O carteiro Pat é unha serie de animación de bonecosbritánica creada por John Cunliffe e producida por Woodland Animations e HIT Entertainment para a BBC, diríxese a nenos en idade preescolar e conta as aventuras de Pat Clifton, un carteiro de Greendale, unha vila de ficción inspirada nunha real de Cumbria[1]. En 1986 editáronse un vídeo en tres volumes da serie, en anos sucesivos editáronse outros 18 e varios DVD así como libros didácticos e para colorear. A Televisión de Galicia emitiu a serie en 1985.
A primeira tempada consistiu en 13 capítulos que se emitiron en 1981 dirixidos por Ivor Wood, Kate Fawkes e Theresa Plummer-Andrews e patrocinados polo correo británico, entre 1991 e 1994 realizáronse catro especiais e en 1996 emitiuse unha segunda tempada de 14 capítulos na que lle engadiron unha familia ao carteiro Pat . A partir de 2004 retomouse de novo a serie producida por Cosgrove Hall Films e sen o apoio do correo británico[2], realizando catro tempadas ata 2008, a última co título Postman Pat: Special Delivery Service realizada pola produtora norteamericana Classic Media que recibiu numerosas críticas por se arredar do espírito orixinal[3].
En cada episodio desenvólvense as aventuras e desventuras de Pat Clifton, un carteiro rural sorrideiro e amigable que co seu gato Jess distribúe co seu furgón o correo no val de Greendale, aínda que sempre prentende repartir o correo con toda a súa atención, sempre algún veciño lle pide consello distraéndoo do seu cometido laboral. Outros caracteres son a xefa de correos, a señora Goggins, o granxeiro Alf Thompson e o inventor local, Ted Glen.
En 2009 realizouse unha serie co gato Jess como protagonista Guess with Jess, coproducida entre o Reino Unido e o Canadá. O vehículo que utiliza Pat serviu de inspiración para contruír o automóbil máis pequeno do mundo apto para circular legalmente[4]. En outubro de 2009 Classic Media anunciou que chegara a un acordo con Timeless Films para producir unha longametraxe en 3D baseado no carácter do carteiro Pat que se estrearía no outono de 2011[5]. Finalmente a película Postman Pat: The Movie foi presentada en maio de 2014 no Reino Unido.[6]
