Katharine Murray Lyell

Na Galipedia, a Wikipedia en galego.
Saltar ata a navegación Saltar á procura
Katharine Murray Lyell
Nacemento1817
 Inglaterra
Falecemento1915
 Londres
NacionalidadeReino Unido de Gran Bretaña e Irlanda
Ocupaciónbotánica, escritor/a técnico/a, taxonomista, pteridóloga e editora literaria
editar datos en Wikidata ]
Portada do libro de Katharine Murray Lyell (1870) A Geographical Handbook of All the Known Ferns. (O título aparece cortado)

Katharine Murray Lyell, nada en 1817 e finada en 1915, foi unha botánica británica, autora dun libro pioneiro sobre a distribución mundial dos fentos e editora de volumes da correspondencia entre moitos dos científicos notábeis da súa época.

Biografía[editar | editar a fonte]

Katharine Murray Horner era unha das seis fillas do comerciante e xeólogo escocés Leonard Horner. Leonard Horner deulle unha boa educación ás súas fillas e levábas ás reunións da British Association for the Advancement of Science.[1]

A irmá máis vella de Katharine, Mary, era xeóloga e conquilóloga. Casou co xeólogo Charles Lyell. Katharine Horner casou despois co irmán máis novo de Lyell, Henry. O seu fillo máis vello, Leonard, chegou a ser membro Parlamento británico.

Traxectoria[editar | editar a fonte]

Como botánica, Katharine Lyell especializouse nos fentos e en 1870 publicou un volume sobre a distribución xeográfica dos fentos no planeta. No seu prólogo recoñece o moito que lle debía a William Jackson Hooker e ó seu compendio inacabado de fentos, Synopsis Filicum (publicado postumamente en 1868). Porén, o libro de Lyell foi o primeiro que usaba unha organización xeográfica no canto da habitual organización por taxonomía. Ela viaxou á India con Henry, onde recolleu plantas en varias rexións, entre elas o delta do Ganges, e carteouse con ilustres vitorianos da súa época, como os científicos Alfred Russel Wallace e Charles Darwin e a misioneira Harriette Colenso (quen lle recolleu fentos).[2] A súa colección de fentos está repartida entre os Kew Gardens e o Herbario da Universidade de Reading (RNG), mentres que o resto das súas outras plantas foron parar ao Museo Británico.

Lyell tamén editou varios libros de memorias e de correspondencia de tres destacados científicos do seu día. Cando o seu cuñado Charles morreu en 1875, converteuse na compiladora e editora dunha obra en dous volumes da súa biografía, diarios e correspondencia.[3] Unha década máis tarde, trala morte do seu pai, editou as súas cartas nunha obra en dous volumes. Tamén editou a biografía e cartas doutro dos seus cuñados, Charles Bunbury, un afamado paleobotánico. Todas estas obras seguen a ser un material de referencia para as persoas que investigan este período.

A abreviatura estándar de autoría K. Lyell úsase para indicar esta persoa cando se cita un nome botánico.

Obra[editar | editar a fonte]

  • Katharine Lyell. A Geographical Handbook of All the Known Ferns: With Tables to Show Their Distribution. London: John Murray, 1870.
  • Katharine Lyell, ed. The Life, Letters and Journals of Sir Charles Lyell. London: John Murray, 1881.
  • Katharine Lyell, ed. Memoir of Leonard Horner, F.R.S., F.G.S.: Consisting of Letters to his Family and from Some of his Friends. London: Women's Printing Society, 1890.
  • Katharine Lyell, ed. The Life and Letters of Sir Charles J.F. Bunbury. London: John Murray, 1906.

Notas[editar | editar a fonte]

  1. Ogilvie, Marilyn, and Joy Harvey. The biographical dictionary of women in science: pioneering lives from ancient times to the mid-20th century. Routledge, 2003.
  2. Guy, Jeff. The View Across the River: Harriette Colenso and the Zulu Struggle Against Imperialism. New Africa Books, 2001.
  3. Mary Lyell, quen en teoría era a máis indicada para realizar esta tarefa morrera en 1873.

Véxase tamén[editar | editar a fonte]

Outros artigos[editar | editar a fonte]