Heinrich Rickert

Heinrich Rickert
Nacemento	25 de maio de 1863
Lugar de nacemento	Gdańsk
Falecemento	25 de xullo de 1936
Lugar de falecemento	Heidelberg
Nacionalidade	Alemaña
Alma máter	Universidade Humboldt de Berlín e Universidade de Estrasburgo
Ocupación	filósofo e profesor universitario
Pai	Heinrich Rickert
Fillos	Arnold Rickert, Heinrich Rickert e Franz Rickert
Irmáns	Franz Rickert
[ editar datos en Wikidata ]

Heinrich Rickert, nado en Danzig en 1863 e finado en Heidelberg en 1936, foi un filósofo alemán.

Traxectoria

Foi profesor na Universidade de Friburgo desde 1891, onde tivo como alumno a Martin Heidegger. Sucedeu en 1916 a Wilhelm Windelband na cátedra de filosofía en Heidelberg.

Integrado na escola neokantiana de Baden, desenvolveu unha "filosofía dos valores" como a prioris nos que fundar unha conceptualización científica no campo das ciencias culturais. Desta forma Rickert pensaba superar o relativismo historicista e completar ó mesmo tempo a reflexión kantiana sobre as ciencias da natureza. Os valores terían un rango ontolóxico propio diferente das realidades físicas e tamén psíquicas, pero podendo residir nun obxecto, transformándoo nun ben, ou nos actos dun suxeito, converténdoo en algo valorable.

O obxectivo das ciencias culturais consistiría en poñer en relación os feitos por elas estudados con algún valor. Agora ben, non concibe a valoración do investigador como unha arbitrariedade guiada subxectivamente, senón como unha actividade na que se debe constatar os valores que de feito actúan social e historicamente. É dicir, non se trata dunha valoración práctica (Ética), senón dunha valoración teórica (Ciencia). Pódese dicir que Rickert se sitúa a medio camiño entre as filosofías naturalistas e as filosofías vitalistas que dominaron as primeiras décadas do século XX.

Como obras salientables mencionaremos Ciencias culturais e ciencias naturais (1899), Os límites da conceptualización naturalista (1896-1902) e Filosofía da vida (1920).