Forex

Na Galipedia, a Wikipedia en galego.

Forex, acrónimo de Foreign Exchange (Troco de Moedas Estranxeiras). Tamén coñecido coma Mercado Internacional de Divisas. O mercado de moeda estranxeira (Forex ou FX) existe onde queira que unha moeda se negocie con outra (como nunha casa de trocos). É, por moito, o meirande mercado do mundo, en termos de valor de efectivo negociado, e inclúe os negocios entre os grandes bancos, os bancos centrais, os especuladores grandes ou pequenos de moeda, as corporacións multinacionais, os gobernos e outros mercados financeiros e institucións.

Unha das principais diferenzas fronte ao Mercado Bolsista é que o Mercado de Divisas carece dunha situación centralizada. Opera como unha rede electrónica global de bancos, institucións financeiras e operadores individuais, todos enfocados en compraren ou venderen divisas en virtude da súa relación de troco.