Helmut Rizzolli
| Biografía | |
|---|---|
| Nacemento | 1940 Bolzano, Provincia autónoma de Bolzano.  Italia. |
| País de nacionalidade | Italiano. |
| Educación | Universidade de Florencia. Universidade de Innsbruck. |
| Tese académica | Historia das moedas da antiga rexión do Tirol antes de 1363. |
| Actividade | |
| Campo de traballo | Numismática, etnografía, empresa. |
| Ocupación | historiador, arqueólogo, numismático  |
| Empregador | Universidade de Innsbruck. |
| Membro de | Fundación Castelos de Bolsano. Asociación para o Embelecemento e a Protección da Patria de Bolzano-Tirol do Sur. |
| Familia | |
| Fillos | Thomas Rizzolli. |
| Pais | Franz Rizzolli e Alberta Pattis |
| Premios | |
| 2021: Medalla Eckhel. | |
Helmut Rizzolli nado en Bolzano, Trentino-Tirol do Sur, en 1940, é un empresario, numismático e etnógrafo do Tirol do Sur italiano, experto en traxes tradicionais.
Traxectoria
[editar | editar a fonte]Economista e empresario
[editar | editar a fonte]Helmut Rizzolli naceu en Bolzano en 1940, fillo de Alberta Pattis (1900-1990)[1] e de Felix Rizzolli (1883-1976).[2] Cursou estudos de Historia Económica na Universidade de Florencia, onde entre outros tivo como profesor a Armando Sapori, e nela acadou o seu doutoramento en Economía en 1963.[3][4]
Logo do seu período formativo fíxose cargo do negocio familiar de fabricación de sombreiros e calzado en Bolsano, fundada polo seu avó, Franz Rizzolli, en 1870. En 2000, Helmut Rizzolli traspasoulle a compañía ao seu fillo Thomas. Paralelamente á súa actividade empresarial, ata 1979 impartiu tamén clases de Economía na Handelsoberschule de Bolzano, un instituto de secundaria especializado en economía.[4]
Numismático e etnógrafo
[editar | editar a fonte]Helmut Rizzolli cursou tamén estudos superiores de Historia na Universidade de Innsbruck, e igualmente acadou en 1988 un doutoramento nesta disciplina, cunha tese acerca da historia das moedas da antiga rexión do Tirol antes de 1363,[5] que foi publicada en 1991.[3][4][6]
Cando en 2000 se viu liberado das súas obrigas empresariais e xa con 60 anos, Rizzolli accedeu a un posto de profesor posdoutoral de Arqueoloxía Medieval e Posmedieval na Universidade de Innsbruck, e focalizou as súas investigacións e os seus estudos nos sistemas monetarios e de cuñaxe monetaria. Redactou daquela unha tese posdoutoral para a súa habilitación como docente nesa universidade, que pasou a se converter no segundo volume do seu dedicado ás moedas tirolesas, este publicado en 2006.[7] O 2 de xullo de 2012, Rizzolli recibiu na Universidade de Innsbruck o título de profesor honorario.[3][4]
Á parte dos mencionados, Helmut Rizzolli publicou numerosos traballos acerca da historia económica e monetaria do Tirol e do norte de Italia. Nas súas publicacións adoita cuestionar os acontecementos históricos e reinterpretalos desde o punto de vista da historia económica.[4]
Ademais da numismática, outro dos focos de interese de Helmut Rizzolli foi a vestimenta dos labregos da antiga rexión tirolesa.[8] En 1985, foi elixido presidente do grupo de traballo "Traxe vivente" dentro da Asociación do Patrimonio do Tirol do Sur.[9] Rizzolli preside igualmente o grupo de traballo "O noso traxe", dedicado á recuperación e á preservación dos traxes folclóricos históricos da rexión do Alto Tirol.[10]
Como presidente da Asociación para o Embelecemento e a Protección da Patria de Bolzano-Tirol do Sur, apoiou a conservación da natureza e da paisaxe arquitectónica desa rexión. En 1995 accedeu á política local dentro do Partido Popular de Tirol do Sur (SVP) e converteuse en concelleiro en Bolsano, encargado da economía durante un lustro e presidente da Comisión de Urbanismo durante 10 anos. Desde ese posto impulsou a restauración dos dous castelos locais, que finalizou, respectivamente, en 2014 e en 2020. En 2007, Rizzolli accedeu á presidencia da Fundación Castelos de Bolzano.[4] Logo da súa retirada da actividade política activa, seguiu a formar parte do comité de coordinación do partido SVP de Bolzano.[11]
Recoñecementos
[editar | editar a fonte]- 2009: Cruz de Ouro ao Mérito, da República de Austria.[4]
- 2021: Medalla Eckhel, da Sociedade Numismática Austríaca.[12]
Publicacións
[editar | editar a fonte]Estes son algúns dos traballos monográficos máis representativos publicados por Helmut Rizzolli ao longo da súa traxectoria:
Monografías
[editar | editar a fonte]- (1979). Le monete coniate a Merano. Cassa di Risparmio della Provincia di Bolzano.
- (1991-2006). Münzgeschichte des alttirolerischen Raumes im Mittelalter und Corpus nummorum tirolensium mediaevalium. Bozen Athesia, Merano.
- (1991). Tomo 1: Die Münzstätten Brixen/Innsbruck, Trient, Lienz und Meran vor 1363. ISBN 9788870146400
- (2006). Tomo 2: Die Meraner Münzstätte unter den Habsburgern bis 1477 und die Görzische Prägestätte Lienz/Toblach. ISBN 9788882662615
- (2007). Unsere Trachtenfibel: Leitfaden zum Tragen und Anfertigen unserer Tiroler Volkstrachten. Athesia Spectrum. ISBN 9788860111135
- (2015). L’area monetaria veronese (con F. Pigozzo). Fondzione Castelli di Bolzano. ISBN 9788868391409
- (2020). Mensch und Jagd in Alttirol (con H. Aukenthaler). Athesia Buch. ISBN 9788868395056
- (2021). Mittelalterliches Geld- und Bankwesen zwischen Alpen und Adria. Athesia Verlag. ISBN 9788868395476
Notas
[editar | editar a fonte]- ↑ "Alberta Rizzolli zum Gedenken". En Dolomiten. Nº 134. 13 de xuño de 1990. Páxina 21.
- ↑ "Felix Rizzolli zum Gedenken". En Dolomiten. Nº 285. 15 de decembro de 1976.
- ↑ 3,0 3,1 3,2 "Hon.-Prof. Univ.-Doz. DDr. Helmut Rizzolli". Universität Innsbruck (uibk.ac.at).
- ↑ 4,0 4,1 4,2 4,3 4,4 4,5 4,6 "Rizzolli, Helmut". Coins Weekly. 29 de xuño de 2016.
- ↑ Ficha da tese: "Münzgeschichte des alttirolischen Raumes vor dem Auftreten der Rudolfkreuzer und -vierer : Prägungen der Münzstätten Brixen-Innsbruck, Trient, Lienz und Meran". Search.obvsg.at
- ↑ Véxase "(1991)" en "Publicacións".
- ↑ Véxase "(2006)" en "Publicacións".
- ↑ "Die Südtiroler Tracht" (entrevista con Helmut Rizzolli). En Die Baz (DieBaz.com). 16 de marzo de 2018
- ↑ "Arbeitsgemeinschaft Lebendige Tracht". Heimatpflegeverband Südtirol (hpv.bz.it).
- ↑ "Unsere Tracht". Unsere-tracht.info
- ↑ "Kampf um den Stadtobmann". En Salto (Salto.bz). 17 de maio de 2022.
- ↑ "Eckhel-Medaille". Österreichische Numismatische Gesellschaft (Oeng.at).
