Paterson é unha cidade do estado de Nova Jersey, nos Estados Unidos de América. É a sede e cidade máis poboada do condado de Passaic, con 146.199 habitantes segundo o censo do 2010. Paterson é coñecida como Silk City ("A cidade da seda") pola súa posición dominante na produción de seda a finais do século XIX.
Durante a Segunda guerra mundial a economía revitalizouse grazas á fabricación de motores de avións, pero unha vez rematada a guerra, a crise que afectou a todo o país pasou tamén factura á cidade. Nos anos 70 o problema do desemprego era crítico, situación que non mellorou moito hoxe en día.
Segundo o censo do ano 2010, había 146.199 habitantes, 44.329 fogares e 33.353 familias residindo na cidade. Cunha densidade de poboación de 6.826,4/km², Paterson é a terceira cidade máis densa dos Estados Unidos entre as maiores de 100.000 habitantes, só por detrás de Nova York e San Francisco.
O filme de 2016 Paterson, dirixido por Jim Jarmusch, foi filmado na cidade. Conta a historia dun condutor de bus chamado Paterson que escribe poesía no seu tempo libre.
