveu a bibliophoto, unha sorte de biblioteca portátil de microfichas.

Durante o período de entreguerras, o seu traballo como documentalista adquire un xiro universalista e globalizador. No marco do proxecto do Palais Mondial-Mundaneum, que buscaba integrar todos os saberes do mundo, Paul Otlet centrouse na multiplicación dos soportes de información, todos eles igualmente portadores da memoria.

Paul Otlet faleceu en Bruxelas o 10 de decembro de 1944. A súa tumba atópase no cemiterio de Etterbeek, na comuna de Wezembeek-Oppem.

Pensamento

Paul Otlet foi descrito como pacifista e utópico, xa que procuraba unha globalización do coñecemento que "conduza á humanidade cara o progreso e a paz". Tamén destacou como filántropo.

Xa en 1888, publicou un texto en contra do colonialismo, L'Afrique aux Noirs, coincidindo co comezo do imperio colonial belga. O seu interese polo continente africano volveuse manifestar en 1921, cando participou na organización do segundo congreso panafricano.

A partir de 1913, interesouse por construír unha "cidade mundial", consagrada por enteiro ao saber, en colaboración con Le Corbusier. Consideraron varias localidades: Xenebra, Bruxelas e Anveres. Porén, o proxecto xamais viu a luz.

Véxase tamén

Bibliografía

• Boukari-Yabara, Amzat (2014). Africa Unite! Une histoire du panafricanisme (en francés). Editions La Découverte. ISBN 9782707196903. OCLC 1145863975. 
• Cauvin, Aurélie (2001). La Littérature hypertextuelle, analyse et typologie (en francés). Maitrise de Lettres Modernes. 
• Les Impressions Nouvelles (2015). "Paul Otlet". lesimpressionsnouvelles.com (en francés). Arquivado dende o orixinal o 31/05/2022. Consultado o 16/02/2025. 
• Malet, Jean-Baptiste (2024). La capitale de l'humanité (en francés). J'ai Lu. ISBN 9782290387481. OCLC 1428166110. 
• Peeters, Benoît (2012). "Paul Otlet: Le bibliographe rêveur". cairn.info (en francés). Consultado o 16/02/2025.