Nova Constellatio

Na Galipedia, a Wikipedia en galego.

Moeda de cobre de 5 unidades (medio cent) da serie Nova Constellatio.[1]

As moedas da serie coñecida como Nova Constellatio son a primeira proposta para a dotación dun sistema monetario baixo a autoridade dos Estados Unidos, no inicio do ano 1783. A serie abrangue tres valores faciais en prata (1.000 unidades, 500 unidades e 100 unidades) e un único valor en cobre (5 unidades).

A característica que lles dá o nome é que todas elas locen a lenda NOVA CONSTELLATIO nos seus reversos, coa excepción dun exemplar coñecido de 500 unidades, que carece dela, aínda que responde á mesma tipoloxía.

Historia[editar | editar a fonte]

Retrato do financeiro Robert Morris (1734-1806) a cargo de Robert Edge Pine. Óleo sobre lenzo (ca. 1785).

A serie de probas monetarias Nova Constellatio foi o resultado de dous anos de traballos de Robert Morris,[2] o Pai Fundador a quen se lle atribúe o financiamento da Guerra de Independencia.[3] Morris foi elixido por unanimidade primeiro Superintendente de Finanzas dos Estados Unidos en 1781,[4] e o 21 de febreiro do ano seguinte o Congreso adoptou a seguinte resolución:[5]

“ O Congreso aproba a creación dunha nova Casa da Moeda, e encárgaselle ao Superintendente de Finanzas que prepare e presente ao Congreso un plan para o establecemento e a condución desa casa. ”

O plan do financeiro, elaborado xunto co seu asistente, Gouverneur Morris,[6] era ambicioso: tratábase de unir a nova nación arredor dunha unidade monetaria que permitise unha doada conversión das moedas británicas, españolas, portuguesas e asiáticas que circulaban por aquel territorio.[7] Esta idea supuña unha gran novidade, xa que a proposta de Morris suporía o primeiro sistema monetario en Europa Occidental e América baseado no sistema decimal.[8]

Por mor da precaria situación financeira do novo Goberno, o Congreso non aplicou plan deseñado por Morris. No entanto, a innovación da decimalización non pasou desapercibida para dous dos Pais Fundadores, que examinaron os modelos das moedas propostas por Morris; estes eran Alexander Hamilton e Thomas Jefferson, os principais impulsores do dólar estadounidense, que se converteron en defensores do sistema decimal logo da análise das propostas de Morris.[9][10]

Durante o tempo en que Thomas Jefferson manexou estes ensaios monetarios da serie Nova Constellatio para o seu estudo, redactou un informe titulado "Notas sobre o establecemento dunha unidade monetaria e dun sistema de cuñaxe de moedas para os Estados Unidos", no que concluíu:[11]

“ O financeiro, no seu informe, propón, xa que logo, que as nosas moedas sexan en proporcións decimais unhas en relación coas outras. Se adoptamos o dólar como unidade, deberiamos cuñar catro moedas, unha de ouro, dúas de prata e unha de cobre, a saber: unha moeda de ouro, co valor de dez dólares; a unidade ou o dólar propiamente dito, en prata; o décimo de dólar, en prata tamén; e o céntimo de dólar, en cobre. ”

Esta é a primeira descrición escrita do sistema monetario que finalmente se adoptou nos Estados Unidos, o que ilustra claramente a importancia histórica dos modelos propostos por Morris.[8]

Deseños[editar | editar a fonte]

Moeda de 100 unidades (10 cents) da serie Nova Constellatio.[12]
Moeda de 500 unidades (medio dólar) da serie Nova Constellatio.[13]
Moeda de 1.000 unidades (un dólar) da serie Nova Constellatio.[14]

Esta serie de ensaios monetarios ten un anverso común caracterizado por unha coroa vexetal que rodea as inciacis do país (US) e a abreviatura do valor facial. Rodeando esta coroa polo seu exterior está a lenda LIBERTAS JUSTICIA ("Liberdade Xustiza") e no exergo a data 1783.[15]

Pola súa banda, os reversos destas moedas presentan uns raios que emanan do Ollo da Providencia e nos seus finais unha constelación de trece estrelas, tal e como ocorría nos billetes "continentais" de 40 dólares na emisión do 11 de abril de 1778, todo isto rodeado pola lenda en latín NOVA CONSTELLATIO.[15]

Estes motivos serviron tamén para algunhas emisións privadas de moeda (tokens) de cobre datadas en 1783, en 1785 e, moi escasamente, en 1786.[16][17]

Consérvase moi pouca documentación acerca destes cobres privados baseados no modelo de Morris, e as escasas referencias da época amosan discordancias entre elas, que afectan mesmo á orde das palabras na inscrición do reverso: NOVA CONSTELLATIO ou CONSTELLATIO NOVA. A este respecto, en 1974, Walter Breen suxeriu como orde correcta para esta lenda CONSTELLATIO NOVA.[18]

Valores faciais da serie[editar | editar a fonte]

Existen rexistros de sete moedas correspondentes aos modelos de Morris:

  1. Unha única peza en prata de valor facial non determinado entregada a Morris o 2 de abril de 1783. Ao recibila, Morris escribiu no seu diario: "Enviei a buscar ao señor Dudley, quen me entregou unha peza de prata que é a primeira que se cuñou como moeda americana".[2] En 2017, David McCarthy descubriu que se trata dunha peza de 500 unidades sen inscrición no reverso.[19]
  2. Un grupo de moedas de prata que abrangue a de 1.000 unidades, a de 500 unidades e tres variantes da de 100 unidades. Estas pezas foron cuñadas despois da visita de Alexander Hamilton ao Tesouro que deu lugar a unha correspondencia entre Morris e Hamilton na que figura como asunto On the Subject of the Coin ("Sobre o tema da moeda"), a partir da cal se tomou a decisión de cuñar un grupo de pezas para presentar no congreso.[2] Estes exemplares enviáronselle de camiño a Thomas Jefferson, que redactou as súas "Notas sobre o establecemento dunha unidade monetaria e sun sistema de cuñaxe para os Estados Unidos" a partir do exame do xogo. Jefferson rexistrou o valor facial deste conxunto como 1,8 dólares ou, o que é o mesmo, 1.800 unidades,[11] do que se desprende que a súa composición era a seguinte: unha peza de 1.000 unidades, outra de 500 unidades e tres de 100 unidades. Esta distribución correspóndese exactamente cos exemplares de prata coñecidos que levan a lenda NOVA CONSTELLATIO.[10]
  3. Unha peza de cinco unidades coa lenda NOVA CONSTELLATIO, que foi enviada a Londres antes de que Jefferson recibise o conxunto.[2]

Rastrexabilidade dos exemplares[editar | editar a fonte]

Logo de seren devoltas ao Congreso, as moedas acabaron dispersadas. A mediados da década de 1840, unha peza de 1.000 unidades e a de 500 unidades do conxunto que portaba a lenda NOVA CONSTELLATIO foron descubertas por un descendente do antigo secretario do Congreso Charles Charles Thomson.[20]

Peza única coñecida con valor de 500 unidades carente da lenda NOVA CONSTELLATIO. En 2017 demostrouse que foi cuñada antes do grupo que foi presentado ao Congreso dos EEUU.[21][22]

Pasaron outros vinte e cinco anos antes de que aparecese outra das moedas de Morris. Tratábase dun segundo exemplar de 500 unidades en prata, descuberto en 1870, mais este espécime non levaba a lenda NOVA CONSTELLATIO. Os coleccionistas deron en chamar este modelo como "tipo 2", xa que o seu deseño difería do da moeda de 500 unidades do Congreso.[8][22] En 2017 chegouse á demostración pericial de que este exemplar fora cuñado antes do conxunto que foi enviado ao Congreso.[23]

En 1900 acháronse dous tipos de moedas de 100 unidades, ambos coa inscrición NOVA CONSTELLATIO, mais un deles co canto liso e outro con follas de oliveira gravadas. En 1979 apareceu en Europa a moeda de 5 unidades, que tamén presenta a lenda.[8] A última peza que saíu á luz, un terceiro exemplar de 100 unidades, foi nunha poxa pública da casa Stack's en 1991; coñécese pouco sobre a súa proveniencia, e é a única peza que non está certificada por un servizo de certificación.[24][25]

Notas[editar | editar a fonte]

  1. ↑ "5 Units "Nova Constellatio"". Numista.com
  2. ↑ 2,0 2,1 2,2 2,3 Ferguson, J. et al. (1973-1999). The Papers of Robert Morris. Vol. 7. University of Pittsburgh Press. Páxinas 740-743.
  3. ↑ Cowen, D. J. (2006). Financial founding fathers: the men who made America rich. University of Chicago Press. Páxinas 193-194. ISBN 0-226-91068-7
  4. ↑ Thomas, G. E. (2010). The Philadelphia Stock Exchange and the city it made. University of Pennsylvania Press. Páxina 19. ISBN 978-0-8122-4224-9
  5. ↑ Journals of the Continental Congress. Volume 22. Páxinas 86-87.
  6. ↑ Carothers, N. (1930). Páxina 49.
  7. ↑ Carothers, N. (1930). Páxinas 46-49.
  8. ↑ 8,0 8,1 8,2 8,3 McCarthy, D. "Nova Constellatio patterns among earliest U.S. coins". En Coin World. 4 de xullo de 2015.
  9. ↑ "Nova Constellatio: The First American Coin". American Numismatic Association.
  10. ↑ 10,0 10,1 McCarthy, D. (2017). "Nova Constellatio: Identifying the First US Coin". En The Numismatist. Agosto.
  11. ↑ 11,0 11,1 Jefferson, T. (1784). Notes on the establisment [sic] of a money unit and of a coinage for the United States. Verlag nicht ermittelbar.
  12. ↑ "100 Units "Nova Constellatio"". Numista.com
  13. ↑ "500 Units "Nova Constellatio"". Numista.com
  14. ↑ "Nova Constellatio Pattern "Silver Mark 1000"". Numista.com
  15. ↑ 15,0 15,1 "Nova Constellatio". Numista.com
  16. ↑ Newman, E. P. (1995). "New Thoughts on the Nova Constellatio Private Copper Coinage". En Mossman, P. (1995). Coinage of the American Confederation Period. American Numismatic Society. ISBN 978-0897222631
  17. ↑ Algúns exemplos: token de 1783, token de 1785. Numista.com
  18. ↑ Hodder, M. J. (1994). "More on Benjamin Dudley, Public Copper, Constellatio Nova's and Fugio Cents". En The Colonial Newsletter. Xuño. Páxinas 193-196.
  19. ↑ Gilkes, P. (2017). "Researcher concludes 1783 Plain Obverse quint is first U.S. coin". En Coin World. 28 de xullo.
  20. ↑ Crosby, S. (1875). The Early Coins of America; and the Laws Governing Their Issue. Páxina 311.
  21. ↑ "First U.S. coin identified by McCarthy". En Numismatic News. 4 de agosto de 2017.
  22. ↑ 22,0 22,1 "Quint - Nova Constellatio Pattern; Type II". Numista.com
  23. ↑ "First U.S. coin identified by McCarthy". En Numismatic News. 4 de agosto de 2017.
  24. ↑ "United States and Foreign Gold, Silver and Copper Coins: Featuring the Richard Picker, Eugene B. Benedict and Rising Collections". Stack's. Maio de 1991.
  25. ↑ Spurrier, L. "Lost & Found: The Nova Constellatio Set".

Véxase tamén[editar | editar a fonte]

Bibliografía[editar | editar a fonte]

  • Carothers, N. (1930). Fractional Money, A History of the Small Coins and Fractional Paper Currency of The United States. John Wiley & Sons.

Ligazóns externas[editar | editar a fonte]

Traído desde «https://gl.wikipedia.org/w/index.php?title=Nova_Constellatio&oldid=6432191»