Francesc Cambó

Na Galipedia, a Wikipedia en galego.
Francesc Cambó
Francesc Cambó
Francesc Cambó i Batlle
Datos persoais
Nacemento 2 de setembro de 1876
Lugar Verges
Falecemento 30 de abril de 1947
Lugar Bos Aires
Organización Lliga Regionalista de Catalunya

Francesc Cambó i Batlle, nado en Verges o 2 de setembro de 1876 e falecido en Bos Aires o 30 de abril de 1947, foi un político catalán, fundador e líder da Lliga Regionalista.

Traxectoria[editar | editar a fonte]

Formación[editar | editar a fonte]

Estudou dereito e filosofía e letras na Universidade de Barcelona. En 1901 foi un dos fundadores da Lliga Regionalista e foi elixido concelleiro do concello de Barcelona. Deputado nas Cortes entre 1907 e 1910, na súa actividade política defendeu a adopción dun estatuto de autonomía para resolver o problema catalán, aínda que acabou aceptando a Mancomunidade catalá como solución de compromiso.

Tras a morte de Enric Prat de la Riba en 1917, Cambó converteuse no líder da Lliga e foi ministro en dous gobernos conservadores, en 1918 ministro de fomento e en 1921 ministro de finanzas, nos dous casos con Antonio Maura como presidente do goberno.

Nas eleccións de 1931 non conseguiu acceder ao Parlamento e marchou ao estranxeiro ata que en 1933 logrou unha acta de deputado, que non revalidou en 1936. Cando estoupou a Guerra civil española atopábase no estranxeiro e aínda que inicialmente non estaba a favor dos militares sublevados, rematou axudándoos por temor a que se establecese unha república prosoviética de gañaren os republicanos, e chegou a financiar con importantes sumas ao bando franquista.

Posguerra[editar | editar a fonte]

Tras a guerra viviu en Suíza, os Estados Unidos e a Arxentina. Cambó fixo de mecenas de numerosas actividades artísticas e culturais. Destaca a creación en 1922 da Fundación Bernat Metge, que traduciu ao catalán numerosos textos clásicos gregos e latinos. Tamén escribiu algúns libros como Les Dictadures (1929) e Per la concòrdia en 1930.