Manuel García, Buciños

Manuel García, Buciños
Nacemento	10 de decembro de 1938
	Buciños
Nacionalidade	España
Ocupación	escultor
Coñecido/a por	Monumento ó libro e Familia
Premios	Premio Otero Pedrayo
[ editar datos en Wikidata ]

Manuel García Vázquez, chamado Buciños, nado o 10 de decembro de 1938 en Buciños (Carballedo) é un escultor galego. A vila de orixe deste escultor rematou por configurar o seu nome ata o punto de ser coñecido polo citado topónimo, coma se realmente fose o seu primeiro apelido.

Traxectoria profesional

A Rianxeira, escultura en Rianxo.

Practicamente, toda a súa obra realizouna en Ourense, vinculado ao grupo que auspiciou o escritor Vicente Risco, e que reunía a novos artistas na taberna de Tucho, e que foi denominado Os Artistiñas pola súa extrema mocidade. Do grupo formaban parte Xaime Quessada Porto, Xosé Luís de Dios, Acisclo Manzano, Xavier Pousa e Arturo Baltar.

Estatua a Castelao, cando estaba xunto ao Museo de Pontevedra.

Comezou traballando a madeira, e inicialmente acusou influencias de Cristino Mallo e talvez de Antón Failde Gago, onde aproveitaba as vetas para simular roupaxes e pregas. Máis tarde traballaría o bronce e con frecuencia acudiu ás oquedades, a imaxinarios «rotos» na morfoloxía das súas pezas, que vagamente o identificarían con Henry Moore, aínda que quizais teña influencias de Julio González. As curvas pronunciadas e os volumes a un tempo rotundos e suaves danlle á escultura de Buciños unha moi definida personalidade.

Seis figuras alegóricas (pintura, teatro, escultura, literatura, cine e música) entre os cabalos de Oliveira no Teatro García Barbón.

Realizou numerosas exposicións en España e no estranxeiro. Está representado en todos os museos de Galiza e en numerosas institucións públicas e coleccións particulares. Os seus monumentos, a personaxes históricos ou con afán puramente ornamental, abundan nas cidades galegas. Habitualmente traballa formatos pequenos, aínda que tamén ten practicado a monumentalidade.

Forma parte da galería de personaxes ilustres de Carballedo.

Véxase tamén

Bibliografía

• Pablos, Francisco: Pousa e Buciños. Santiago, Xunta de Galicia, 1994.
• Pablos, Francisco: Plástica galega. Vigo, Caja de Ahorros Municipal de Vigo, 1981.
• Trabazo, Luis: Pedra, barro, bronce. Ourense, Deputación provincial, 1978.

Ligazóns externas

• Manuel García, Buciños na Colección Afundación.