É unha árbore de até 15 m de altura, con pólas novas cinsentas. Folla con pecíolo de 1,5–2cm e limbo de 4-6 por 4–5cm, máis ou menos ovado, subagudo, irregularmente dentado ou lobado, oblicuamente cordado, delgado, glabro agás ao longo da nerviación, verde clara. Infrutescencias (sorose) da lonxitude dos seus pedúnculos (2,5 por 1cm), brancas ou branco-rosadas, que son as amoras; adoitan resultar insípidas.[2]
A especie cultívase polas súas follas, único alimento dos vermes da seda, cuxos casulos se utilizan para fabricar seda.
Ademais do seu uso coma árbores de cultivo é frecuente o uso como ornamentais en xardíns urbanos e para obter sombra. En Galiza non é frecuente, mais aparece nalgúns parques de vilas e cidades, como é o caso do Campus Universitario da Xunqueira, en Pontevedra.
↑Nome vulgar galego en varias referencias: "Os cultivos agrícolas" en Vocabulario do medio agrícola, Santiago de Compostela, Dirección Xeral de Política Lingüística, 1988. Termos esenciais de botánica, Santiago de Compostela, Universidade, 2004. Vocabulario de ciencias naturais. Santiago de Compostela, Xunta, 1991. Gran dicionario Xerais da lingua galega. Vigo, Xerais, 2009 - https://aplicacions.usc.es/buscatermos/publica/buscas/busca.htm#15630068
