Muhu

Muhu

Localización
58°36′N 23°15′L
País	Estonia
Condados	Condado de Saare
Concello rural	Muhu Rural Municipality (en)
Poboación
Poboación	1.476 (2011) (7,2 hab./km²)
Xeografía
Parte de	arquipélago Moonsund
Superficie	204,86 km²
Bañado por	mar Báltico
Altitude	24 m
Identificador descritivo
Fuso horario	UTC+02:00

Muhu ou illa de Muhu é unha illa do arquipélago de Estonia occidental. Está situada na parte norte do golfo de Riga, separando o golfo do mar Báltico, entre a illa de Saaremaa e a Estonia continental. É a terceira illa máis grande de Estonia por superficie, despois de Saaremaa e Hiiumaa. A illa abrangue unha superficie de 207.9 km²

Administrativamente, xunto cos illotes veciños de Kesselaid, Viirelaid, Võilaid e Suurlaid, forma a parroquia de Muhu, un municipio rural independente, pertencente ao condado de Saare e no censo, en decembro de 2021, contaba cunha poboación de 1.646 persoas. No censo do 2000, eran 1.903 habitantes e no de 2011, 1.483 persoas).

Xeografía

A illa, denominábase, en alemán, Mohn e Moon. Moon é tamén o nome sueco da illa.

Os principais asentamentos son Kuivastu (porto de transbordadores), Liiva (centro administrativo) e Koguva (ten un conxunto de aldeas tradicionais e o Museo Muhu).

A illa está separada da Estonia continental polo Estreito Grande (en estoniano: Suur väin) e de Saaremaa polo Estreito Pequeno (en estoniano: Väike väin). Ao norte da illa, atópase o denominado "Mar dos Estreitos" (en estoniano: Väinameri, en alemán: Moonsund "Estreito da Lúa") atópase ao norte da illa. Está conectada por transbordador con Virtsu no continente e con Saaremaa por unha calzada, o Väinatamm. No inverno, unha estrada de xeo conecta a illa co continente.

Historia

En xaneiro de 1227, un exército dos Irmáns Livonianos da Espada xunto cos letóns, alemáns de Riga e livonianos nativos (20.000 homes comandados por Guillerme de Módena) cruzou sobre o xeo mariño desde o continente e atacou a illa de Saaremaa para reducir o último refuxio de estonianos pagáns. Os estonianos rendéronse en Muhu, nunha fortaleza circular chamada Mona, cuxos terrapléns aínda se conservan preto da calzada entre as illas. Isto puxo fin á Cruzada Estoniana.

A batalla de Karuse ou Batalla no Xeo librouse o 16 de febreiro de 1270 entre o Gran Ducado de Lituania e a Orde Livonia no conxelado Mar Báltico entre Muhu e o continente. Os lituanos lograron unha vitoria decisiva. A batalla, que leva o nome da aldea de Karuse, foi a quinta maior derrota das Ordes Livonias ou Teutónicas no século XIII.

Nas mesmas augas produciuse a Batalla de Moon Sound en setembro-outubro de 1917 entre as forzas navais rusas e alemás.

Transporte

Muhu está conectado co continente por frecuentes transbordadores de coches e pasaxeiros entre Virtsu (continente) e Kuivastu (Muhu), operados por TS Laevad. Os horarios e a venda de billetes ofrécense a través do portal oficial praamid.ee. Muhu está conectado con Saaremaa pola calzada de Väinatamm, inaugurada en 1896. Nos invernos moi fríos, a Administración de Transporte de Estonia pode abrir estradas de xeo oficiais, pero as aperturas son pouco frecuentes e están suxeitas a regras estritas; os viaxeiros deben confiar nos avisos oficiais actuais. Hai voos directos e regulares desde Talín ata Kuressaare, Saaremaa. Tárdase aproximadamente unha hora en coche desde o aeroporto de Kuressaare ata Muhu. En 2026, tamén se anunciaron voos directos dende Helsinqui, Finlandia.

Cultura

Muhu é coñecida por ter os únicos muíños de vento tradicionais de Estonia que aínda funcionan. Muhu tamén é coñecido polas súas medias de punto tradicionais.

En Pädaste, un hotel e spa de luxo de renome internacional opera na casa señorial restaurada. En outubro de 2025, anunciouse que o Hotel Pädaste cesaría as súas actividades e estaría pechado ao público. Outros establecementos son: Dharma Resort na aldea de Rässa; trátase dun resort de luxo situado nun bosque profundo.

Muhu é o fogar da primeira granxa de turismo enolóxico de Estonia: Luscher & Matiesen Muhu Winehouse

Localidades

Estas son as localidades de Muhu coa poboación a data de 31 de decembro de 2021.

• Aljava 14
• Hellamaa 114
• Igaküla 7
• Kallaste 79
• Kantsi 31
• Kapi 17
• Kesse 9
• Koguva 28
• Kuivastu 50
• Külasema 27
• Laheküla 18
• Lalli 8
• Leeskopa 13
• Lehtmetsa 32
• Lepiku 20
• Levalõpme 25
• Liiva 204
• Linnuse 71
• Lõetsa 60
• Mäla 42
• Mõega 18
• Mõisaküla 19
• Nautse 17
• Nõmmküla 72
• Nurme 18
• Oina 10
• Pädaste 58
• Päelda 16
• Paenase 34
• Pallasmaa 20
• Pärase 16
• Piiri 39
• Põitse 29
• Raegma 3
• Rannaküla 12
• Rässa 7
• Raugi 11
• Rebaski 3
• Ridasi 32
• Rinsi 22
• Rootsivere 34
• Simiste 45
• Soonda 24
• Suuremõisa 45
• Tamse 19
• Tupenurme 20
• Tusti 4
• Vahtraste 16
• Vanamõisa 23
• Viira 47
• Võiküla 10
• Võlla 24

Galería

• 
  Museo de Muhu.
• 
  Igrexa de Santa Catarina. Entre as igrexas máis antigas do país, construída sobre un lugar de culto pagán. Frescos que representan os apóstolos do século XIII.
• 
  Aldea antiga.
• 
  Muíño de vento, Koguva.
• 
  Acantilado de Üügu Pank, Kallaste.
• 
  Cemiterio de Muhu.
• 
  Lápida conmemorativa da fortaleza de Muhu.
• 
  Porto de Koguva.

Véxase tamén

Bibliografía

• Lott, Alexander (2018). The Estonian Straits: Exceptions to the Strait Regime of Innocent or Transit Passage (en inglés). Leiden: Brill. ISBN 9789004365049. 
• Rohtmets, Indrek (2006). A Cultural Guide to Estonia: Travel Companion (en inglés). Talín: Varrak. ISBN 9985310446. 

Outros artigos

• Lista de Illas do mar Báltico