Moedas conmemorativas do centenario do primeiro voo
| Medio dólar | |
|---|---|
.png) |
.png) |
| A/: Monumento aos irmáns Wright en Kill Devil Hills.
Lendas: LIBERTY / IN GOD WE TRUST / WRIGHT MONUMENT |
R/: O Wright Flyer (1903) durante o seu primeiro voo.
Lendas: UNITED STATES OF AMERICA / E PLURUBUS UNUM / HALF DOLLAR. |
| |
As moedas conmemorativas do centenario do primeiro voo son unha serie numismática conmemorativa, non circulante, emitida pola Casa da Moeda dos Estados Unidos en 2003 e cuñada polas Cecas de Filadelfia e de West Point.
Esta serie foi autorizada pola Lei 105-193, do 14 de xullo de 1998,[1] pola que se dispuxo a emisión de tres moedas conmemorativas en lembranza do histórico voo de Orville e Wilbur Wright en Kitty Hawlk, Carolina do Norte, no seu centésimo aniversario.[2]
A serie está composta por unha moeda de medio dólar bañada en cuproníquel, un dólar de prata e unha moeda de ouro de dez dólares, que estiveron dispoñibles para a súa adquisición entre o 1 de agosto de 2003 e o 31 de xullo de 2004.[3] A lei que autorizaba a emisión prevía unhas tiraxes máximas de 750.000 exemplares para a moeda de medio dólar, 500.000 para a dun dólar e 100.000 para a moeda de 10 dólares.[2]
Unha parte dos ingresos orixinados pola comercialización desta serie foi destinada á First Flight Foundation, co fin de preparar, renovar e manter o Wright Brothers National Memorial Park, en Kill Devil Hills, Carolina do Norte.[2]
Moedas[editar | editar a fonte]
Medio dólar[editar | editar a fonte]
O medio dólar cuñouse na Casa da Moeda de Filadelfia, coa composición dun núcleo de cobre revestido de cuproníquel habitual nas moedas circulantes estadounidenses deste valor facial.[4][5]
No seu anverso, deseñado e gravado por John M. Mercanti, reprodúcese o monumento aos irmáns Wright situado en Kill Devil Hill, preto de Kitty Hawk, en Carolina do Norte, xunto cos lemas LIBERTY e IN GOD WE TRUST, habituais das moedas estadounidenses, a lenda WRIGHT MONUMENT, a data da emisión e a marca de gravador de John Mercanti, conformada polo monograma JM.[4][5]
Pola súa banda, o reverso, deseñado por Norman E. Nemeth e gravado por Donna Weaver, é unha recreación da coñecida fotografía titulada "O primeiro voo", na que se pode ver o Wright Flyer dos irmáns Wright, de 1903, realizando o histórico primeiro voo tripulado, pilotado por Orville Wright, en tanto que Wilbur observa desde o chan. Completan o reverso as lendas UNITED STATES OF AMERICA / E PLURIBUS UNUM HALF DOLLAR, así como a marca de ceca de Filadelfia e as marcas de gravador.[4][5]
Cuñáronse 166.832 exemplares desta moeda, deles 57.122 con acabamento estándar e 109.710 con acabamento especial proof —fondo espello e relevo mate—, o que supón unha das tiraxes máis baixas para unha moeda de medio dólar.[6] O prezo de venda da versión estándar foi de 10,75 dólares e o da versión proof de 13,50 dólares.[3][5]
Un dólar[editar | editar a fonte]
| Un dólar | |
|---|---|
 |
 |
| A/: Retrato dos irmáns Wright.
Lendas: LIBERTY / IN GOD WE TRUST / 1903 / 2003 / ORVILLE & WILBUR WRIGHT |
R/: O Wright Flyer (1903) sobrevoando unhas dunas.
Lendas: ONE DOLLAR / E PLURIBUS UNUM / UNITED STATES OF AMERICA |
| |
A moeda dun dólar cuñouse tamén na Casa da Moeda de Filadelfia, nunha aliaxe dcomposta polo 90 % de prata e o 10 % de cobre, habitual nas moedas conmemorativas dos Estados Unidos con este valor facial.[7][8]
No seu anverso, deseñado e gravado polo gravador da US Mint Thomas James Ferrel, reprodúcense os bustos acaroados dos irmáns Orville e Wilbur Bright ollando cara á esquerda, baseados no deseño clásico de George T. Morgan utilizado por primeira vez na medalla do Congreso concedida a Orville e Wilbur Wright o 4 de marzo de 1909.[3][9] Inclúense ademais os lemas LIBERTY e IN GOD WE TRUST, a lenda ORVILLE & WILBUR WRIGHT e a dobre data que alude ao centenario conmemorado e á data de emisión: 1903 - 2003. No ombreiro de Wilbur Wright apréciase tamén a marca de gravador de James Ferell (TJF).[7][8]
Pola súa banda, o reverso, deseñado e gravado por Norman E. Nemeth, é unha imaxe do avión Wright Flyer en voo sobre as dunas de Kill Devil Hill. Completan o reverso as lendas ONE DOLLAR / E PLURUBUS UNUM / UNITED STATES OF AMERICA, así como a marca de ceca correspondente á Casa da Moeda de Filadelfia (P) e a marca de gravador de Norman Nemeth (NEN).[7][8]
Cuñáronse 243.773 exemplares desta moeda, deles 53.533 con acabamento estándar e 190.240 con acabamento especial proof, o que supón unha das tiraxes máis baixas para unha moeda de medio dólar.[10] O prezo de venda da versión estándar foi de 33 dólares e o da versión proof de 37 dólares.[3][8]
10 dólares[editar | editar a fonte]
| Dez dólares | |
|---|---|
 |
 |
| A/: Retrato dos irmáns Wright.
Lendas: LIBERTY / IN GOD WE TRUST / 1903 / 2003 / ORVILLE & WILBUR WRIGHT / FIRST FLIGHT CENTENNIAL |
R/: O Wright Flyer (1903) sobrevoado por unha aguia.
Lendas: UNITED STATES OF AMERICA / E PLURIBUS UNUM / TEN DOLLARS |
De xeito diferente ás outras dúas moedas desta serie, a moeda de dez dólares foi producida na Casa da Moeda de West Point, en ouro de 900 milésimas.[11][12]
No seu anverso, deseñado e gravado por Donna Weaver, reprodúcense os bustos de fronte de Orville e Wilbur Bright, xunto cos lemas LIBERTY e IN GOD WE TRUST, as datas da conmemoración 1903 / 2003 e as lendas alusivas a ela, ORVILLE & WILBUR WRIGHT e FIRST FLIGHT CENTENNIAL. No ombreiro de Wilbur Wright apréciase tamén a marca de gravadora de Donna Weaver (DW).[11][12]
No relativo ao reverso, deseñado e gravado por Norman E. Nemeth, nel reprodúcese como motivo principal o avión Wright Flyer dos irmáns Wright en voo e cunha aguia sobrevoándoo. Completan o reverso o nome do país, o lema E PLURUBUS UNUM e a alusión ao valor facial da moeda, así como a marca de ceca correspondente á Casa da Moeda de West Point (W) e a marca de gravadora de Donna Weaver (DW).[11][12]
Cuñáronse 31.685 exemplares desta moeda, deles 10.009 con acabamento estándar e 21.676 con acabamento especial proof —fondo espello e relevo mate—.[10][12] O prezo de venda da versión estándar foi de 365 dólares e o da versión proof de 375 dólares.[3]
Notas[editar | editar a fonte]
- ↑ "Public Law 105-193 - JULY 14, 1998". Govinfo.gov
- ↑ 2,0 2,1 2,2 "First Flight Centennial Commemorative Coins". United States Mint.
- ↑ 3,0 3,1 3,2 3,3 3,4 "First Flight Centennial Commemorative Coins On Sale August 1". United States Mint.
- ↑ 4,0 4,1 4,2 "First in Flight Centennial Commemorative Clad Half Dollar Coin". United States Mint.
- ↑ 5,0 5,1 5,2 5,3 "½ Dollar First Flight Centennial". Numista.com
- ↑ "Historical Commemorative Coin Sales Figures: 2003 First Flight Centennial". United States Mint.
- ↑ 7,0 7,1 7,2 "First Flight Centennial Commemorative Silver Dollar Coin". United States Mint.
- ↑ 8,0 8,1 8,2 8,3 "1 Dollar First Flight Centennial". United States Mint.
- ↑ "Wright Brothers 'Medal of Congress'". Museum of Applied Arts & Sciences.
- ↑ 10,0 10,1 "Historical Commemorative Coin Sales Figures: 2003 First Flight Centennial". United States Mint.
- ↑ 11,0 11,1 11,2 "First in Flight Centennial Commemorative $10 Gold Coin". United States Mint.
- ↑ 12,0 12,1 12,2 12,3 "10 Dollars First Flight Centennial". Numista.com
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- "2003 First Flight Half Dollar" (ModernCommemoratives.com)
- "2003 First Flight Silver Dollar" (ModernCommemoratives.com)
- "2003 First Flight $10 Gold" (ModernCommemoratives.com)