O Cairo histórico está situado no centro do Cairo e caracterízase polas súas mesquitas e outros monumentos islámicos de importancia histórica. O Cairo histórico fundouse no ano 969 como recinto real dos califasfatimís, mentres que a capital económica e administrativa real era a próxima Fustat. Esta última cidade fundaraa o comandante militar árabe Amr ibn al-As tras a conquista de Exipto no ano 641 e a captura da entón capital Alexandría.
Al-Askar, situada no actual Cairo Antigo, foi a capital de Exipto entre os anos 750 e 868. Ahmad ibn Tulun fundou Al-Qatta'i como a nova capital de Exipto, un status que mantivo ata o ano 905, cando Fustat volveu ser a capital. Tras a destrución de Fustat en 1168–1169 para evitar a súa captura polas Cruzadas, a capital administrativa de Exipto trasladouse ao Cairo, onde permaneceu desde entón. O xeneral Jawhar al-Siqilli (o siciliano) tardou catro anos en construír o Cairo, co obxectivo de obrigar ao califa fatímida Al Muizz a abandonar a súa antiga capital Mahdiya en Tunisia e establecerse na nova capital fatímida en Exipto.
No 969, era fatimí, Al-Qāhira (O Cairo) fundouse oficialmente como a capital imperial xusto ao norte de Fustat. Co paso dos séculos, O Cairo creceu ata o punto de absorber outras cidades próximas, como Fustat, pero 969 considérase o "ano de fundación" da cidade moderna.[1] O Cairo converteuse axiña nun centro de aprendizaxe, cunha biblioteca que contiña dous millóns de libros.[2]
No 1250, os soldados escravos ou mamelucos tomaron Exipto e estableceron a súa capital no Cairo ata 1517, cando foron derrotados polos otománs. No século XVI, o Cairo tiña edificios de apartamentos onde os dous pisos máis baixos servían para fins comerciais e de almacenamento, e as múltiples habitacións de arriba alugábanse a inquilinos.[3]
Na actualidade, o Cairo histórico inclúe a mesquita de Ibn Tulun (a máis antiga e grande do Cairo), a Universidade de Al-Azhar, a universidade máis antiga do mundo, e a mesquita de Al-Hakim, entre outras mesquitas e edificios históricos.
Gran parte do Cairo histórico corre perigo polo abandono e a decadencia, e agora é unha das zonas máis pobres e superpoboadas da capital exipcia.[4] Ademais, segundo informou Al-Ahram Weekly, os roubos nos monumentos islámicos dentro de Darb Al-Ahmar ameazan a súa preservación a longo prazo.[5]
↑Irene Beeson (setembro/outubro de 1969). "Cairo, a Millennial". Saudi Aramco World. pp.24, 26–30. Arquivado dende o orixinal o 30 de setembro de 2007. Consultado o 9 de agosto de 2007.
↑Patricia Skinner (2001), Unani-tibbi, Encyclopedia of Alternative Medicine
↑Mortada, Hisham (2003). "Traditional Islamic principles of built environment". Londres: Routledge. p.viii. ISBN0700717005.Falta a |url= (Axuda)
↑El-Aref, Nevine (26 de xuño - 2 de xullo de 2008). "Unholy thefts". Al-Ahram Weekly(en inglés). Arquivado dende o orixinal o 5 de xuño de 2013. Consultado o 3 de abril de 2010.
