María Josefa Yzuel Giménez
| Biografía | |
|---|---|
| Nacemento | 1940  (83/84 anos)Jaca, España |
| Datos persoais | |
| País de nacionalidade | España |
| Educación | Universidade de Zaragoza Universidade Autónoma de Barcelona |
| Actividade | |
| Ocupación | profesora universitaria , física |
| Empregador | Universidade de Granada Universidade de Zaragoza Universidade Autónoma de Barcelona |
| Membro de | |
| Lingua | Lingua castelá |
Premios
| |
 | |
María Josefa Yzuel, nada en Jaca (Huesca) en 1940, é unha física española. En 1971 obtivo o título de Profesora Agregada de Universidade na área de física, converténdose na primeira muller en acadar esta titulación no estado español.[1]
Traxectoria[editar | editar a fonte]
Empezou a súa carreira científica na Universidade de Zaragoza onde se licenciou en Ciencias Físicas no ano 1962 e doutorouse en 1966. Obtivo o título de Profesora Agregada de Universidade en física no ano 1971, e en 1982 conseguiu ser Catedrática de Universidade.[2]
Ao comezo da súa actividade académica foi docente nas universidades de Granada e Zaragoza. Desde 1983 forma parte do persoal académico da Universidade Autónoma de Barcelona (UAB), onde traballa como profesora emérita. Na UAB, levou a cabo tarefas docentes, de investigación, e participou en diferentes órganos de goberno. A súa investigación centrouse sempre no campo da Óptica, contribuíndo con publicacións científicas e dirixindo teses doutorais.[3] Os últimos vinte anos estivo traballando en filtros de transmisión solar non uniforme para a mellora da calidade dos sistemas ópticos e lentes formadores de imaxes, na introdución da información de cor no proceso de recoñecemento óptico de formas e no uso e caracterización de pantallas de cristal líquido para a xeración de elementos ópticos difractivos.[4][5] Fundou o Laboratori de Processat d’Imatges na UAB e liderou o proxecto europeo A new 3D measurement technique for fast inspection of large, slightly unflat surfaces no programa Competitive and Sustainable Growth (2002-2005).[6]
Tamén é Académica Numeraria da Real Academia de Ciencias e Artes de Barcelona, da Academia de Ciencias de Granada e da Real Academia de Ciencias Exactas, Físicas, Químicas e Naturais de Zaragoza.[7][8]
Ao longo da súa traxectoria desempeñou diversos cargos como o de Presidenta da Sociedade Española de Óptica, e pertenceu a directiva de diversas asociacións como a International Society for Optics and Photonics (SPIE).[9]
Na súa carreira manifestou o seu interese e compromiso na promoción do papel das mulleres na ciencia. É socia da Asociación de Mulleres Investigadoras e Tecnólogas (AMIT) e participa activamente nas actividades do nodo catalán desta asociación (AMIT-cat) e foi unha das fundadoras do Grupo Mulleres na Física da Real Sociedade Española de Física. Este traballo en favor dos dereitos das mulleres foi recoñecido e premiado pola UAB no 2011.[2]
É unha das mulleres cuxa biografía se inclúe no libro Aragonesas con voz propia.[10]
Na súa honra The International Society for Optics and Photonics (SPIE) entrega o Premio M. Josefa Yzuel Educator Award, en recoñecemento a contribucións excepcionais no campo da educación en óptica.[11]
Premios e recoñecementos[editar | editar a fonte]
En 2012 foi nomeada doutora honoris causa pola Universidade Miguel Hernández de Elxe.[12]
En 2013 recibiu a Orde de Afonso X o Sabio.[2]
Premio de Física da Real Sociedade Española de Física - Fundación BBVA (2014) por unha “traxectoria científica e académica que impulsou notablemente o campo da Óptica a nivel nacional, ademais de estar presente de forma destacada en foros internacionais”.[13]
Notas[editar | editar a fonte]
- ↑ "María Josefa Yzuel, física". Mujeres con ciencia (en castelán). 2015-11-16. Consultado o 2020-05-16.
- ↑ 2,0 2,1 2,2 "María Josefa Yzuel Giménez". AMIT (en castelán). 2015-11-09. Consultado o 2020-05-16.
- ↑ "Publicaciones en Google Academics". Consultado o 30 de abril de 2014.
- ↑ Escalera Merino, Juan Carlos (1991). "Influencia de filtros de transmision no uniforme y dependientes de la longitud de onda sobre la calidad de la imagen policromatica de los sistemas opticos" (en castelán). Universitat Autònoma de Barcelona.
- ↑ Octavi López Coronado (Tesis doctoral) (julio de 2007). "Control de la respuesta de un sistema óptico mediante pupilas de transmisión no uniforme y lentes multiplexadas" (PDF).
- ↑ "Laboratori d'Òptica UAB". Arquivado dende o orixinal o 18 de marzo de 2014. Consultado o 18 març 2013.
- ↑ "Real Acadèmia de Ciències i Arts de Barcelona". Arquivado dende o orixinal o 03 de agosto de 2016. Consultado o 16 de maio de 2020.
- ↑ "Academia de Ciencias de Granada". Arquivado dende o orixinal o 18 de marzo de 2014. Consultado o 20 de marzo de 2014.
- ↑ "International Society for Optics and Photonics".
- ↑ Domene Benito (2019). Aragonesas con voz propia. ISBN 978-84-09-09169-0.
- ↑ "Premio M. Josefa Yzuel SPIE".
- ↑ "M. Josefa Yzuel será investida doctora honoris causa por la UMH - UAB Barcelona". www.uab.cat. Consultado o 2020-05-19.
- ↑ "Fundación BBVA- Premios".
