Heartstopper, que se podería traducir en galego como Parador-de-corazóns, é unha serie de televisiónbritánica de Netflix. É unha adaptación da novela gráfica homónima de Alice Oseman. A serie foi escrita pola propia Oseman, e conta a historia de Charlie Spring (Joe Locke), un estudante de secundaria homosexual que se namora do seu compañeiro Nick Nelson (Kit Connor), que senta ao pé del na clase. Tamén explora as vidas de Tao (William Gao), Elle (Yasmin Finney), Tara (Corinna Brown) e Darcy (Kizzy Edgell).
Os dereitos de televisión da serie foron adquiridos por See-Saw Films en 2019, e Netflix mercou os dereitos de distribución en 2021. Euros Lyn é o director da serie. A rodaxe da primeira tempada produciuse dende abril até xuño dese ano. Varias cancións preexistentes foron utilizadas como banda sonora da serie ademais dunha partitura orixinal de Adiescar Chase. Os estilos cinematográficos e a gradación de cores planificáronse de antemán para darlle á serie unha elegancia atmosférica, amplificada polo uso da animación tradicional adaptada do material orixinal.
Heartstopper estreouse o 22 de abril de 2022. Recibiu aclamación da crítica, en particular polo seu ton e ritmo, así como pola súa representación da comunidade LGBT. Gañou popularidade instantaneamente, e situouse entre as 10 mellores series inglesas de Netflix en só dous días. Tamén provocou o aumento da sona das novelas gráficas, así como das cancións da serie. Isto acabou levando por exemplo a que en setembro de 2024 se publicase a tradución galega de Heartstopper (Xerais).
O 20 de maio de 2022, anunciouse que Heartstopper tería unha segunda e terceira tempadas.
Despois da estrea da serie, o primeiro volume da novela gráfica de Oseman, Heartstopper, converteuse no máis vendido libro xuvenil do Reino Unido.[1] As cancións que aparecen na serie recibiron grandes aumentos nas vendas e nas emisións das listas. As cancións da banda sonora que aumentaron as vendas das listas en comparación coa semana anterior incluíron "Want Me" e "Dover Beach" de Baby Queen, "Why Am I Like This" de Orla Gartland e "I Belong In Your Arms" de Chairlift.[2]
