Matraz volumétrico

Na Galipedia, a Wikipedia en galego.
Saltar ata a navegación Saltar á procura
Matraz volumétrico de pírex de 10 ml de capacidade

Un matraz volumétrico é un recipiente de vidro de laboratorio con forma de pera, fondo plano e colo longo e fino, que se emprega normalmente para preparar solucións de concentración previamente coñecida.

Adoitan fabricarse con materiais como o vidro, o vidro de borosilicato ou o polipropileno. Algúns contan cunha marca gravada ao redor do colo que indica un determinado volume de líquido, que é o contido a unha temperatura específica (habitualmente 20 °C); neste caso trátase dun matraz graduado para conter. Outros calíbranse para verter un volume determinado de líquido, tamén a unha temperatura determinada, baixo condicións específicas. Os primeiros son os máis frecuentes, xa que a exactitude dos matraces empregados para verter é menor, dada a dificultade para facelo sempre da mesma forma, e a factores tales como a diferente volatilidade ou viscosidade dos líquidos empregados.

A marca de volume rodea todo o colo de vidro, o que facilita determinar con precisión cando o líquido chega ata ela. A forma máis adecuada de medir volumes é facer chegar o líquido ata que a parte inferior do menisco estea tanxente á marca. O colo estreito do matraz permite aumentar a exactitude da medición, pois un pequeno cambio no volume produce un considerable aumento na altura do líquido.

Este tipo de matraces preséntanse en volumes que van desde os 10 ml ata os 2 l. Úsanse principalmente para preparar disolucións de concentración coñecida e exacta, seguindo un procedemento que comeza pesando a cantidade de soluto que se precisa, verténdoo no matraz e engadíndolle o disolvente ata un volume menor ca a súa capacidade. A seguir, disólvese ben o soluto e énchese o matraz ata a marca de volume (operación coñecida como "rasar"[1]).

Por causa da modificación do volume dos líquidos e do vidro cos cambios de temperatura, cómpre volver calibrar o material volumétrico cando vaia ser empregado a unha temperatura diferente daquela para a que foi calibrado. A calibración feita polo fabricante non se debe tomar por infalible, senón que debe ser comprobada para ter a seguridade de que a graduación está dentro das tolerancias esixidas polo traballo que se vai realizar.

Notas[editar | editar a fonte]