Para disolver a ameaza que presentaban os fascistas que chegaban ao alfoz da cidade, o goberno do primeiro ministro Luigi Facta pediu o estado de sitio para Roma. Porén, o Rei Vítor Manuel III negouse a firmar a orde. Isto significou que non ordenaron ao exército opoñerse aos fascistas. Os motivos da negativa do monarca foron discutidos, suxeríndose as teorías de que temía perder o trono se rexeitaba cooperar cos fascistas, que quería evitar unha guerra civil, e que esperaba neutralizar os fascistas asociándoos ao goberno nacional.
Mussolini, seguro do seu control sobre os acontecementos, estaba decidido a non aceptar nada que non fose o control do goberno, e o 29 de outubro o rei pediulle que aceptase o posto de primeiro ministro e que formase un gabinete. Viaxando desde Milán en tren, Mussolini formou goberno en Roma o 30 de outubro. Preto de 25.000 camisas negras foron transportados á cidade, onde marcharon nun triunfante desfile cerimonial o 31 de outubro.
