Luigi Riva

Gigi Riva
Información persoal
Nome	Luigi Riva
Nacemento	7 de novembro de 1944
Lugar de nacemento	Leggiuno, Italia
Falecemento	22 de xaneiro de 2024
Lugar de falecemento	Cagliari
Altura	1,80
Posición	Dianteiro
Carreira xuvenil
1959-1962	Laveno Mombello
Carreira sénior
Anos	Equipos	Aprs	(Gls)
1962-1963	AC Legnano	22	(5)
1963-1976	Cagliari Calcio	315	(164)
Total		337	(169)
Selección nacional
1965–1974	Italia	42	(35)
Na rede
Partidos e goles só en liga doméstica. [ editar datos en Wikidata ]

Luigi Riva máis coñecido coma Gigi Riva, nado o 7 de novembro de 1944 en Leggiuno, Provincia de Varese, e finado o 22 de xaneiro de 2024 en Cagliari, foi un futbolista italiano que xogaba na demarcación de dianteiro centro. Considerada a máxima figura histórica do Cagliari Calcio, xogou 13 anos no equipo sardo, co que marcou 207 goles en 374 partidos oficiais. Participou do primeiro ascenso do club á Serie A e liderou o equipo na conquista do seu único título de liga na tempada 1969/70.

É o máximo goleador da historia da selección de Italia, coa que marcou 35 goles entre 1965 e 1974. Gañou coa selección a Eurocopa de 1968 e foi finalista no Mundial de 1970.

Traxectoria

Comezou xogando no AC Legnano, da Serie C italiana, na tempada 1962/63. Porén, ao ano seguinte xa fichou polo club no que desenvolveu o resto da súa carreira futbolística, o Cagliari Calcio, co que debutou en setembro de 1963. Neste equipo proclamouse capocannoniere, máximo goleador da Serie A, en tres ocasións (1967, 1969 e 1970). Rexeitou importante ofertas de clubs como a Juventus FC e foi sempre fiel ao club sardo, que viviu con el os mellores anos da súa historia, conquistando o título de liga na tempada 1969/70.

Quizais os seus número non son tan bos como poderían telo sido a causa das numerosas lesións que sufriu xogando coa selección italiana, fractura da tibia e peroné da perna esquerda en 1967, dobre fractura da tibia e peroné da perna dereita en 1970 e finalmente unha grave lesión nos abdutores que o obrigou a retirarse.

No ano 2005 o Cagliari decidiu retirar o dorsal número 11 na súa honra.

Coa selección

Debutou coa selección de fútbol de Italia con 20 anos, o 27 de xuño de 1965, porén non iría convocado ao Mundial de Fútbol de 1966. Pese a este comezo e as lesións fíxose cun posto fixo no once da selección e axudou a consecución da Eurocopa de 1968 e o segundo posto no Mundial de 1970. Especialmente recordados son o gol que anotou ante Iugoslavia na final da Eurocopa ou a semifinal do Mundial de 1970 ante Alemaña Federal. Tamén participou no Mundial de 1974 no que a selección italiana fracasou ao quedar eliminada na primeira fase.

O 20 de outubro de 1973 anotou o seu último gol coa selección, o número 35, superando a Giuseppe Meazza e establecendo o récord de máximo goleador que se mantén ata a actualidade.

Palmarés

Co Cagliari Calcio:

• Campión da Serie A: 1970.
• Subcampión da Serie A: 1969.

Coa Selección de fútbol de Italia:

• Campión da Eurocopa de Fútbol: 1968.
• Subcampión do Mundial de Fútbol: 1970.

Títulos individuais:

• Máximo goleador da Serie A: 1967, 1969 e 1970.
• Máximo goleador da Selección de Italia
• Segundo clasificado no Balón de Ouro: 1969.
• Terceiro clasificado no Balón de Ouro: 1970.

Véxase tamén

Ligazóns externas

• Artigo na páxina web da FIFA Arquivado 01 de febreiro de 2014 en Wayback Machine. (en inglés)
• Estatísticas nos Mundiais Arquivado 01 de febreiro de 2014 en Wayback Machine. (en castelán)