Game & Watch

Game & Watch
Instancia de modelo de produto  Subclase de consola portátil  Parte de consoles de videogame de segunda geração (pt)  Título ゲーム&ウオッチ (ja)
Características  Obra derivada Nu, Pogodi! (en)  Lingua lingua xaponesa
Implicados  Desenvolvedor/a Nintendo Research & Development 1  Mascota Mr. Game & Watch (pt)  Fabricante Nintendo
Datas  Fundación / creación 28 de abril de 1980  Descontinuación 14 de outubro de 1991  Data de publicación 28 de abril de 1980
Historia  Sucedido por Game Boy
Localización  País de orixe Xapón
Cifras e dimensións Unidades vendidas 43400000
Códigos e identificadores Freebase /m/01kdlb
Fontes e ligazóns  Páxina WEB nintendo.co.jp…
Wikidata C:Commons

A serie Game & Watch (en xaponés ゲーム&ウオッチ, Gēmu & Uotchi; coñecidas en Alemaña como tricOtronic e popularmente en España como «maquinitas») é unha liña de 59 consolas portátiles de videoxogos que foron fabricadas por Nintendo dende 1980 a 1991 e creadas por Gunpei Yokoi. Cada unha delas posúe un único xogo de pantalla LCD e ten ademais reloxo e alarma. Algúns dos títulos do formato Game & Watch foron Pinball, Donkey Kong, The Legend of Zelda, Mario Bros. e Balloon Fight. Desta serie vendeuse un total combinado de 43,4 millóns de unidades en todo o mundo, e foi o primeiro produto de Nintendo sobre videoxogos en obter un grande éxito. Estas consolas portátiles actualmente son difíciles de conseguir, e considéranse pezas históricas e artigos de coleccionista.

O formato Game & Watch de Nintendo fixo historia e axiña, moitas marcas maiores o intentaron recrear. A compañía Tiger Electronics produciu unha liña de videoxogos con temas propios ou de diversas licenzas como películas, series e videoxogos. Na posterior plataforma Game Boy, apareceron unha serie de recompilacións destes xogos Game & Watch, con versións modernizadas aparte da versión orixinal.

Historia e deseño

Deseño e estrutura básica dun Game & Watch.

O deseñador de xogos Gunpei Yokoi fora xefe da división de Investigación e Desenvolvemento de Nintendo na década de 1970, deseñando xoguetes físicos até a crise do petróleo de 1973, despois da cal o mercado decaeu para estes produtos. Ao mesmo tempo, as primeiras consolas de videoxogos para o fogar e as salas de xogos desenvolvéronse nos Estados Unidos, e Nintendo rapidamente adheriuse a esta onda no Xapón.

En 1979, mentres viaxaba nun Shinkansen (tren bala), Yokoi viu a un home de negocios aburrido xogando cunha calculadora LCD premendo os botóns. Tras isto, Yokoi pensou nunha idea para un reloxo dixital que funcionase como unha máquina de xogos en miniatura para matar o tempo. Máis tarde, puido presentarlle a idea ao presidente de Nintendo, Hiroshi Yamauchi, cando Yamauchi lle pediu que o levase a unha reunión de negocios. Aínda que Yamauchi non dixera nada durante a viaxe, a reunión na que estaba incluía ao director executivo de Sharp Corporation, e os dous discutiron a idea de Yokoi. Nunha semana, Yokoi foi convidado a unha reunión entre Nintendo e Sharp, dándolle o visto e prace para desenvolver o seu concepto.

O Game & Watch utiliza a tecnoloxía dunha calculadora portátil que, en lugar de amosar números, executa accións sobre imaxes xa debuxadas na súa pantalla. As unidades baséanse nunha CPU de 4 bits, da familia Sharp SM5xx, que inclúe unha pequena área de ROM e RAM e un circuíto de controlador de pantalla LCD. Os seus controis fan que o personaxe ou a ferramenta que se ve na pantalla LCD cambie e fagan a ilusión de que se mova. A imaxe é conectada xunto á outra, dando orixe a un control, coma se fose un botón novo, que enumera a puntuación ou o número das vidas que se van perdendo.

Fabricáronse diferentes modelos, algúns con dúas pantallas (serie Multi Screen). Nas consolas Game Boy Advance SP, Nintendo DS e Nintendo 3DS reutilizouse este deseño.

O moderno deseño do "botón direccional" (D-pad) foi desenvolvido en 1982 por Yokoi para o xogo portátil Donkey Kong. O deseño demostrou ser popular para os seguintes títulos de Game & Watch. Este deseño en particular foi patentado e logo obtivo un Premio Emmy de Tecnoloxía e Enxeñaría. A serie Game & Watch suspendeuse finalmente en 1991 coa consola Mario the Juggler.

Funcionamento

Para que funcione, requírese dunhas pilas pequenas, xeralmente pilas de botón (aínda que de tipo C na versión Tabletop).

Hora e alarma

Nada máis acenderse tense que axustar a hora. Unha vez axustada a hora e despois de acabar unha partida, premendo o botón Time, amósase a hora. Para reconfigurala, tense que premer o botón Reset (premendoo coa punta dun lapis). A hora funciona xunto a unha alarma, a cal é configurábel co botón de alarma (tamén pulsándoa coa punta dun lapis) e premendo os botóns Left (esquerda) e Right (dereita) para cambialas. A alarma soa á hora dada. O timbre da alarma ás veces é insuficiente para algúns oídos. Durante o xogo, a alarma no canto de soar, adoita amosar unha pequena animación (como unha campá).

Xogo (Game A e Game B)

A maioría dos títulos teñen un botón Game A (Xogo A, normalmente para a dificultade normal) e Game B (Xogo B, normalmente para a dificultade alta) aínda que existen excepcións:

• En Squish, o Game B é radicalmente diferente do Game A: o xogador debe tocar alieníxenas para eliminalos en lugar de evitar as paredes móbiles.
• En Flagman, o Game B é un modo onde o xogador ten que premer o botón dereito dentro dunha certa cantidade de tempo, sen memorizar patróns.
• En Judge, Boxing, Donkey Kong 3 e Donkey Kong Hockey, o botón Game B é unha versión para dous xogadores do Game A.
• En Climber, Balloon Fight, Super Mario Bros., Gold Cliff e Zelda non hai botón de Game B.

Na maioría dos casos, tanto o Xogo A como o Xogo B aumentaban en velocidade ou dificultade a medida que o xogador progresaba, e o Xogo B comezaba no intre que se acadaban os 200 puntos no Xogo A.

Modelos de Game & Watch

Silver

Primeira Game & Watch, Ball, serie Silver (1980).

Estes xogos recibiron o nome de Silver (Prata) por mor de que a súa placa frontal é prateada. Foron os primeiros xogos de Game & Watch e son difíciles de atopar, especialmente en caixa. Os prezos destes xogos son altos ou moi altos.

• Ball (AC-01, 28 de abril de 1980)
• Flagman (FL-02, 5 de xuño de 1980)
• Vermin (MT-03, 10 de xullo de 1980)
• Fire (RC-04, 31 de xullo de 1980)
• Judge (en versións verde e púrpura) (IP-05, 4 de outubro de 1980)

Gold

Serie Gold Screen, Game & Watch Manhole (1981).

Estes xogos teñen unha placa frontal de cor dourada, é por iso que esta serie recibiu o nome de Gold (Ouro). Comezando con esta serie, o nome da mesma foi impreso no paquete. A diferenza da serie anterior, a consola posúe unha alarma programábel e un fondo coloreado. Estes xogos, coma os da serie Silver, son difíciles de atopar.

• Manhole (MH-06, 29 de xaneiro de 1981)
• Helmet (CN-07, 21 de febreiro de 1981)
• Lion (LN-08, 29 de abril de 1981)

Wide Screen

O Parachute de 1981 foi o primeiro xogo da serie Wide Screen.

A pantalla dos xogos Wide Screen é máis grande ca a da serie anterior, é por iso que se chaman Wide Screen (Pantalla ancha). Agás o xogo Egg, os demais son máis comúns.

• Parachute (PR-21, 19 de xuño de 1981)
• Octopus (OC-22, 16 de xullo de 1981)
• Popeye (PP-23, 5 de agosto de 1981)
• Chef (FP-24, 8 de setembro de 1981)
• Mickey Mouse (MC-25, 9 de outubro de 1981)
• Egg (EG-26, 9 de outubro de 1981)
• Fire (FR-27, 4 de decembro de 1981)
• Turtle Bridge (TL-28, 1 de febreiro de 1982)
• Fire Attack (ID-29, 26 de marzo de 1982)
• Snoopy Tennis (SP-30, 28 de abril de 1982)

Multi Screen

Game & Watch Oil Panic (1982), a primeira consola da serie Multi Screen.

Esta serie é unha das máis famosas. O especial destes xogos é que teñen dúas pantallas. Fóra de tres xogos (Squish, Bombsweeper e Safebuster), o xogo vai dunha pantalla a outra. As pantallas pódense abrir verticalmente de abaixo cara a arriba.

• Oil Panic (OP-51, 1982)
• Donkey Kong (DK-52, 1982)
• Mickey & Donald (1982)
• Greenhouse (GH-54, 1982)
• Donkey Kong II (JR-55, 1983)
• Pinball (PB-59, 5 de decembro de 1983)
• Black Jack (BJ-60, 1985)
• Squish (MH-61, abril de 1986)
• Bombsweeper (BD-62, xuño de 1987)
• Safebuster (JB-63)
• Gold Cliff (MV-64, outubro de 1988)
• Zelda (ZL-65, outubro de 1989)

Game & Watch Mario Bros., a primeira Multi Screen en versión horizontal (1984).

Tres xogos da serie abrense horizontalmente, ao estilo dun libro xaponés (de dereita a esquerda). Nestes tres xogos, a acción destes amósase en ambas pantallas asemade.

• Mario Bros. (MW-56, 1983)
• Rain Shower (LP-57, agosto de 1983)
• Life Boat (TC-58, 1983)

New Wide Screen

Primeiro xogo da serie New Wide Screen, Donkey Kong Jr. (1982).

Versión mellorada da serie Wide Screen. Algúns destes xogos son aínda máis difíciles de atopar cá outros. En xeral os últimos tres títulos: Mario The Juggler, Climber e Balloon Fight.

• Donkey Kong Jr. (DJ-101, 26 de outubro de 1982)
• Xogos de Game & Watch#Mario's Cement Factory (ML-102, 16 de xuño de 1983)
• Manhole (NH-103, 24 de agosto de 1983)
• Tropical Fish (TF-104, xullo de 1985)
• Super Mario Bros. (YM-105, marzo de 1988)
• Climber (DR-106, marzo de 1988)
• Balloon Fight (BF-107, marzo de 1988)
• Mario the Juggler (MJ-108, outubro de 1991)

Tabletop

Xogos Mario's cement factory e Snoopy da serie Tabletop.

O nome Tabletop débese a que se coloca nunha superficie para xogar, no canto de sosterse nas mans. O deseño destes xogos (que son os xogos máis grandes de Game & Watch) lembra ás máquinas recreativas. O novo nesta serie é a pantalla, que ten cor e pasa luz por detrás para poder xogar.

• Donkey Kong Jr. (CJ-71, 28 de abril de 1983)
• Mario's Cement Factory (CM-72, 28 de abril de 1983)
• Snoopy (SM-73, 5 de xuño de 1983)
• Popeye (PG-74, agosto de 1983)

Panorama

Mickey Mouse, serie Panorama.

Ao igual que os xogos da serie Tabletop, estes xogos teñen unha pantalla en cor con luz tamén. O especial nestes xogos é que se abren para xogar e teñen un espello no interior onde se reflicte o xogo.

• Snoopy (SM-91, 30 de agosto de 1983)
• Popeye (PG-92, 30 de agosto de 1983)
• Donkey Kong Jr. (CJ-93, 7 de outubro de 1983)
• Mario's Bombs Away (PB-94, 10 de novembro de 1983)
• Mickey Mouse (DC-95, febreiro de 1984)
• Donkey Kong Circus (MK-96, setembro de 1984)

SuperColor

Game & Watch SpitballSparky (1983), primeiro da serie Super Color.

Estes xogos teñen unha pantalla con cores e unha carcasa prateada. O xogo Spitball Sparky existe tamén cunha carcasa branca. Descoñécese o porqué, cantos deles existen e se as hai nalgún xogo de Crabgrab. Os dous xogos da serie teñen unha forma vertical alongada. A xogabilidade vai principalmente de abaixo cara a arriba.

• Spitball Sparky (BU-201, 7 de febreiro de 1984)
• Crab Grab (UD-202, 21 de febreiro de 1984)

Micro VS.

Punch Out Game & Watch (1984), primeira da serie Micro VS.

A pantalla era alongada horizontalmente e o novidoso destes xogos é que teñen dous "joy pads" que se gardaban no seu interior. Con estes, un xogador pode xogar contra a computadora ou dous xogadores poden xogar un contra o outro.

• Boxing/Punch Out!!! (BX-301, 31 de xullo de 1984)
• Donkey Kong 3 (AK-302, 20 de agosto de 1984)
• Donkey Kong Hockey (HK-303, 13 de novembro de 1984)

Crystal Screen

Super Mario Bros. versión Crystal Screen (1986).

A pantalla desta serie é transparente e moi fina, sendo posíbel mirar a través da pantalla e cambiar o fondo. Estes xogos son moi difíciles de atopar e os prezos son moi altos.

• Super Mario Bros. (YM-801, xuño de 1986)
• Climber (DR-802, xullo de 1986)
• Balloon Fight (BF-803, novembro de 1986)

Colour Screen

En setembro de 2020, Nintendo Direct anunciou a Game & Watch: Super Mario Bros. en homenaxe ao 35.º aniversario de Super Mario Bros., e o 40.º aniversario da Game & Watch, que se lanzou en todo o mundo o 13 de novembro do mesmo ano. Trátase dunha consola portátil co modelo dunha Game & Watch co que se pode xogar aos videoxogos Super Mario Bros. e Super Mario Bros.: The Lost Levels, ademais de contar con reloxo e unha versión de Ball de Game & Watch protagonizada por Mario.

• Game & Watch: The Legend of Zelda (12 de novembro de 2021, 35.º aniversario de The Legend of Zelda)

O 15 de xuño de 2021, Nintendo revelou unha Game & Watch similar, a Game & Watch: The Legend of Zelda, que se lanzaría en homenaxe ao 35.º aniversario da franquía. O sistema contén catro xogos; The Legend of Zelda, Zelda II: The Adventure of Link, The Legend of Zelda: Link's Awakening e unha variante de Vermin con Link substituíndo a cabeza do personaxe orixinal. Foi lanzado o 12 de novembro de 2021.

• 
  Game & Watch: Super Mario Bros.
• 
  Game & Watch: The Legend of Zelda

Edicións especiais

Super Mario Bros. YM-901-S, edición especial para o torneo F-1 Grand Prix (1987).

• Super Mario Bros. (YM-901, agosto de 1987)

Este Super Mario Bros. é o máis raro das 3 versións. Esta versión amarela de Super Mario Bros. Game & Watch foi un dos premios para os xogadores que gañaron o Torneo F-1 Grand Prix no Xapón. Só se fixeron 10 000 unidades. Estes premios véndense por arredor de $ 350-700 no Xapón dependendo das condicións e cómo estean de completos.

• Ball (RGW-001, 2009 no Xapón e 2011 en América, 30 Aniversario) (Club Nintendo)

En novembro de 2009, Nintendo Xapón anunciou que os membros do xa pechado Club Nintendo poderían recibir unha réplica do Game & Watch Ball como premio. A unidade víase case idéntica á orixinal, aínda que presenta o logotipo do Club Nintendo e ten un interruptor para cambiar o volume. En España, o Game & Watch estaba dispoñíbel no Catálogo de Estrelas a cambio de 7 500 estrelas.

Clons de Game & Watch

Durante os anos 80, as Game & Watch tiveron tanto éxito que compañías como Gakken, Konami, RadioShack, Coleco e Namco produciron videoxogos LCD. A xogueteira xaponesa Bandai Electronics tamén lanzou moitos xogos nos Estados Unidos e noutros países. Bandai tiña dúas etiquetas diferentes nos seus xogos ás veces: LSI (refírese ao microchip da CPU) e FL (indica o uso dunha pantalla VFD). Bandai incorporou paneis solares nos seus xogos (Bandai LCD Solarpower). A empresa Epoch outorgou licenzas de xogos LCD a varias compañías diferentes como Grandstand, Tandy (Radio Shack) e probabelmente outras. Entre os seus xogos máis populares están Epoch Game Pocket Computer e Epoch Man (un clon de Pac-Man). A empresa Casio, de tecnoloxía líder en calculadoras na época, logrou realizar varios xogos LCD, algúns incluídos nos seus reloxos dixitais (Game Watch) ou calculadoras. Outra compañía xaponesa chamada Masudaya fabricou unha serie de xogos portátiles LCD chamada Play & Time.

Na Unión Soviética tamén se produciron xogos clons rusos de Game & Watch. Crese que por mor dos problemas da Guerra Fría, a importación de Game & Watch prohibiuse en Rusia, o que deixou a varias compañías rusas intentando sacar proveito producindo as súas propias consolas clónicas. Hai bastantes variacións especialmente dos xogos de Game & Watch Mickey Mouse e Egg, debido a que só as pequenas empresas producían xogos, e non podían permitirse producir moitas placas de circuítos cunha lóxica de xogo distinta, polo que a maioría producía só unha, así que só requiría un cambio da pantalla entre os modelos para mudar de xogo. Algunhas pantallas tamén se lanzaron como un complemento, e o usuario podería mudar a pantalla para xogar a un novo xogo.

Houbo tamén algúns xogos orixinais producidos que non eran clons de Game & Watch. Poucos dos clons rusos teñen a pantalla exacta dos Game & Watch (Egg, Octopus, Chef e Mickey Mouse). Outros teñen un guión diferente pero un sistema de xogo similar. Atopáronse 9 logotipos diferentes de compañías ou modelos rusos. Angstrem foi a maior empresa en manufacturar xogos en Rusia, aínda que fabricaron principalmente calculadoras durante os anos 70 e 80. Da mesma forma, as súas calculadoras tamén eran clons de Casio, particularmente o modelo PB-100. Algúns xogos vendéronse tamén baixo a marca Elektronika.

Tiger Electronic, grazas a varias licenzas de videoxogos, películas e series de televisión, logrou dominar o mercado dos xogos LCD, mesmo durante os anos 90 coa Game Boy e a Game Gear en venda.

• 
  Clon ruso de Egg, Nu, pogodi!, Electronika IM-02 (1984). O prezo de venda era de 25 rublos.
• 
  Casio - Auto Race
• 
  Gakken - LCD Card Game Donkey Angler
• 
  Epoch LCD Game
• 
  Radio Shack - Highway
• 
  Playtime - Invader
• 
  Tiger Electronics - Mouse maze
• 
  Coleco Galaxian

Notas

Referencias

Véxase tamén

Bibliografía

• Gorges, Floren (2016). La Historia de Nintendo. Volumen 2, 1980-1991, Game & Watch, un invento sorprendente. Héroes de papel. ISBN 978-84-942881-8-0. OCLC 962499054.