Maret

Na Galipedia, a Wikipedia en galego.
Saltar ata a navegación Saltar á procura
Maret
Nome completoMari Laura González González.
AliasMaret.
Nacemento6 de outubro do 1986.
OrixeCameixa (Boborás).
OcupaciónCantante e presentadora de televisión.
Instrumento(s)Voz.
Tempo en activo24 de xullo do 2011 - actualidade.
editar datos en Wikidata ]

Mari Laura González González, máis coñecida como Maret, nada en Cameixa (Boborás) o 6 de outubro de 1986, é unha cantante e presentadora de televisión galega.

Traxectoria[editar | editar a fonte]

Criouse percorrendo festas e romarías de Galicia co posto de polbo á feira familiar e conviviu coa música desde pequena, o seu pai toca o acordeón nunha charanga. A súa familia vive en Arcos, parroquia carballiñesa soada por ser o berce das pulpeiras.

Loitadora desde pequena, gústalle aparecer na televisión: xa con 11 anos participou en concursos como o Tequelexou.[1] Admiradora de Ana Kiro, cantou en Tardes con Ana, o emblemático talk-show da Televisión de Galicia. En 2008 foi finalista en Factor X, un concurso da canle Cuatro de televisión para buscar novos valores da canción.[2]

Gañadora da 1ª edición de Recantos, concurso de cantantes no programa Luar da Televisión de Galicia.[3] Desde outubro do 2010 ata xullo do 2011 competiron 20 concursantes representando a outros tantos recantos de Galicia, incluíndo a emigración. Maret foi a representante do Ribeiro. Ademais de posuír unha voz potente, afinada e cunha importante tesitura, destacaron as súas interpretacións emocionantes dominando o escenario. Revelouse tamén como a máis enxebre dos recanteiros, experta no repertorio das orquestras e das coplas populares, con moito sentido do humor, conversadora infatigable, sempre disposta a animar unha festa. Durante os distintos programas descubriunos os segredos de como facer un excelente licor café e o seu propio xeito de elaborar filloas estilo Maret (con luvas). Co seu poder de convocatoria encheu de seareiros a praza do Concello do Carballiño para gravar o vídeo de presentación para Luar. Grazas á votación popular mediante chamadas telefónicas conseguiu promocionar á segunda fase do concurso, na que o xurado foi outorgándolle as notas máis altas ata conseguir o único triplo 10 de todo o certame.

Defensora comprometida da nosa lingua, foi pregoeira do Correlingua de 2011 animando aos rapaces a utilizar o galego nas redes sociais.[4]

Ten publicado un disco titulado Maret no que interpreta temas con letras escritas por ela mesma.

A súa estrea como cantante profesional na televisión foi na Gala Especial do Apóstolo da TVG o 24 de xullo de 2011.

Como presentadora, comezou conducindo o programa Luar da TVG xunto a Xosé Ramón Gayoso durante a tempada 2011 -2012.[5]

Notas[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]