Giacomo Quagliata
 (2020)  | |
| Biografía | |
|---|---|
| Nacemento | 19 de febreiro de 2000 (26 anos) Palermo |
| Altura | 177 cm |
| Actividade | |
| Ocupación | futbolista |
| Nacionalidade deportiva | Italia |
| Deporte | fútbol |
| Posición de xogo | Defensa |
Giacomo Quagliata, nado en Palermo o 19 de febreiro de 2000, é un futbolista italiano, que xoga como lateral esquerdo no Deportivo da Coruña, da Primeira División.
Traxectoria
[editar | editar a fonte]Comezos
[editar | editar a fonte]Nado en Palermo, comezou a xogar na escola de fútbol que dirixía seu avó, pasando con dez anos á Polisportiva Calcio Sicilia.[1] Durante eses anos formou parte de xeito habitual das seleccións da LND en torneos rexionais e nacionais, incluída a Copa Gaetano Scirea, disputada en 2016.[2]
Pro Vercelli
[editar | editar a fonte]No verán dese mesmo ano someteuse a unha proba co Pro Vercelli e así entrou a formar parte do equipo xuvenil do club piemontés, onde xogou durante dúas tempadas.[3]
Cesión ao Latina
[editar | editar a fonte]No verán de 2018 foi cedido ao Latina,[4] co que debutou na Copa Italia Serie D, nun encontro ante o Vis Artena. O 2 de decembro do mesmo ano marcou os seus primeiros goles, nun partido da Serie D ante o Ladispoli.[5]
Cesión ao Bari
[editar | editar a fonte]Con todo, en xaneiro de 2019 púxose fin á súa cesión e na segunda parte da tempada xogou tamén a préstamo no Bari, club histórico da Puglia que acababa de ser refundado trala súa creba.[6] Con este equipo proclamouse campión da Serie D e logrou o ascenso á Serie C.
Regreso ao Pro Vercelli
[editar | editar a fonte]Para a tempada 2019/20 regresou ao Pro Vercelli e foi confirmado polo novo adestrador Alberto Gilardino para formar parte do equipo. Xogou 16 partidos na Serie C e dous na Copa Italia da categoría, todos como titular. O 5 de outubro de 2019 disputou o derbi contra o Novara, proporcionándolle a asistencia a Gianmario Comi no único gol do partido, só 16 segundos do saque inicial. Nese encontro chamou a atención dun observador do Heracles Almelo, da Eredivisie neerlandesa.[7]
Heracles Almelo
[editar | editar a fonte]En xaneiro de 2020 foi contratado oficialmente polo Heracles Almelo, ao que chegou para ocupar o oco deixado por Lennart Czyborra. Converteuse así no primeiro futbolista italiano da historia do club.[7][8] Inicialmente foi asignado ao equipo filial e o seu debut co primeiro equipo viuse adiado por mor da pandemia de COVID-19.
Finalmente, despois de debutar co Heracles ante o Telstar na Copa dos Países Baixos, o lateral siciliano disputou o seu primeiro partido na Eredivisie o 22 de novembro de 2020, entrando na segunda metade dunha derrota por 5-0 ante o Ajax.[9] Aínda que comezou a tempada á sombra de Jeff Hardeveld, acabou facéndose coa titularidade no equipo dirixido por Frank Wormuth, posición que consolidou trala marcha de Hardeveld.[10] O 3 de abril de 2022 anotou o seu primeiro gol como profesional, abrindo o marcador na vitoria por 2-0 en liga sobre o Fortuna Sittard, converténdose no cuarto italiano en marcar un gol na Eredivisie, despois de Marco De Marchi, Kingsley Boateng e Graziano Pellè.[11][12] Deixou o club de Overijssel tralo descenso deste ao remate da tempada 2021/22, cun balance total de 58 partidos oficiais, un gol e cinco asistencias.[11]
Cremonese
[editar | editar a fonte]A continuación regresou a Italia, fichando definitivamente pola Cremonese, que viña de ascender á Serie A.[13] Debutou cun gol na Copa Italia contra o Ternana e seis días despois disputou ante a Fiorentina o seu primeiro encontro na Serie A.[14][15] Nos seguintes dous anos e medio acadou os 72 encontros co club lombardo, a maioría deles saíndo dende o banco de suplentes, e sumou un gol e catro asistencias. Viviu un descenso á Serie B na súa primeira campaña e na seguinte disputou sen éxito a promoción de ascenso.
Cesión ao Catanzaro
[editar | editar a fonte]O 18 de xaneiro de 2025 foi cedido ao Catanzaro, da Serie B.[16][17] Co club calabrés xogou un total de 18 partidos, sumando dous goles e disputando de novo sen éxito a promoción de ascenso.[18]
Deportivo da Coruña
[editar | editar a fonte]En xullo de 2025 anunciouse a súa fichaxe polo Deportivo da Coruña, da Segunda División.[19] Debutou na segunda xornada ante o Burgos CF en Riazor e axiña se fixo coa titularidade por diante do veterano Sergio Escudero.[1] Rendeu a un gran nivel, xogando tanto de lateral como en posicións máis ofensivas, e sumou dous goles en senllos partidos contra o Córdoba. Disputou un total de 40 encontros, 36 deles como titular, nunha campaña que culminou co ascenso á Primeira División.[20] Debutou na máxima categoría na primeira xornada da tempada 2026/27 contra o Elche en Riazor, saíndo como titular no lateral esquerdo.[21]
Selección italiana
[editar | editar a fonte]O 16 de novembro de 2021 debutou coa selección italiana sub-21, da man do adestrador Paolo Nicolato,[22] nun amigable contra a selección romanesa.[23] O 14 de xuño de 2022 marcou o seu primeiro e único gol co equipo nacional, nunha vitoria por 4-1 sobre Irlanda que significou a clasificación de Italia para a Eurocopa sub-21 de 2023.[24]
Estatísticas
[editar | editar a fonte]| Club | Tempada | División | Liga | Copa | Outros[a 1] | Total | ||||
|---|---|---|---|---|---|---|---|---|---|---|
| Partidos | Goles | Partidos | Goles | Partidos | Goles | Partidos | Goles | |||
| Latina | 2018/19 | Serie D | 19 | 2 | 1 | 0 | - | - | 20 | 2 |
| Bari | 2018/19 | Serie D | 13 | 0 | 0 | 0 | 1 | 0 | 14 | 0 |
| Pro Vercelli | 2019/20 | Serie C | 16 | 0 | 2 | 0 | - | - | 18 | 0 |
| Heracles Almelo | 2020/21 | Eredivisie | 25 | 0 | 1 | 0 | - | - | 26 | 0 |
| 2021/22 | Eredivisie | 29 | 1 | 1 | 0 | 2 | 0 | 32 | 1 | |
| Total club | 54 | 1 | 2 | 0 | 2 | 0 | 58 | 1 | ||
| Cremonese | 2022/23 | Serie A | 20 | 0 | 4 | 1 | - | - | 24 | 1 |
| 2023/24 | Serie B | 30 | 0 | 3 | 0 | 3 | 0 | 36 | 0 | |
| 2024/25 | Serie B | 11 | 0 | 1 | 0 | - | - | 12 | 0 | |
| Total club | 61 | 0 | 8 | 1 | 3 | 0 | 72 | 1 | ||
| Catanzaro | 2024/25 | Serie B | 15 | 2 | 0 | 0 | 3 | 0 | 18 | 2 |
| Deportivo da Coruña | 2025/26 | Segunda | 38 | 2 | 2 | 0 | - | - | 40 | 2 |
| Total carreira | 216 | 7 | 15 | 1 | 9 | 0 | 240 | 8 | ||
- ↑ Inclúe partidos da fase final polo scudetto da Serie D, promoción de ascenso á Serie A e promoción de permanencia na Eredivisie.
Notas
[editar | editar a fonte]- 1 2 "Quagliata, el lateral que impulsó Gilardino se hace con la banda zurda del Deportivo" (en castelán). 30 de setembro de 2025. Consultado o 22 de xuño de 2026.
- ↑ "Chiamata azzurra per l'ex Under 16 LND Giacomo Quagliata" (en italiano). 11 de novembro de 2021. Consultado o 1 de agosto de 2025.
- ↑ "Dal Calcio Sicilia alla serie A olandese, il palermitano Quagliata all'Heracles Almelo" (en italiano). 1 de febreiro de 2020. Consultado o 1 de agosto de 2025.
- ↑ "Ufficiale - Giacomo Quagliata è un nuovo giocatore del Latina" (en italiano). 6 de xullo de 2018. Consultado o 1 de agosto de 2025.
- ↑ "Golden Quagliata: "Latina, Marcelo e la dedica per i gol"" (en italiano). 6 de decembro de 2018. Consultado o 1 de agosto de 2025.
- ↑ "Calciomercato Bari: ufficiale Quagliata, D'Ignazio ai saluti" (en italiano). 11 de xaneiro de 2019. Consultado o 1 de agosto de 2025.
- 1 2 "Dalla Pro Vercelli all’Heracles, viaggio nel sogno di Quagliata: “Ora marcherò Ziyech”" (en italiano). 2 de febreiro de 2020. Arquivado dende o orixinal o 05 de setembro de 2025. Consultado o 1 de agosto de 2025.
- ↑ "Heracles Almelo contracteert Giacomo Quagliata" (en neerlandés). Consultado o 1 de agosto de 2025.
- ↑ "Dalla C italiana all’esordio contro l’Ajax: Quagliata, un sogno più forte del covid" (en italiano). 23 de novembro de 2020. Arquivado dende o orixinal o 05 de setembro de 2025. Consultado o 1 de agosto de 2025.
- ↑ "Un italiano in Eredivisie, Quagliata: “Sogno la chiamata della Nazionale U21”" (en italiano). 13 de setembro de 2021. Arquivado dende o orixinal o 05 de setembro de 2025. Consultado o 1 de agosto de 2025.
- 1 2 "Dalla Serie C all'Olanda: chi è Quagliata, il nuovo terzino della Cremonese" (en italiano). 26 de xullo de 2022. Consultado o 1 de agosto de 2025.
- ↑ "Primo gol in Eredivisie per Giacomo Quagliata. Il terzino a segno contro il Fortuna Sittard" (en italiano). 4 de abril de 2022. Consultado o 1 de agosto de 2025.
- ↑ "Giacomo Quagliata vertrekt naar US Cremonese" (en neerlandés). 26 de xullo de 2022. Consultado o 1 de agosto de 2025.
- ↑ "Fiorentina-Cremonese 3-2: la Viola ringrazia Radu e fa festa al 95'" (en italiano). 14 de agosto de 2022. Consultado o 1 de agosto de 2025.
- ↑ "Coppa Italia, la Cremonese batte la Ternana e vola al secondo turno" (en italiano). 8 de agosto de 2022. Consultado o 1 de agosto de 2025.
- ↑ "Giacomo Quagliata in prestito al Catanzaro" (en italiano). 18 de xaneiro de 2025. Consultado o 1 de agosto de 2025.
- ↑ "GIACOMO QUAGLIATA APPRODA ALL'US CATANZARO" (en italiano). 18 de xaneiro de 2025. Consultado o 1 de agosto de 2025.
- ↑ "Frosinone-Catanzaro 1-1, le pagelle: Lusuardi prima gioia, Quagliata eurogol" (en italiano). 8 de febreiro de 2025. Consultado o 1 de agosto de 2025.
- ↑ Gómez, Xurxo (30 de xullo de 2025). "Giacomo Quagliata cambia Italia por el Deportivo". DxT Campeón (en castelán). Consultado o 2 de agosto de 2025.
- ↑ Silveira, Xane (5 de xuño de 2026). "Las notas individuales de la temporada del Deportivo: Mario Soriano, MVP blanquiazul". La Opinión A Coruña (en castelán). Consultado o 22 de xuño de 2026.
- ↑ Lema, Jorge (17 de agosto de 2026). "El 1x1 del Dépor-Elche: Amatucci y Román no fueron suficiente". DxT Campeón (en castelán). Consultado o 22 de agosto de 2026.
- ↑ "Quagliata, da Palermo all’Olanda e alla maglia azzurra: “Un bel traguardo, ma è solo l’inizio del percorso”" (en italiano). 10 de novembro de 2021. Consultado o 1 de agosto de 2025.
- ↑ "Splendida Italia: in svantaggio di due gol, batte 4-2 la Romania con il gol di Mulattieri e la tripletta di Canestrelli" (en italiano). 16 de novembro de 2021. Consultado o 1 de agosto de 2025.
- ↑ "La giovane Italia vola all’Europeo. Gravina: “Un obiettivo che vale doppio”. Nicolato: “Gruppo di valore”" (en italiano). 14 de xuño de 2022. Consultado o 1 de agosto de 2025.
| Control de autoridades |
|
|---|
